Romanos 1:1-32
1 Ja skarta ja Pablo, ja smoso ja Kristo Jesús sok tsaʼubʼal bʼa kʼotel jekabʼanum, sok tsaʼubʼal bʼa xcholjel ja lekil rasonik bʼa Dyos,
2 ja Dyos skʼapunejxa bʼajtan yuja yalumanik ja bʼa Yabʼali
3 sok wa staʼa tiʼal sbʼaja Yunini. Ja yeʼn ti el bʼa yintil David jastal kristyano,
4 pe yuja yip ja Dyosi,* alji kʼotel Yunin Dyos ja yajni aji sakʼwuk ja bʼa chamwiniki (jachukniʼa, ja Kajwaltik Jesukristo,
5 stsʼakatal ja yeʼn wa xjejikitik lekil kʼujolal mi xbʼajintik. Sok stsaʼawon bʼa kʼotel jekabʼanumil bʼa jachuk ja kristyanoʼik bʼa yibʼanal ja chonabʼiki oj bʼobʼ ajyuke kʼuʼabʼal yuja skʼuʼajeli bʼa stoyjel ja sbʼiʼili,
6 sok ja bʼa chonabʼik jaw tini payjiyexjan ja weʼnlexi bʼa jachuk oj sbʼajukex ja Jesukristo).
7 Wa stsʼijbʼanawilex awibʼanalex ja matik tey bʼa Roma bʼa wa xyajtajiye sok tsaʼubʼalexa sbʼaja Dyosi:
Ja jTatik Dyos sok ja Kajwaltik Jesukristo ayawilex ja lekil skʼujole mi xbʼajintik sok ja slamanile.
8 Pe bʼajtan, wa xkayi tsʼakatal ja jDyos yuja Jesukristo yuj awibʼanalex ja weʼnlexi, yujni bʼa yibʼanal ja luʼumkʼinali wa xtaji tiʼal ja skʼuʼajela wiʼojexi.
9 Pes ja Dyos, ja maʼ wa xkaʼteltay sok spetsanil jkʼujol* bʼa xcholjel ja lekil rasonik sbʼaja Yunini, yeʼnani jtestigo bʼa mi la axwiyon stajelex tiʼal tolabida ja bʼa korasyoni,
10 sok wani xkʼana, ta oj bʼobʼuki sok ta wa skʼana ja Dyosi, ojxa waj kulatayex.
11 Jelxa xkʼana oj kilex bʼa oj kawilex jun majtanal jakel bʼa Dyos bʼa jachuk oj stsatsankʼujolukex,
12 ma bʼa oj jtsatsankʼujoluk jbʼajtik yuja skʼuʼajel kiʼojtiki, tanto jawa bʼajexi sok ja jbʼaji.
13 Pe wani xkʼana oja naʼex, kermano jumasaʼ, jitsan ekʼele kala oj waj kilex bʼa jachuk oj kil sat ja kaʼtel ja tiw jastalni bʼa tuk chonabʼik, pe man ora ay jas wa stimawon bʼa oj wajkon.
14 Ayni jel soka griegoʼiki sok ja matik ti sbʼaje bʼa pilan país,* tanto matik bibo sok matik mi biboʼuk.
15 Ja yuj cha jel xkʼana oj jcholawabʼyex ja lekil rasonik ja bʼa Roma.
16 Yujni mi la kʼixwiyon yuja lekil rasoniki. Ja smeranili, jani ja yip ja Dyos bʼa skoltajel yibʼanal ja matik ayiʼoj skʼuʼajeli, jaʼ bʼajtan ja judío sok cha jachuk ja griego.
17 Yujni ja matik ayiʼoj skʼuʼajeli wa xyilawe ja stojil ja Dyosi stsʼakatal ja lekil rasoniki, jaxa iti wa xya tsatsbʼuk ja skʼuʼajeleʼi, jastalni tsʼijbʼunubʼal: «Pe ja maʼ toji oj ajyuk sakʼan yuja skʼuʼajel yiʼoji».
18 Jachukniʼa, ja stajkelal ja Dyosi ti wa xchijkaji man satkʼinal sbʼaja matik mi kʼuʼabʼal ayuke sok mi toj ayuke soka Dyosi. Ja yeʼnleʼi wa skʼulane jastik mi tojuk bʼa stimjel oj kʼiʼuk ja smeranili,
19 pes ja jas wa xbʼobʼ naxuk sbʼaja Dyosi tini ay bʼa stiʼ sate, yujni jeʼubʼalyile jaman lek yuja Dyosi.
