Romanos 14:1-23
14 Kʼulanik resibir gusto ja matik mi tsatsuk ay ja skʼuʼajel yiʼojeʼi, pe moka kʼulukex jusgar ja jastal tuktukil wa xpensaraxi.*
2 Bʼobʼta ja winik maʼ ayiʼoj skʼuʼajeli wa xyabʼ chikan jasa pe jaxa maʼ mi tsatsuk ay ja skʼuʼajeli kechan wa xyabʼ itaj.
3 Ja maʼ wa xwaʼi mokni yijnay ja maʼ mi xwaʼi, jaxa maʼ mi xwaʼi mok skʼul jusgar ja maʼ wa xwaʼi, yujni ja Dyosi skʼulunej recibir gusto lek.
4 ¿Machunkiluka ja weʼn bʼa skʼulajel jusgar ja yaʼtijum jawa moji? Yeʼnani oj yil ja yajwal ta oj ajyuk tekʼan ma oj koʼ luʼum. Iday, ja yeʼn ojni ajyuk tekʼan yujni wa xbʼobʼ ya ajyuk tekʼan ja Jyoba.*
5 Jun winik masni chaʼanyabʼalil wa xyila jun kʼakʼu ke yuja tuk kʼakʼuji, jaxa juni junxta wa xyila yibʼanal ja kʼakʼujiki. Kada jujune a-skʼuʼuk lek ja bʼa jas spensaraʼanta skʼulajeli.
6 Ja maʼ wa stalna ja kʼakʼuji jani wa stalna yuja Jyoba.* Junxtani soka it, ja maʼ wa xwaʼi jani wa skʼulan yuja Jyoba,* pes wani xyayi tsʼakatal ja Dyosi. Jaxa maʼ mi xwaʼi cha jani wa skʼulan yuja Jyoba,* pe cha wani xyayi tsʼakatal ja Dyosi.
7 Iday, mini june sakʼan kechan bʼa yeʼn mismo sok mini june wa xcham kechan bʼa yeʼn mismo.
8 Yujni ta sakʼanotik, sakʼanotik sbʼa Jyoba,* sok ta chamtik, wala chamtik sbʼa Jyoba.* Ja yuj tak, ta sakʼan aytik ma ta ti chamtik, yeʼnani sbʼajotik ja Jyoba.*
9 Yujni cham ja Kristo sok cha sakʼwi yuja it: bʼa oj kʼot Ajwalal tanto bʼa matik chamel sok bʼa matik sakʼan.
10 Pe ¿jas yuj waxa kʼulan jusgar jawa wermano? Ma ¿jas yuj waxa wijnay jawa wermano? Pes kibʼanaltik ti oj ajyukotik tekʼan bʼa stiʼ skujlayubʼ ja Dyosi.
11 Yujni tsʼijbʼunubʼal: «‹Jastalni meran lek sakʼan ayon›, jach wa xyala ja Jyoba,* ‹yibʼanale oj koʼuke mekʼan bʼa stiʼ jsat sok yibʼanal ja kristyano oj snaʼe jaman lek ke ja keʼn kʼotelon Dyos›».
12 Ja yuj kada jujune oj katikyi kuenta ja Dyos ja bʼa jas jkʼulantiki.
13 Ja yuj tak, laxa katikan ja skʼulajel jbʼajtik jusgari. Mas lek, laxa kaʼ jkʼujoltik bʼa mok katik slok yok jun kermanotik sok mok jpiltik ja bʼa skʼuʼajel yiʼoji.
14 Tʼabʼani ay jkʼujol sok jkʼuʼunej lek bʼa Kajwaltik Jesús ke mini jun jasunuk kux ay. Kechan yajni jun winik wa xyila kʼotel kux jun jasunuk, anto bʼa yeʼna kʼotelni kux.
15 Ja yujil, ta waxa yajbʼes jawa wermano yuja jas waxa wabʼi, mixani teyuka bʼa sbʼejlalil ja yajalkʼujoli. Mokni ajom* soka jas waxa wabʼ ja maʼ cham yuja Kristo.
16 Ja yuj tak, moka waʼexkan bʼa oj tajuk tiʼal malo ja jas lek waxa kʼulanexi.
17 Yujni ja sGobyerno ja Dyosi mini ti chʼikan soka waʼeli sok ja yujeli, pes jani ti chʼikansok ja bʼa jas toji, ja lamanili sok ja gustoʼil yuja yip ja Dyosi.*
18 Pes chikan maʼ jach wa xyaʼteltay ja Kristo jastal mosoʼal wani xya gustoʼaxuk ja Dyosi sok lekni wa x-ilji yuja kristyano.
19 Ja yuj mok katikan slejel ja jastik wa xyaʼa lamanil sok ja jastik wa stuluwotiki.
20 Aʼaxakan sjomjel ja yaʼtel ja Dyos kechanta yuj waʼelal. Ama ja smeranili yibʼanal ja jastik junuki asyadoniʼa, pe maloni kʼotel ta jun winik wa xwaʼi sok ja it wa xyaʼa lok okil.
21 Masni lek mok kʼuxuk bʼakʼet sok mini yujel vino sok mini skʼulajel jun jasunuk bʼa wa xya slok yok jawa wermano.
22 Ja jas waxa kʼuʼan sbʼaja jastik jaw, ila jastal jun jasunuk bʼa ti chʼikana ja weʼn soka Dyosi. Lekxtayuj ja winik bʼa mi yeʼnxta wa skʼulan sbʼaj jusgar yuja jas wa stsaʼa skʼulajeli.
23 Pe ta ay sduda sok wa xwaʼi, staʼatani smul, yujni mi wa xwaʼ yuja skʼuʼajeli. Ja smeranili, kʼotelni mulal yibʼanal ja jas mi xkʼulaxi sok skʼuʼajeli.
Notaʼik
^ Ma bʼobʼta «wa xtʼabʼtʼuni skʼujol june».
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
^ Ma «Mokni achʼaysnajel».
^ Ma «espíritu santo». Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
