Mateo 7:1-29
7 «Awikxakan skʼulajel jusgar ja tuk bʼa jachuk mi oj cha kʼulajananik jusgar.
2 Yujni ja jastal waxa kʼulanex jusgar ja tuki jachni oj cha kʼulajananik jusgar ja weʼnlexi, sok ja jastal waxa bʼisawexyi ja tuki jach oj cha sbʼisawilex ja weʼnlexi.
3 ¿Jas yuj waxa kʼela ja xchʼijbʼenil teʼ ja bʼa sat jawa wermano pe mi xwaja sat ja sbigasil yiʼoj jawa bʼaji?
4 ¿Sok jastal modo oja walyabʼ jawa wermano ‹majlay oj ka eluk ja xchʼijbʼenil teʼ ja bʼa wa sati› yajni jawa bʼaji ayiʼoj jun bigas?
5 ¡Ja weʼn bʼa chabʼ kara aya! Aʼel bʼajtan ja sbigasil jawa sati sok jachuk oja wil lek jastal oj wa elyi ja xchʼijbʼenil teʼ ja bʼa sat jawa wermano.
6 Moka wawexyi ja tsʼiʼi ja jastik sbʼaj ja Dyosi. Cha mokni ajipexyi ja chitamik jawa perlaʼexi,* bʼaxama lek sbʼatalane, sok xkʼe bʼakana bʼajex sok syajbʼesex.
7 Moka waʼexkan skʼanjel sok ojni ajukawilex, moka waʼexkan slejel sok ojni ataʼex, moka waʼexkan skʼojtsijel ja puerta sok ojni jamjukawilex.
8 Yujni spetsanil ja maʼ wa skʼana wani x-ajiyi, sok spetsanil ja maʼ wa sleʼa wani staʼa, sok spetsanil ja maʼ wa skʼojtsin ja puerta ojni jamjukyiʼa.
9 Ta jawa keremex skʼanawilex pan, ¿machun bʼa weʼnlex wa xyayi jun ton?
10 Sok ta skʼanawilex jun chay, ¿anke mini oja wawexyi jun bʼitsʼbʼichan?
11 Ja yujil, ta ja weʼnlexi, ama jel maloʼex, waxa wawexyi lekil majtanalik jawa wuntikilexi, ¡jaʼuktoma jawa Tatex tey bʼa satkʼinal mi oj yayi jastik junuk lek ja matik ay jas wa skʼanaweyiʼi!
12 Ja yujil, kʼulanikyi ja tuk yibʼanal ja jas waxa kʼana oj skʼulukawilex ja weʼnlexi. Iday, jani it ja jas wa sjeʼa ja Ley sok ja jas yalawe ja Alumaniki.
13 Ti la ochyex bʼa chʼin puerta. Yujni ja bʼa niwan puerta sok ja bʼa niwan bʼeji tini wa x-ikʼwani och bʼa chʼakelal, sok jelni jitsan ja matik wa x-ochye ja bʼa puerta jaw;
14 jaxa bʼa chʼinil puerta sok ja bʼa latsʼan bʼeji tini wa x-ikʼwani och bʼa sakʼanil, sok jel tʼusane ja matik wa staʼa.
15 Talnabʼajik soka alumanik mi meranuki, bʼa wa xmojxi amokex sok skʼutunej sbʼaje jastal chej pe ja bʼa yojoleʼi kʼotele jastal kʼakʼal loboʼik.*
16 Oja naʼex sbʼaj yuja jastal wa satiniyeʼi. ¿Anke mini maʼ xbʼobʼ stul uvaʼik ja bʼa mal kʼuliki ma higoʼik ja bʼa kʼiʼixaltiki?
17 Junxtani soka it, jun lekil teʼ wani xyaʼa lekil sat, pe jun kʼaʼel teʼ mini xyaʼa lekil sat.
18 Jun lekil teʼ mini xbʼobʼ ya sat bʼa mi lekuk sok jun kʼaʼel teʼ mini xbʼobʼ ya lekil sat.
19 Spetsanil teʼ bʼa mi xyaʼa lekil sat wani xkʼutsxi-el sok wa xjipxi bʼa yoj kʼakʼ.
20 Ja yuj ojni anaʼex sbʼaj ja winike jaw yuja jastal wa satiniye.
21 Mi yibʼanuluke ja maʼ wa xyalakabʼ ‹Kajwal, Kajwal› oj ochuke ja bʼa Gobyerno bʼa satkʼinali. Kechani oj ochuke ja matik wa skʼulan ja jas wa skʼana ja jTat tey bʼa satkʼinali.
22 Ja bʼa kʼakʼu jaw, jitsan oj yal-e kabʼ: ‹Kajwal, Kajwal, ¿mi maʼ ochtikon jastal alumanik yuja wa bʼiʼili sok katikon el pukujik yuja wa bʼiʼili sok jkʼulantikon jitsan milagroʼik* yuja wa bʼiʼili?›.
23 Anto tixa oj kalyabʼyeʼa: ‹¡Ja keʼn mini nunka jnaʼa bʼajex! ¡Jitsanik ja bʼa jtsʼeʼeli, ja weʼnlex matik waxa kʼokowex ja leyi!›.
24 Ja yujil, spetsanil ja maʼ wa smaklay ja jas kaluneji sok wa skʼulan jachni oj kʼotuk jastal ja winik wa spensaraʼan leki. Ja yeʼn ti ya kʼeʼuk ja snaj bʼa ton.
25 Jak ja jaʼi, kajpuji ja jaʼi, jak jun tsatsal ikʼ sok smakʼa ja naʼits jaw, pe mini mokʼi, yujni tsʼunan lek ja bʼa toni.
26 Pe spetsanil ja maʼ wa smaklay ja jas kaluneji pe mi wa skʼulan jachni oj kʼotuk jastal ja winik jel sonsoʼi. Ja yeʼn ti ya kʼeʼuk ja snaj bʼa arena.
27 Jak ja jaʼi, kajpuji ja jaʼi, jak jun tsatsal ikʼ sok smakʼa ja naʼits jaw, jaxa naʼitsi mokʼi sok jomel lek kani».
28 Yajni chʼak yal ja jastik it ja Jesusi, ja kristyano jumasaʼ jel ochkan spensare yuja jastal wa sjeʼa
29 yujni sjeʼayile jastal jun winik bʼa akʼubʼalyi xchol yuja Dyosi sok mi jachukuk jastal ja sjeʼumane bʼa leyi.
Notaʼik
^ Jun yal ton jel chaʼan stsʼakol sok ti wa xkʼi bʼa yojol jun tikʼe xoch bʼa yoj mar.
^ Ja it jun kʼakʼal chante sok oj slajtik ja okʼili.
^ Ma «jitsan jastik jel chaʼanyabʼalil».