20 Yujni ja smodoʼik mi x-ilxi, cha jachuk ja yip mey stikʼanil sok ja jastal wa sjeʼa bʼa yeʼn ja meran Dyosi, wa x-ilxi jaman lek man kʼulaji ja luʼumkʼinali, pes wa xkʼot naxuk yuja jastik kʼulubʼali, ja yuj ja yeʼnleʼi mi xbʼobʼ yal-e mi snaʼawe sbʼaj.
21 Ama wa snaʼawe sbʼaj ja Dyosi, mini yaweyi stoyjel jastal sDyose sok mini yaweyi tsʼakatal, pes ja spensareʼi mixa xmakuni sok jaxa skʼujole bʼa jel sonso mixa x-och abʼal.
22 Ama wa xyalawe jel biboʼe, paxyeta sonsoʼil
23 sok stukbʼese ja stoyjelal ja Dyos ja maʼ mi xchami yuj jun jasunuk bʼa oj slaj ja splanta ja winik bʼa wani xchami, sok bʼa chanteʼik wa xjujpi, bʼa ay chane yok sok bʼa wa sbʼitsʼitsʼi.
24 Ja yujil, soka jastik wa xkʼankʼuniyuj ja skʼujoleʼi, kʼulajiye entregar yuja Dyos sbʼaja jastik kuxi, sok jaxa yeʼnleʼi skʼulane jastik kʼixwela sbʼaj soka skuerpoʼeʼi.
25 Ja yeʼnleʼi stukbʼese ja smeranil bʼa Dyos yuj abʼalik, sok jaʼ stoyowe sok yaʼteltaye ja jastik kʼulubʼali ke yuja Kʼulumani, ja it maʼ wa xtoyji bʼa tolabida. Amén.
26 Ja yuj kʼulajiye entregar yuja Dyos bʼa kʼankʼunel koʼel mulal sok ixuk winik bʼa jel kʼixwela sbʼaj, yujni ja ixukeʼi stukbʼese ja jastal wa staʼa sbʼaje sok jun winik yuj tuk jastik junuk bʼa mi jach kʼulajiye yuja Dyosi.
27 Cha junxtani skʼulane ja winikeʼi, ja yeʼnleʼi yaʼawekan stajel sbʼaje soka ixukeʼi, och kʼankʼunukyujile smoj winikile sok skʼulane jastik kistal soka smoj winikileʼi, sok jaxa yeʼnleʼi yiʼaje tsʼikan lek ja kastigo bʼa wani sbʼajine yuja smuleʼi.
28 Pe yuja mi kʼan snaʼe sbʼaj ja Dyosi, kʼulajiye entregar yuja Dyos bʼa jun tikʼe pensar mi lek xyila ja yeʼn bʼa skʼulajel jastik mi lekuk.
29 Ja yeʼnleʼi puro mi tojuk ja jastik skʼulaneʼi, bʼa jastik mi lekuk, bʼa okʼel kʼujolal sok bʼa malo; jel ajyiyujile imbidia, milwaniye, kʼeye tiro, loʼlaniye sok skʼulaneyi bʼa mi lekuk ja tuki; loʼiltaniye
30 sok abʼaltaniye; yilkʼujolane ja Dyosi; jel kalaxe, jel niwan yaʼa sbʼaje sok jel stoyo sbʼaje; xchapawe jastik mi lekuk, mi kʼuʼabʼal ajyiye soka snan stateʼi,
31 mini jas yabʼye stojol, mi yawe kʼotuk ja yakuerdoʼe, mi yaj ilwaniye sok mini maʼ snaʼaweyi syajulal.
32 Ama ja yeʼnle wa snaʼawe sbʼaj lek ja tojil smandar ja Dyosi, wa xkʼan alxuk, ke wa snaʼawe wani sbʼajine oj chamuke ja matik wa skʼulane ja jastik jaw, ja yeʼnleʼi mi kechan wane skʼulajel, cha jelni lek xyilawe ja matik wane skʼulajeli.
Notaʼik
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «ja matik mi griegoʼuke».
