Mateo 6:1-34
-
JA LOʼIL BʼA WITSI (1-34)
-
Moka kʼuluk ja jas toj bʼa kechan oj iljan (1-4)
-
Jastal yajelyi orasyon (5-15)
-
Ja orasyon sjeʼa ja Jesusi (9-13)
-
-
Ja stekʼjel waʼin (16-18)
-
Ja jastik jel chaʼanyabʼal ja bʼa luʼum sok ja bʼa satkʼinal (19-24)
-
«Awikxakan ja jastal wa xchama kʼujolex» (25-34)
-
«Moka wawexkan yajel bʼajtan bʼej ja sGobyerno ja Dyosi» (33)
-
-
6 «Talnabʼajik bʼa moka kʼulukex ja jas toj ja bʼa stiʼ sat ja kristyano bʼa kechan oj yil-e. Yujni ta jach akʼulanex, jawa Tatex tey bʼa satkʼinali mini oj yawilex juna tsʼakolex.
2 Yajni xa koltay june maʼ ay snesesida,* moka puk ekʼ* jastalni wa skʼulane ja bʼa naʼitsik wa stsomo sbʼaje sok ja bʼa calleʼik ja matik chabʼ kara ayeʼi bʼa oj toyjuke yuja tuki. Wani xkalawabʼyex: ja yeʼnleʼi ajitayile yibʼanal ja stsʼakoleʼi.
3 Pe ja weʼn, yajni xa koltay june maʼ ay snesesida, ja jas wa skʼulan ja stojola kʼabʼi mok snaʼ jawa surda;
4 jachuk, mini maʼ oj snaʼ ja jastal waxa koltay ja matik ay snesesida. Jaxa wa Tat ja maʼ kechan yeʼn wa xyilawa, oj stupawi.
5 Chomajkil, yajni xa wawexyi orasyon, moka kʼulukex jastal ja matik chabʼ kara ayeʼi. Ja yeʼnleʼi jel xyiʼaje gusto yajelyi orasyon tekʼan ja bʼa naʼitsik wa stsomo sbʼaje sok ja bʼa xchikin ja niwak bʼeji bʼa oj iljuke yuja tuki. Wani xkalawabʼyex: ja yeʼnleʼi ajitayile yibʼanal ja stsʼakoleʼi.
6 Pe ja weʼn, yajni xa wayi orasyon, ochan bʼa wa kuarto, sok yajni alututa ja puerta, ayi orasyon jawa Tat mi xbʼobʼ ilxuki. Jaxa wa Tat ja maʼ kechan yeʼn wa xyilawa, oj stupawi.
7 Yajni xa wayi orasyon, moka wal ja junxta yaljelik kada ekʼele jastalni wa skʼulane ja kristyanoʼik ja bʼa tuk chonabʼiki, pes ja yeʼnleʼi wa skʼuʼane oj maklajuke yuja jel najat xyaweyi ja yorasyoneʼi.
8 Mok jach akʼulukex ja weʼnlexi. Pes jawa Tatexi wanxani snaʼa ja jas wa xmakuni awujilex bʼajtantoyuj oja kʼanexyi.
9 Ja weʼnlexi tʼilan jach oja wawexyi orasyon:
‹JTatikon teya bʼa satkʼinal, aʼaxuk sakbʼuk* jawa bʼiʼili.
10 Ajakuk jawa Gobyerno. Akʼulaxuk ja jas waxa kʼana ja bʼa luʼumi, jastalni wan kʼulaxel ja bʼa satkʼinali.*
11 Akitikon ja jwaʼeltikon ja bʼa kʼakʼu iti,
12 sok aʼa perdon ja jmultikoni* jastalni kaʼunejtikon perdon ja matik ay smule jmoktikoni.*
13 Mok wa kokotikon luʼum yajni x-aji ochkotikon probari sok aʼelkotikon libre* sbʼaja Maʼ jel malo›.
14 Yujni ta waxa waʼawex perdon ja matik ay smule amokexi, jawa Tatex bʼa satkʼinali ojni cha yaʼex perdona.
15 Pe ta mixa waʼawex perdon ja matik ay smule amokexi, jawa Tatexi mini oj cha ya perdon jawa mulexi.
16 Yajni xa tekʼawex waʼin, moka jeʼex triste ay jawa satexi jastalni wa skʼulane ja matik chabʼ kara ayeʼi, yujni ja yeʼnleʼi wa sjomowe-el ja sniʼ sate* bʼa oj iljuke yuja tuk bʼa wane stekʼjel waʼin. Wani xkalawabʼyex: ja yeʼnleʼi ajitayile yibʼanal ja stsʼakoleʼi.
17 Pe ja weʼn, yajni xa tekʼa waʼini, ayi aseyte bʼa jel x-ajbʼani yikʼil jawa olomi sok sakʼa jawa sati
18 bʼa mi oj yil ja kristyano wana stekʼjel waʼin, kechani ayil jawa Tat mi xbʼobʼ ilxuki. Jaxa wa Tat ja maʼ kechan yeʼn wa xyilawa, oj stupawi.
19 Aʼawikan stsomjel jastik junuk jel chaʼanyabʼal ja bʼa luʼumi, pes wani xchakal kuxaxi, wa x-och xojil sok wa x-ochye elkʼanumik.
