Romanos 2:1-29
2 Ja yuj, ta ja weʼn wala kʼulwani jusgar, chikan machunkilukaʼa, mini xbʼobʼa koltabʼaj. Pes yajni waxa kʼulan jusgar ja tuki, weʼnta wana slejel jawa kastigo, yujni ja weʼn ja maʼ wala kʼulwani jusgari cha wani xa kʼulan ja jastik jawi.
2 Wani xnaʼatik ja Dyosi wa xkʼulwani jusgar jastalni ja smeranili sok wa xyala jas oj ekʼ sbʼaj ja matik wa skʼulane ja jastik jawi.
3 Ja weʼn bʼa waxa kʼulan jusgar ja matik wa skʼulane ja jastik jawi pe cha waxa kʼulan ja weʼni, ¿wan maʼ xa wala ta oj elan libre ja yajni xkʼulwani jusgar ja Dyosi?
4 ¿Yuj maʼ mi lek xa wila ja jel ja lekil skʼujoli, ja wa xtekʼxiyuji sok ja spasensya? Ma ¿yuj maʼ mixa naʼa ja Dyosi wan slejel modo bʼa oj sutxuka kʼujol yuja lekil skʼujoli?
5 Pe yuja jel chʼuʼuya juntiro sok yuja mini tʼun xa kʼana oj sutxuka kʼujoli, ti toj wajuma ja bʼa stajkelal ja Dyosi. Ja yeʼn ti oj xchiktes ja bʼa skʼakʼujil skʼulan jusgar ja kristyano, jaxa yeʼn tojni oj kʼulwanuk jusgar.
6 Ja yeʼn oj yayi kada jujune ja jas wa sbʼajine yuja jas skʼulaneʼi:
7 ja yeʼn ojni yayile sakʼanil bʼa tolabida sok skuerpoʼe bʼa mi xjomi ja matik wane slejel ja chaʼan cholal jaw yuja wan kuchelyujile* skʼulajel ja bʼa leki;
8 pe ja matik wa snikawe kʼumali sok mi kʼuʼabʼal wa x-ajyiye soka smeranili pe jaʼ wa x-ajyiye kʼuʼabʼal soka bʼa mi tojuki, ojni yil-e ja skoraja sok ja stajkelal ja Dyosi.
9 Ojni yiʼe wokol yibʼanal ja matik wa skʼulane ja jastik mi lekuki, jaʼ bʼajtan ja judío sok cha jachuk ja griego.
10 Pe jaxa matik wa skʼulane bʼa jastik leki, ja Dyosi oj yayile jun chaʼan cholal sok oj ajyuke laman, jaʼ bʼajtan ja judío sok cha jachuk ja griego.
11 Yujni ja Dyosi mini june maʼ menos wa xyila.
12 Sok jachuk, yibʼanal ja matik sleʼa smule pe mi snaʼawe ja leyi ojni chamuke ama mi snaʼawe sbʼaj ja leyi, pe yibʼanal ja matik sleʼa smule sok wa snaʼawe sbʼaj ja leyi ojni kʼulajuke jusgar jastalni wa xyala ja leyi.
13 Yujni ja matik wa smaklaye ja leyi mi tojuke ja bʼa stiʼ sat ja Dyosi, pes kechan ja matik wa xyiʼaje ja leyi oj aljuk toj kʼotele.
14 Ama ja matik mi judíoʼuki mi snaʼawe sbʼaj ja leyi, ja yeʼnleʼi wani skʼulane ja jastik wa xyala ja leyi. Pes ama mi snaʼawe sbʼaj ja leyi, ja ley it tini ay bʼa skʼujole.
15 Yeʼnle mismo wa sjeʼawe tini ay bʼa skʼujole ja jastik yiʼoj ja leyi, sok cha wa x-aji snaʼe kʼinal yuja sconcienciaʼe ta lek ja jas wa skʼulane ma miyuk, jaxa yeʼnleʼi wa xyajbʼesjiye ma wa x-ajiye perdon yuja spensareʼi.
