Romanos 13:1-14
13 Spetsanile aʼajyuke kʼuʼabʼal soka matik ay chaʼan xcholeʼi, yujni ja ipal yiʼoje ja yeʼnleʼi tini wa xjak bʼa Dyos; ja matik ay xcholi ayiʼoje tuktukil yaʼtele yuja spermiso ja Dyosi.
2 Ja yujil, ja maʼ wa skontraʼan ja matik ay xcholi ochtani kontra soka jas yaʼunejkan kulan ja Dyosi; ja matik ochyeta kontra soka jas akʼubʼalkan kulani ojni kʼanjukyile kuenta.
3 Ja matik wa skʼulane jastik leki mini xiwyeyuj ja matik wane yajel mandari, pe ja matik wa skʼulane jastik malo wani xiwye. ¿Wan maʼ xa kʼana mi oj xiwan yuja matik ay xcholeʼi? Anto moka wakan skʼulajel ja bʼa jas leki sok jaxa yeʼnleʼi ojni stoya,
4 pes ja yeʼnleʼi yaʼtijume Dyos bʼa wa lekilal. Pe xiwanxa ta wana skʼulajel jastik malo, yujni ja matik ay xcholi ayiʼoje ipal* bʼa kʼulwanel kastigar, sok mi lomuk yiʼoje. Ja yeʼnleʼi yaʼtijume Dyos bʼa skʼulajel kastigar sok bʼa yajel stup ja matik wa skʼulane jastik malo.
5 Ja yujil, tʼilani oj ajyanik kʼuʼabʼal, sok mini jaʼukta yuja kastigo, cha jani yuja wa concienciaʼexi.
6 Ja yuj ja weʼnlexi cha wani xa tupuwex kontribusyon, yujni ja yeʼnleʼi wa x-aji makunuke yuja Dyosi bʼa jachuk kʼakʼu kʼakʼu wa skoltaye ja kristyano.
7 Awikyi yibʼanale ja jastik tʼilan oj axukyileʼi: ja maʼ wa skʼana kontribusyoni, awikyi ja kontribusyoni; ta ja gobyerno wa skʼana oja tupexyi, tupuwikyi; ja maʼ wa skʼana oja kʼuʼukexyi, kʼuʼanikyi; ja maʼ wa skʼana oja kisexi, kisawik.
8 Moka jelex ja jas mi xbʼobʼa tupexi, pe tʼilani oja yajtabʼajex; pes ja maʼ wa syajtay ja smoji skʼulunejni ja jas wa skʼana ja leyi.
9 Yujni ja mandarik, «moka chʼaykʼujoluk ja nupaneli, mok milwanan, mok elkʼanan, mok okʼuka kʼujol ja jas yiʼoj jawa moji» sok chikan jas tuk mandar, wa x-alxi bʼa tʼusanta yaljel: «Yajtay jawa moji jastalni waxa yajtabʼaj ja weʼni».
10 Ja yajalkʼujolali mini skʼulanyi bʼa jas malo ja jmojtiki. Ja yujil, ja yajalkʼujolali wani skʼulan ja jas wa skʼana ja leyi.
11 Cha kʼulanik ja it yujni ja weʼnlexi waxa naʼawex sbʼaj jas tyempo wala taxtik. Wani xa naʼawex yoraʼilxa oj kʼeʼanik ja bʼa jastal wanex wayeli, yujni ja jkoltajeltiki masni jelxa mojan ja wego ke yuja yajni ochtik kʼuʼumanili.*
12 Ojxtani ekʼuk ja akwali; ojxtani eljul ja kʼakʼu jaw. Ja yuj la katik eluk ja jastik bʼa kʼikʼinali sok la jlaptik ja armaʼik yiʼoj ja ijlabʼi.
13 Tojxtani la ajyukotik jastal bʼa satkʼakʼu; mok jkʼuluktik kʼinik bʼa jelxelxa sok mok yakbʼukotik, mok kokotik mulal sok ixuk winik sok mini bʼa kistal modoʼalik bʼa jel kʼixwela sbʼaj,* mok tiroʼanukotik sok mok ajyukujtik imbidia.
14 Mas lek, nochowikyi ja smodo ja Kajwaltik Jesukristo sok mok jasa chapex bʼa skʼulajel ja jas wa xkʼankʼuniyuj ja bʼakʼtelali.
Notaʼik
^ Jach kanel ja bʼa griego: «espada».
^ Ma «kreyenteʼili».
^ Ja bʼa griego, asélgueia. Kʼela ja bʼa Yaljelik cholubʼal, Kistal modoʼal jel kʼixwela sbʼaj.