20 Masni lek, tsomowik jastik junuk jel chaʼanyabʼal ja bʼa satkʼinali, pes ja tiw mini xchakal kuxaxi, mi x-och xojil sok mi x-ochye elkʼanumik.
21 Yujni jawa kʼujoli tini oj ajyuk ja bʼay ja jastik junuk jel chaʼanyabʼalil awuji.
22 Jawa sati jani yijlabʼ jawa kuerpo. Ta june ita ja jas wa xwaj skʼujol yiljel jawa sati, ojni lijpuk* yibʼanal jawa kuerpo.
23 Pe ta jel imbidioso* jawa sati, kʼikʼni oj ajyuk yibʼanal jawa kuerpo. Ta ja jasa wiʼoji kechan kʼikʼinal sok mi ijlabʼuk, ¡jelxelxa ja kʼikʼinal ay jawa kuerpo!
24 Mini maʼ xbʼobʼ ajyuk mosoʼil bʼa chabʼ ajwalal, yujni oj yilkʼujoluk june sok oj syajtay ja juni, ma oj ajyuk toj sok june sok mi oj skis ja juni. Ja weʼnlexi mi xbʼobʼ ajyanik smoso ja Dyosi sok cha smosoʼil ja Takʼini.
25 Ja yuj wa xkalawabʼyex: awikxakan ja jastal wa xchama kʼujolex yuja wa sakʼanilex sbʼaja jas oja wabʼyexi sok oja wuʼexi; ma yuja wa kuerpoʼexi sbʼaja jas oja lap-exi. Pes ¿mi maʼ masto baleʼuk ja sakʼanil yuja waʼelali sok ja kuerpoʼal yuja kʼuʼali?
26 Ochan kʼelawik lek ja yal chaniki. Ja yeʼnleʼi mi stsʼunbʼaniye sok mi stsomowe bʼa oj snol-e bʼa tsʼulubʼ, pe wani xmakʼlajiye yuja wa Tatex bʼa satkʼinali. Sok ¿mi maʼ mas baleʼukex ja weʼnlex yuja yeʼnleʼi?
27 ¿Machʼa ja bʼa weʼnlexi, yuja chamkʼujol ayi, wa xbʼobʼ ya najatbʼuk jun xujkubʼal ja sakʼanili?
28 Chomajkil, ¿jas yuj wa xchama kʼujolex yuja kʼuʼali? Nebʼawik sbʼaja jastal wa xkʼiye ja yal nichimaltik bʼa yoj jobʼi. Mi xchʼaka sbʼaje aʼtel sok mi sjalawe skʼuʼe.
29 Pe ja keʼn wa xkalawabʼyex: anima ja Salomón ajyiyuj jitsan jastik jel tsamal, mini bʼa skʼutes sbʼaj jastal june bʼa yeʼnle.
30 Anto, ta jach wa skʼutes ja Dyos ja yal kʼulik bʼa yoj jobʼi, bʼa tey il ja wego jaxa jecheli wa xjipji bʼa yoj kʼakʼ, ¿mi maʼ masni oj skʼutesex ja weʼnlex bʼa jel tʼusan xa kʼuʼanex?
31 Ja yuj nunka mok chamuka kʼujolex sok yaljel: ‹¿Jasa oj kabʼtiki?›, ma ‹¿Jasa oj kutiki?›, ma ‹¿Jasa oj jlaptiki?›.
32 Yujni ja matik jel xwaj skʼujole slejel yibʼanal ja jastik junuk it, jani ja kristyanoʼik bʼa tuk chonabʼiki.* Jawa Tatex bʼa satkʼinali wa snaʼa wani xmakuni awujilex yibʼanal ja jastik it.
33 Ja yujil, moka wawexkan yajel bʼajtan bʼej ja sGobyerno ja Dyosi sok ja jastik toj yaʼunej kulani, anto ja Dyosi oj yawilex yibʼanal ja jastik junuk jaw.
34 Ja yuj nunka mok chamuka kʼujolex sbʼaja jecheli, yujni ja jecheli pilan chamkʼujolik oj yijani. Malansok ja wokolik bʼa kada kʼakʼu».
Notaʼik
^ Ma «Yajni xa waʼa majtanalik bʼa yajulal kʼujol».
^ Jach kanel ja bʼa griego: «moka juʼekʼ trompeta».
^ Ma «aʼilxuk chaʼanyabʼal», «aʼilxuk sak».
^ Ma «Akʼulaxuk ja jas waxa kʼana ja bʼa satkʼinali sok cha jachuk ja bʼa luʼumi».
^ Jach kanel ja bʼa griego: «ja jeltikoni».
^ Jach kanel ja bʼa griego: «ay sjele jmoktikon».
^ Ma «koltayotikon».
^ Ma «ja splantaʼe».
^ Ma «ojni bʼutʼuk ijlabʼ».
^ Wa xkʼan alxuk, ta waxa leʼa jitsan jasunuk. Jach kanel ja bʼa griego: «malo».
^ Wa xkʼan alxuk, ja matik mi xyaʼteltaye ja Dyosi.
