Mateo 14:1-36
14 Ja bʼa tyempo jaw, ja Herodes,* ja mandaranum bʼa slujmalil Galilea, yabʼ ja jas wa xyalawe bʼa Jesús
2 sok yala yabʼ ja yaʼtijumiki: «Yeʼnani ja Juan ja maʼ wa xya yiʼ jaʼ ja kristyano. Kʼetajan ja bʼa chamwiniki sok ja yuj wa xbʼobʼ skʼuluk ja milagroʼik jaw».*
3 Pe bʼajtanto, ja Herodes syama ja Juani, smocho kadena sok xchʼika bʼa preso yuja Herodías, ja xcheʼum ja yermano Filipo.
4 Yujni ja Juan wanxta yaljel yabʼ ajyi: «Mini sbʼejuk awiʼoneji».
5 Ja Herodesi wani skʼana oj smile, pe wani xiwyuj ja kristyano jumasaʼ, yujni wa xyilawe kʼotel jun aluman ja Juani.
6 Pe yajni wan kʼintaxel ja scumpleaño ja Herodesi, ja bʼa ekʼele jaw chani ja yakʼix ja Herodías, jaxa Herodes jelni skʼulan gusto
7 ja yuj skʼapa* yajelyi chikan jas skʼana.
8 Anto ja yeʼni, yuja tʼenji yuja snani, yala: «Aki bʼa jun niwan lechan plato ja yolom ja Juan ja maʼ wa xya yiʼ jaʼ ja kristyano».
9 Ja reyi jel och stristeʼil; pe yuja yaʼa tʼabʼan skʼujol ja jas skʼapa sok yuja slok jumasaʼ,* yaʼa mandar bʼa oj yaweyi.
10 Yaʼakan akʼutsjukyi ja yolom ja Juan ja bʼa preso.
11 Anto yiʼajejanyi ja yolom bʼa jun niwan lechan plato sok yaweyi ja akʼixi, jaxa yeʼni yiʼaj ochyi ja snani.
12 Tixa jakye ja snebʼumanik ja Juani, yiʼaje ja skuerpo sok smukuwe. Sok tsaʼan tixa waj yale yabʼ ja Jesús.
13 Yajni aljiyabʼ ja Jesús, tixa el ja tiw bʼa jun chʼin barko bʼa wajel bʼa jun chʼabʼan lugar bʼa ajyel stuchʼil. Pe yajni yabʼye ja kristyano jumasaʼ, elye ja bʼa xchonabʼe sok bʼejyel waj staʼe.
14 Yajni kʼot ja bʼa stiʼ mari, yila jun niwan nole kristyano, jaxa yeʼn jel snaʼa syajulal juntiro, sok chʼak ya tojbʼuk ja matik maloʼayi.
15 Pe yajni och ja kʼaʼuji, tixa mojxiye ja snebʼumaniki sok yalawe yabʼi: «Jel najat ay ja lugar it sok ochta kʼaʼuj. Jekaxa ja kristyano oj wajuke bʼa komonik sok oj smane jas oj yabʼye».
16 Pe ja Jesús tixa yala yabʼyeʼa: «Mi yajnaluk oj wajuke. Awikyi swaʼel weʼnlex».
17 Ja yeʼnle sjakʼaweyi: «Ja ili kechan kiʼojtikon joʼe pan sok chabʼ chay».
18 Tixa yala yabʼyeʼa: «Iʼajikjanki».
19 Anto tixa sjeka ja kristyanoʼik akulanuke bʼa ak. Tixa yiʼaj ja joʼe pani sok ja chabʼ chayi, ti skʼela ja satkʼinali sok skʼulan jun orasyon.* Sok yajni xetʼa ja paniki, tixa yayi ja snebʼumaniki, jaxa yeʼnleʼi yaweyi ja kristyano jumasaʼ.
20 Ja yuj spetsanile chʼak waʼuke sok bʼutʼel lek kanye. Tixa stsomowekan ja pedasoʼik pan kan sobra sok bʼutʼ 12 moʼoch.
