Mateo 19:1-30
19 Yajni chʼak yal ja jastik it ja Jesús, tixa el ja bʼa Galilea sok kʼot ja bʼa stsʼajkanil ja Judea, ja bʼa stiʼ jun lado ja Jordán.
2 Tixa nochjiyuj jitsan kristyano, jaxa yeʼn stojbʼes ja matik maloʼayi.
3 Anto tixa mojxiyejan jujuntik fariseo. Ja yeʼnle wa skʼanawe oj yawe och probar sok sjobʼoweyi: «¿Wan maʼ xbʼobʼ skʼuts ja snupanel jun winik soka xcheʼum yuj chikan jasa?».
4 Ja yeʼn tixa sjakʼaʼa: «¿Mi maʼ akʼumanex ja bʼa skʼeʼulabʼili ja Dyos skʼulan winik sok ixuk
5 sok yala ‹Ja yuj ja winiki ojni yakan ja stat soka snani, sok jaxa oj ajyuk* soka xcheʼumi sok june ita oj kʼotuke xchawanile›?
6 Ja yuj mixani chawaneʼuke, kechanxtani june kʼotele. Ja yujil, ja jas yaʼunej staʼ sbʼaj ja Dyosi, mokni spil mini jun winik».
7 Jaxa yeʼnle ti yalaweʼa: «Anto, ¿jas yuj ja Moisés yaʼa mandar ja winiki ayayi ja xcheʼum jun sjuʼunil bʼa skʼutsjel nupanel sok tixa xyaʼakan awajuka?».
8 Jaxa yeʼn ti sjakʼaʼa: «Ja Moisés yaʼa permiso bʼa skʼutsjel jawa nupanelexi yuja jel chʼuʼuy jawa kʼujolexi. Pe ja ajyi* mini jachukuk.
9 Ja keʼn wa xkalawabʼyex: spetsanil ja maʼ wa skʼutsu ja snupanel, pe mi yuj koʼ mulal ja xcheʼum sok ixuk winik,* sok xnupanisok pilan wani xchʼaykʼujolan ja nupaneli».
10 Jaxa nebʼumaniki yalawe: «Ta jachkʼa wa xtax jun winik soka xcheʼumi, mas lek mok maʼ nupanuk».
11 Ja yeʼn yala: «Mi yibʼanaluke wa xbʼobʼ yawe kʼotuk ja yaljelik it, kechan ja matik ayiʼoje ja doni.
12 Jujuntik mi xbʼobʼ nupanuke* yujni jach pojkiye.* Jaxa tuki mi xbʼobʼ nupanuke yujni ay jas kʼulubʼalyile yuja winike. Sok jaxa tuki mi xnupaniye yuja Gobyerno bʼa satkʼinali. Ja maʼ oj bʼobʼ lajxukyuj ja it, a-skʼuluk».
13 Anto tixa ijijanyi jujuntik yal untik bʼa oj yayi kajan ja skʼabʼi* sok bʼa oj yayi orasyon. Pe utjiye yuja nebʼumaniki.
14 Pe ti yala ja Jesusi: «Aktayikan ja yal untiki. Moka leʼex modo stimjel bʼa oj mojxuke jmok, yujni ja Gobyerno bʼa satkʼinali yeʼn sbʼaje ja matik jachuke jastal yeʼnle».
15 Tsaʼan tixa yaʼa kajan ja skʼabʼ bʼa yeʼnle sok tixa el ja tiwi.
16 Anto tixa mojxi jun winik sok sjobʼoyi: «Maestro, ¿jastik lek tʼilan oj jkʼuluk bʼa oj jtaʼ ja sakʼanil bʼa tolabida?».
17 Jaxa yeʼn yala yabʼi: «¿Jas yuj keʼn waxa jobʼoki sbʼaja jas leki? Kechani june ja maʼ leki. Pe yujkʼa waxa kʼana oja taʼ ja sakʼanili, tʼilani oja kʼuʼuk tolabida ja mandariki».
