Marcos 4:1-41
-
JA SJEJELIK SBʼAJA SGOBYERNO JA DYOSI (1-34)
-
Ja tsʼunumani (1-9)
-
Ja Jesús ya makunuk sjejelik ja yajni sjeʼa (10-12)
-
Ja jas wa stojolan ja sjejel sbʼaja tsʼunumani (13-20)
-
Mini xnujxi moʼoch jun kandil (21-23)
-
«Ja junxta medida waxa wawex makunuk» (24, 25)
-
Ja tsʼunuman wa xwayi (26-29)
-
Ja bʼakʼ mostasa (30-32)
-
Ja yajel makunuk sjejelik (33, 34)
-
-
Ja Jesús wa xya lamxuk jun tsatsal ikʼ sok jaʼ (35-41)
4 Cha pilan ekʼele ja Jesús ti och sjeʼ bʼa stiʼ mar. Yuja jel jitsan stsomo sbʼaje ja kristyano ja bʼa sjoyanali, ja yeʼn kʼe bʼa jun chʼin barko, ti kulaniʼa sok jits och tʼusan. Pe yibʼanale ja kristyano ti kanye bʼa stiʼ mar.
2 Jaxa yeʼn kʼe sjeyi ja kristyano jitsan jastik junuk sok ya makunuk sjejelik.* Yajni wan sjejeli, wa xyala yabʼye:
3 «Maklayik ja it: Jun winik el tsʼunbʼanel.
4 Sok yajni wan tsʼunbʼaneli, jujuntik inat ti koʼ bʼa stiʼ bʼej, tixa jakye ja yal chaniki sok ti stuluweʼa.
5 Jaxa tuki ti koʼ bʼa tonaltik, bʼa mey lek luʼum, sok wegoxta elyekʼen yuja mi pimuk ja luʼumi.
6 Pe yajni eljan ja kʼaʼuji, chʼakye kʼaʼuj, sok yuja mi chaʼanuk ja yechi, chʼak takuk.
7 Jaxa tuk inati ti koʼ bʼa yoj kʼiʼixaltik, jaxa kʼiʼixaltiki kʼiʼi sok yawe tupuk, ja yuj mi satiniye.
8 Pe jaxa tuki ti koʼ bʼa lekil luʼum, elyekʼeni sok kʼiye, sok kʼe satinuke: jujuntik satiniye 30 ekʼele mas, tuk 60 ekʼele mas, jaxa tuki 100 ekʼele mas».
9 Sok tixa yalaʼa: «Ja maʼ ay xchikin bʼa oj smaklay, a-smaklay lek».
10 Pe yajni stuchʼil ayi, ja matik teye bʼa sjoyanali soka 12 jekabʼanumiki kʼe sjobʼeyi jas wa stojolan ja sjejelik yaʼa.
11 Ja yeʼn sjakʼayile: «Ja weʼnlexi wa x-ajikan oja wabʼyex stojol ja jas jel chaʼanyabʼal wa xjak bʼa Dyos* sbʼaja sGobyerno. Pe jaxa tuki wa xjeʼayile sok sjejelik,
12 bʼa jachuk, anima xyilawe, lomni oj ilwanuke, sok anima xyabʼye, mini oj yabʼye stojol. Jaxa yeʼnleʼi nunka oj kumxuke soka Dyosi sok mi oj ajuke perdon».
13 Chomajkil, yala yabʼ ja yeʼnleʼi: «Ta ja weʼnlexi mi xa wabʼyex stojol ja sjejel it, ¿jastal xa oja wabʼyex stojol yibʼanal ja tuk sjejeliki?
14 Ja tsʼunumani wa stsʼunu ja yabʼal ja Dyosi.
15 Ja inat wa xkoʼ bʼa stiʼ bʼeji yeʼnle ja matik wa xyabʼye ja yabʼal ja Dyosi, pe ja Satanás wegoxta wa xjaki sok wa xya eluk ja yabʼal ja Dyos tsʼunji bʼa yeʼnleʼi.
16 Cha tey ja inat wa stsʼunxi bʼa yoj tonaltiki. Ja it yeʼnleni ja matik kechan pabor wa xyabʼye ja yabʼal ja Dyosi, wegoxta wa skʼuʼane gusto lek.
17 Pe mini chaʼanuk ja yech ja bʼa skʼujoleʼi. Ama wa snochoweyi jun tyempo, pe yajni wa xjak sbʼaje wokolik ma wa x-iji spatike yuja skisawe ja yabʼal ja Dyosi, wa sloko yoke.*
18 Chomajkil, tey ja inat wa stsʼunxi bʼa yoj kʼiʼixaltiki. Ja it yeʼnle ja matik wa xyabʼye ja yabʼal ja Dyosi
19 pe wa xchʼika sbʼaj ja chamkʼujolik ja bʼa jastal wa xtax ja tyempo* it, ja smonwanel* ja rikoʼili sok ja kʼankʼunel bʼa tuk jastik junuki, jaxa yabʼal ja Dyosi wa xnetʼjikani; sok ja yuj mi satini.