16 Ja it oj ekʼuk yajni ja Dyos xya makunuk ja Kristo Jesús bʼa skʼulajel jusgar ja jastik nakʼan ayuj ja kristyano, pes jachni wa xyala ja lekil rasonik wa xcholo.
17 Pe ta ja weʼn waxa wala jun judíoʼa sok waxa jipa akʼujol ja bʼa ley sok waxa toyo abʼaj ja jastal wala tax soka Dyosi,
18 ta waxa naʼa ja jas wa skʼana sok lek waxa wila ja jastik bʼa lek yuja jaʼ chapjiya soka Leyi,
19 ta akʼuʼunej lek bʼa waxa tojo ja matik mi xyila kʼinali, sok kʼotela jun ijlabʼ sbʼaja matik teye bʼa kʼikʼinali,
20 sok kʼotela jun chapwanum sbʼaja matik mi biboʼukeʼi sok jun smaestroʼa ja yal untiki, sok ta waxa wabʼ lek stojol ja jastik mas tʼilan sbʼaja snajeli sok sbʼaja smeranil wa xtax ja bʼa Leyi...,
21 anto, ja weʼn bʼa waxa jeʼayi pilan, ¿jas yuj mixa kʼulan ja jas waxa jeʼa? Ja weʼn bʼa wani xa cholo «Mok elkʼanan», ¿jas yuj wala elkʼani?
22 Ja weʼn bʼa wani xa wala «Moka chʼaykʼujoluk ja nupaneli»,* ¿jas yuj waxa chʼaykʼujolan ja nupaneli? Ja weʼn bʼa waxa wijnay ja kʼulubʼal dyosiki, ¿jas yuj wala elkʼani ja bʼa templo jumasaʼ?
23 Ja weʼn bʼa waxa toyo abʼaj yuja waxa naʼa sbʼaj ja sley ja Dyosi, ¿jas yuj wa xwa kʼixwuk ja Dyos skʼokjel ja Leyi?
24 Pes jastalni tsʼijbʼunubʼal, «ja sbʼiʼil ja Dyosi wan tajel tiʼal kistal ja bʼa chonabʼik yuj wa mul weʼnlex».
25 Ja smeranili, ja yajelyi senya jawa winkili kechani wa xmakuni ta waxa kʼuʼan ja leyi. Pe ta waxa kʼoko ja leyi, lajansok mini ajiyi senya jawa winkili.
26 Ja yuj, ta jun winik bʼa mi akʼubʼalyi senya ja swinkili wa skʼuʼan ja jastik toj wa skʼana ja Leyi, ¿mi maʼ ojni iljuk bʼa lajansok akʼubʼalyi senya ja swinkili?
27 Jaxa winik bʼa mini akʼubʼalyi senya ja swinkili, yajni wa skʼuʼan ja Leyi, ojni skʼuluka jusgar yuja waxa kʼoko ja leyi ama teya wiʼoj tsʼijbʼunubʼal ja Leyi sok akʼubʼalyi senya jawa winkili.
28 Yujni mi kʼoteluk judío june kechan ita yuja splanta, sok ja meran yajelyi senya ja swinkil june mi jaʼuk ja it wa x-ajiyi ja bʼa skuerpo.
29 Pes ja maʼ kʼotel mero judío tey bʼa yojol sok jaxa senya yiʼoji tey bʼa skʼujol, bʼa jani wa skʼulan ja yip ja Dyosi,* sok mi jaʼuk yuja jas tsʼijbʼunubʼal ja bʼa Leyi. Ja kristyano jaw jani wa xtoyji yuja Dyosi sok mi jaʼuk yuja winikeʼi.
Notaʼik
^ Ma «tekʼxelyujile».
^ Kʼela ja bʼa Yaljelik cholubʼal, Xchʼaykʼujolajel ja nupanel.
^ Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