18 Ja yeʼn sjobʼo: «¿Jastik mandarik?». Jaxa Jesús sjakʼa: «Mok milwanan, moka chʼaykʼujoluk ja nupanel, mok elkʼanan, moka leyi lom smul ja tuki,
19 kisa jawa tat sok jawa nani, sok yajtay jawa moji jastal waxa yajtabʼaj ja weʼni».
20 Ja keremi yala: «Ja keʼn tolabida jkʼuʼunej yibʼanal ja jastik jaw. ¿Jasa wanto skʼanakuji?».
21 Jaxa Jesusi ti sjakʼayiʼa: «Ta waxa kʼana mi jas oj skʼulukawuj palta,* kax chono ja jasa wiʼoji sok ayi ja takʼin ja matik pobre; jachuk oj ajyukawuj jastik junuk jel chaʼanyabʼal ja bʼa satkʼinali. Ti la jaka sok kʼotan jnochuman».
22 Yajni yabʼ ja it, ja keremi jel triste waji, yujni jel yiʼoj jitsan jastik sbʼaj.
23 Anto ja Jesús tixa yala yabʼ ja snebʼumaniki: «Wa xkalawabʼyex meran lek: jelni wokol bʼa jun riko oj ochuk ja bʼa Gobyerno bʼa satkʼinali.
24 Wa xkalawabʼyex yajkʼachil ekʼele: masni pasil oj ekʼuk jun camello bʼa sjotol jun tsʼistakʼin ke yuj jun riko oj ochuk ja bʼa sGobyerno ja Dyosi».
25 Yajni yabʼye ja jaw ja nebʼumaniki, jel ochkan juntiro spensare sok yalawe: «Anto, ¿machunkiluk oj bʼobʼ staʼ sakʼanil?».
26 Ti kan kʼeljuke lek yuja Jesús sok aljiyabʼye: «Sbʼaja kristyano mini tʼun oj bʼobʼuka, pe sbʼaja Dyosi yibʼanal wa xchʼak bʼobʼuk».
27 Anto ja Pedro sjakʼayi: «¡Kʼela! Ja keʼntikoni kaʼunejtikonkan spetsanil bʼa oj jnochatikon. ¿Jasa oj ajukitikoni?».
28 Jaxa Jesusi yala: «Wa xkalawabʼyex meran lek: yajni xkʼulaxi yajkʼachil yibʼanal ja jastik junuki sok ja Yunin ja Winiki* xkulani ja bʼa strono xlijpixta, ja weʼnlex matika nochunejonex, oj kulananik bʼa 12 trono sok oj kʼotanik juesik ja bʼa 12 kʼole bʼa Israel.
29 Sok spetsanil ja maʼ yaʼunejkan snaj, yermanoʼik, yermanaʼik, stat, snan, yuntikil ma yalaje yuja jbʼiʼili ojni ajukyile 100 ekʼele mas sok ojni ajukyile ja sakʼanil bʼa tolabida.
30 Pe jitsan ja matik bʼajtane oj kanuke tsaʼan, sok jitsan ja matik tsaʼane oj ekʼuke bʼajtan».
Notaʼik
^ Ja yaljel it ja bʼa griego wa stojolan ajyel nokʼan lek jastal jun pegamento.
^ Ma «bʼa skʼeʼulabʼili».
^ Ja bʼa griego, pornéia. Kʼela ja bʼa Yaljelik cholubʼal, Koʼel mulal sok ixuk winik.
^ Jach kanel ja bʼa griego: «eunuco». Kʼela ja bʼa Yaljelik cholubʼal, Eunuco.
^ Ma «manxiye».
^ Wa xkʼan alxuk, bʼa oj ya koʼyi slekilale.
^ Jach kanel ja bʼa griego: «tsʼikan oj ajyan».
^ Kʼela ja bʼa Yaljelik cholubʼal.