21 Waʼye junuk 5,000 winike, pe mi ochye kuenta ja ixuke sok ja yal untiki.
22 Sok mixa ya ekʼ tyempo, ja yeʼn yala yabʼ ja snebʼumaniki akʼeʼuke ja bʼa chʼin barko sok axa skʼuts-e ja bʼa stiʼ jun lado malan ja yeʼn wan skʼumajelkan ja kristyano jumasaʼ.
23 Yajni chʼak skʼumkan ja kristyano, stuchʼil kʼe ja bʼa witsi bʼa yajelyi orasyon. Yajni och ja akwali, ja yeʼn stuchʼilni ay ja tiwi.
24 Ja bʼa jutsʼin jaw, ja chʼin barko najatxa ay lek* ja bʼa stiʼ mari, pe wani wokolanel yuja spukʼtsinel ja mari yujni tey bʼa stiʼ sat ja ikʼi.
25 Pe sajto lek ja bʼa saʼan sakbʼeli,* ja Jesús och bʼejyuk ja bʼa sat mari bʼa waj tawanuk.
26 Yajni ja nebʼumanik yilawe wan bʼejyel ja bʼa sat mari, jel xiwye sok yalawe: «¡Lajansok jun splanta kristyano!». Sok och awanuke yuja xiweli.
27 Pe ja Jesús wegoxta yala yabʼye: «¡Keʼna! Mok xiwanik. Tsatsankʼujolanabʼajik».
28 Ja Pedro sjakʼayi: «Kajwal, ta wenkʼa, payawon bʼa oj waj jtaʼa ja bʼa sat jaʼi».
29 Ja yeʼn yala: «¡Laʼ!». Jaxa Pedro koʼ ja bʼa chʼin barko sok och bʼejyuk ja bʼa sat jaʼi bʼa oj waj staʼ ja Jesús.
30 Pe yajni kan skʼel ja tsatsal ikʼi, och xiwel. Sok yajni kʼe mukxuki, awani: «¡Kajwal, koltayon!».
31 Ja Jesús wegoxta xija ja skʼabʼi, syamakani sok yala yabʼi: «Winik, ¿jas yuj meyuka wiʼoj lek skʼuʼajeli? ¿Jas yuj awaʼakan oj skʼuluka ganar ja duda?».
32 Yajni kʼeye ja bʼa chʼin barko, lamxi ja tsatsal ikʼi.
33 Anto ja matik teye bʼa chʼin barko koʼye sbʼaj tinan sok yalawe yabʼi: «Meran lek, weʼnani ja Yunin ja Dyosi».
34 Jaxa yeʼnleʼi skʼutsuwe ja mari sok tixa kʼotye bʼa slujmalil Genesaret.
35 Yajni snaʼawe sbʼaji, ja winike bʼa lugari spukuwe ekʼ yabʼalil bʼa spetsanil ja lugarik joybʼanubʼalyuji, jaxa kristyano yiʼajenjanyi yibʼanal ja matik maloʼayi.
36 Sok spataweyi skʼujol a-skʼan oj yamjukyi ama kechan ja stiʼ ja spal kʼuʼi, sok spetsanil ja matik wa syamaweyiʼi wani xtojbʼiyekani.
Notaʼik
^ Wa xkʼan alxuk, ja Herodes Antipas. Kʼela ja bʼa Yaljelik cholubʼal.
^ Ma «ja jastik jel chaʼanyabʼalil jaw».
^ Ma «ya och testigoʼil ja Dyos».
^ Ma «yuja matik ti tsʼelane bʼa mesa».
^ Ma «skʼana akoʼ slekilal».
^ Jach kanel ja bʼa griego: «jitsan estadio». Jun estadio ayiʼoj 185 metro.
^ Jach kanel ja bʼa griego: «xchanil bijilia». Ja it mojantik las 3 bʼa sajto sakbʼel man wa sakbʼi (mojan las 6).