20 Sok cha tini ay ja inat it wa stsʼunji bʼa lekil luʼumi. Ja it yeʼnle ja matik wa xyabʼye ja yabʼal ja Dyosi, gustoxta wa skʼuʼane sok wa satiniye: jujuntik wa satiniye 30 ekʼele mas, tuk 60 ekʼele mas, jaxa tuki 100 ekʼele mas».
21 Sok cha yala: «¿Anke mini xnujxi bʼa jun moʼoch* jun kandil ma ti wa xchʼikxi bʼa yibʼ chʼat? ¿Mi maʼ wani x-axi eluk bʼa ti oj axuk bʼa steʼil ja kandili?
22 Yujni mi jas nakʼan ay bʼa mi oj kʼot chijkajuk, cha mini jas nakʼubʼal lek bʼa mi oj kʼot naxuk.
23 Yibʼanal ja maʼ ay xchikini, a-smaklay lek».
24 Cha yala yabʼye: «Maklayik lek ja jas wanex yabʼjeli. Ja junxta medida waxa wawex makunuk jani oj cha ajuk makunuk bʼa weʼnlex, sok ojto chʼikjukawilex mas.
25 Yujni ja maʼ ayiʼoji ojni ajukyi mas; pe ja maʼ mey yiʼoji, asta ojni japjukyi ja jas yiʼoji».
26 Ti cha yalaʼa: «Ja sGobyerno ja Dyosi jach jastal jun winik wa stika inat ja bʼa luʼumi.
27 Ja yeʼn wa xway ja bʼa akwali sok wa xkʼe ja bʼa sat kʼakʼuji. Jaxa inati wa xbʼojtikʼeni sok wa xkʼiʼi, ama ja yeʼn mini snaʼa jastal.
28 Stuchʼil wa x-och bʼaʼalanuk ja luʼumi: bʼajtan wa xkʼiʼi, tixa wa x-ajyi ja xchiwanali sok tsaʼan wa xyijbʼi ja sat ja bʼa xchiwanali.
29 Yajni yijxa ja sati, ja winiki wa skʼutsu soka machiti* yujni kʼota ja styempoʼil ja stuljeli».
30 Sok ti cha yalaʼa: «¿Jasun oj bʼobʼ katik slaj ja sGobyerno ja Dyosi, ma jas slajelal oj bʼobʼ katik bʼa oj jcholtik?
31 Jach jastal jun sbʼakʼ mostasa, yajni wa stsʼunxi jani ja inat mas nux bʼa yibʼanal ja inatik ja bʼa luʼumi,
32 pe yajni tsʼunanxa, wa xkʼiʼi sok masto niwan wa xwaj yuja tuk itajiki. Sok jelni niwak xkʼi ja skʼabʼiki ja yuj ja yal chaniki wa xbʼobʼ skʼuluk soje ja tiw sok ajyel ja bʼa yaxubʼili».
33 Jelni xya makunuk jitsan sjejelik jastal it yajni wa xcholo yabʼ ja kristyano ja yabʼal ja Dyosi, sok wani xyaʼa tʼabʼan skʼujol ja janekʼ wa xbʼobʼ yabʼye stojolil ja yeʼnleʼi.
34 Ja smeranili, ta mi xya makunuk sjejelik,* mini jas xyala yabʼ ja kristyano, pe nakʼul wa xchʼak xcholyabʼ ja snebʼumaniki.
35 Ja bʼa kʼakʼu jaw, yajni kʼikʼbʼita, ti yala yabʼ ja snebʼumaniki: «La ekotik bʼa stiʼ jun lado».
36 Sok yajni chʼak skʼumkan ja kristyano, ja yeʼnleʼi tixa yiʼaje bʼa chʼin barko. Sok ti smoje tuk chʼin barkoʼik.
37 Pe junta chʼaykʼujol kʼe ya jun tsatsal ikʼ sok jaʼ. Ja jaʼi wanxta spukʼtsijel ja chʼin barko sok ojxta bʼutʼ yalel.
38 Pe ja Jesús ti wan wayel bʼa stop barko sok yipunej ja yolom sok jun sen olomal. Ja yuj syujkese sok yalawe yabʼi: «Maestro, oj chamkotik... ¿yuj maʼ mi xchama kʼujol?».
39 Anto tixa kʼeʼa, skomo ja ikʼi sok yala yabʼ ja mari: «¡Chʼabʼanan! ¡Lamxan!». Jaxa ikʼi chʼajbʼaji sok xlamamixta waji.
40 Tixa alji yabʼyeʼa: «¿Jas yuj jel xiwel ayexi? ¿Yuj maʼ mito xa kʼuʼanex?».
41 Jaxa yeʼnleʼi jel och xiwele juntiro sok wa xyaltalan sbʼaje: «¿Machunkiluk mero ja winik it? Asta wa xkʼuʼajiyi yuja ikʼ sok ja mari».
Notaʼik
^ Ma «slajelalik».
^ Kʼela ja bʼa Yaljelik cholubʼal.
^ Ma «wa xyaʼawekan ja skʼuʼajel».
^ Kʼela ja bʼa Yaljelik cholubʼal, Ja jastal wa xtax ja tyempo.
^ Ma «sloʼlanel».
^ Ma «moʼoch bʼa sbʼisjel».
^ Jun tikʼe najtil lochan machit.
^ Ma «slajelalik».
