Romanos 3:1-31
3 Anto, ¿jasa slekilal kʼotel jun judío? ¿Jasa slekilal yiʼoj yajelyi senya ja swinkil june?
2 Ayni slekilal b’a yibʼanal ja jastiki. Bʼajtan, ja judíoʼiki ajiyile bʼa skʼabʼe ja rasonik bʼa Dyosi.
3 Anto, ¿jasa wa x-ekʼ ta jujuntik judíoʼik ay skʼanayujile skʼuʼajel? Pe ¿wan maʼ stojolan ja it ja kristyano mixa xbʼobʼ sjip skʼujole bʼa Dyos?
4 ¡Miniʼa! Ama yibʼanal ja winike wa sleʼawe abʼal, ja Dyosi stojolni wa xkʼumani, jastalni tsʼijbʼunubʼal: «Bʼa jachuk ja jas waxa wala oj sjeʼ kʼotela toj sok oja kʼul ganar ja yajni wana kʼulajel jusgari».
5 Pe ta wa xchiktes ja stojil ja Dyos yuja mi tojukotiki, ¿jasa oj kaltiki? ¿Yuj maʼ mi tojuk ja Dyos ja yajni wa sjeʼa ja stajkelali? (Jachni wanon kʼumal jastal wa spensarane jujuntik kristyano).
6 ¡Mini jachukuka! Lek yuj jachuki, ¿jastal oj skʼul jusgar ja Dyos ja luʼumkʼinali?
7 Pe ta yuja abʼal wa xleʼa masto wa xchiktes ja smeranil bʼa Dyos bʼa oj toyjuk, anto ¿jas yuj wala kʼulajiyon jusgar jastal jun mulanum?
8 ¿Sok jas yuj mi xkalatik «La jkʼuluktik ja jastik malo bʼa jachuk oj jakuk ja jastik leki»?, jastalni jujuntik lom wa sleʼawe jmultik ke jach wa xkalatik. Ja kastigo oj yiʼe ja winike jaw stojolniʼa.
9 Anto, ¿yuj maʼ mas ekʼxelotik ja keʼntik yuja tuki? ¡Miniʼa! Pes jastalni kalatikta jaman lek, kibʼanaltik tey kiʼojtik ja mulali, tanto judíoʼik sok griegoʼik.
10 Jachni tsʼijbʼunubʼal: «Mini ay jun winik toj, mini june;
11 mini ay june bʼa jel xyabʼ stojol;* mini june maʼ wa sleʼa ja Dyosi.
12 Spetsanil ja kristyano yiʼajeta pilan sbʼeje, spetsanile mixa xmakuniye; mini maʼ wa sjeʼa lekil kʼujolal, mini june».
13 «Ja snukʼeʼi jach jastal jun jopan kʼeʼen; ja yeʼnleʼi wa xloʼlaniye soka yakʼeʼi». «Ayiʼoj sbenenoʼil bʼitsʼbʼichan ja bʼa stsʼujmil stiʼeʼi».
14 «Jaxa stiʼeʼi jel xtawaniye tiʼal malo* sok wa xyala jastik wa xyajbʼesni».
15 «Jaxa yeʼnleʼi wegoxta wa xwajye bʼa oj milwanuke».*
16 «Ja yeʼnleʼi tolabida wa syajbʼese ja kristyano sok wa xyawe yiʼ wokol,
17 sok mito snaʼawe sbʼaj ja sbʼejlalil ja lamanili».
18 «Ja yeʼnleʼi mi xiwye yuja Dyosi».
19 Pe wani xnaʼatik yibʼanal ja jastik wa xyala ja Leyi jani sbʼaje ja matik wa snaʼa sbʼaj ja Leyi, bʼa jachuk oj chʼajbʼajuk ja stiʼeʼi sok yibʼanal ja kristyano ayni smule ja bʼa stiʼ sat ja Dyosi.
20 Ja yuj mini maʼ* oj aljuk kʼotel toj ja bʼa stiʼ sat ja Dyos yuja wa skʼulan ja jastik wa xyala ja leyi, yujni stsʼakatal ja leyi wani xnaʼatik lek jasunkiluk ja mulali.
21 Jaxa wego chijkajita ja stojil ja Dyosi, pe mini jaʼuk yuja leyi, jastalni wa xchiktes ja Ley sok ja Alumaniki,
22 jachukniʼa, ja stojil ja Dyosi chijkajita yuja skʼuʼajel bʼa Jesukristo bʼa yibʼanal ja matik ayiʼoje skʼuʼajel, pes yujni mey stukile.
23 Yujni yibʼanale sleʼuneje smule sok mi xlajxiyujile sjejel ja tsamal smodoʼik ja Dyosi,
24 ja yeʼn wa xyila kʼotele toj yuja janekʼ stupu* ja Kristo Jesús bʼa yajel eluke libre. Ja it juni majtanal yaʼa ja Dyos yuja lekil skʼujol mi xbʼajixi.
25 Ja Dyos yaʼa ja Jesús jastal jun majtanal bʼa jachuk ja kristyano oj yaʼe kulan soka Dyosi stsʼakatal yuja skʼuʼajel bʼa xchikʼel ja Jesukristo. Ja it skʼulan bʼa sjejel ja mero stojili, yujni ja Dyosi ajyi spasensya sok yaʼa perdon ja mulalik kʼulaxita,
26 sok bʼa sjejel ja mero stojil ja b’a tyempo it, yajni ja yeʼn xyala kʼotel toj ja ma’ wa skʼuʼan b’a Jesús.
27 Anto, ¿wan maʼ xbʼobʼ stoy sbʼaj jun kristyano? Mini tʼusan. Pe ¿jas ley wa xtimjiyuj? ¿Ja maʼ ja ley bʼa wa xyala jel tʼilan ja jas wa xkʼulantiki? Miyuk, jani ja ley bʼa wa xyala jel tʼilan oj ajyukujtik skʼuʼajel.
28 Yujni kʼot jnatikon ke jun winik wa xkʼot aljuk kʼotel toj yuja skʼuʼajeli sok mi jaʼuk yuja wa skʼulan ja jastik wa xyala ja leyi.
29 ¿Yuj maʼ kechan kʼotel sDyos ja judíoʼiki? ¿Mi maʼ cha kʼotelukni sDyos ja matik mi judíoʼuki? Janiʼa, cha kʼotelni sDyos ja matik mi judíoʼuki.
30 Yuja juneʼitani ja Dyosi, ja yeʼn oj yal kʼotele toj ja matik akʼubʼalyi senya ja swinkileʼi pe jani stsʼakatal soka skʼuʼajel yiʼojeʼi. Jaxa yeʼn oj yal kʼotele toj ja matik mi akʼubʼalyi senya ja swinkile yuja skʼuʼajel yiʼojeʼi.
31 Anto, ¿wan maʼ xchʼayatik ja ley yuja skʼuʼajel kiʼojtiki? ¡Miniʼa! Kechani wantik yajel staʼ yip ja leyi.
Notaʼik
^ Ma «snaʼa kʼinal».
^ Kʼela ja bʼa Yaljelik cholubʼal, Tawanel tiʼal malo.
^ Jach kanel ja bʼa griego: «spekʼe chikʼ».
^ Jach kanel ja bʼa griego: «mini jun bʼakʼtelal».
^ Ma «slokʼol yaʼa». Kʼela ja bʼa Yaljelik cholubʼal, Slokʼol.
