Santiago 5:1-20

STSANJEL BʼA

Rasonik sbʼaja matik riko (1-6)
Ja Dyosi wa xya koʼ slekilal ja ajyel jpasensyatik sok ja kuchelkujtiki (7-11)
Yajni xa walawex «ojo», yujni ojoʼa (12)
Ja orasyon wa xkʼulaxi sok skʼuʼajel jelni ja yipi (13-18)
Jelni tʼilan skoltajel ja mulanumik bʼa oj kumxuke (19, 20)

5 Ja wego maklayik ja weʼnlex matik riko, okʼanik sok mebʼa okʼanik yuja desgrasyaʼik wa xjakabʼajexi. ² Kʼata jawa rikesaʼilexi, jaxa wa kʼuʼexi chʼakta xojbʼuk. ³ Chakal kuxbʼita* jawa woroʼex soka wa plataʼexi, sok jaxa chakal kux it oj kʼot jun testigo bʼa oj skontraʼukex sok oj sloʼ-el jawa bʼakʼtelexi. Ja jas atsomonejexi ojni kʼot jastal jun kʼakʼ ja bʼa tsaʼanikxta kʼakʼu. ⁴ Kʼelawik, wanto awanel ja stsʼakole ja it mi awaʼunejukexyi ja aʼtijumik matik stuluwe ja sbʼaʼal jawa walajexi, sok jaxa yawanele ja aʼtijumik bʼa wane skʼanjel skoltajele kʼota xchikin ja Jyoba,* ja olomal bʼa soldadoʼik bʼa satkʼinal. ⁵ Ja weʼnlexi awiʼoj juna sakʼanilex bʼa jel lek oj ekʼukawujilex ja bʼa luʼumi sok kechan wajela kʼujolex bʼa yajel ekʼuk jawa gustoʼexi. Jawa kʼujolexi jach jastal kojlel chanteʼik bʼa oj miljuke. ⁶ Ja weʼnlexi awalunejex ay smul ja maʼ toji sok amilunejex. ¿Yuj maʼ mi kontra ayuka mokex ja yeʼni? ⁷ Ja yujil kermano jumasaʼ, aʼajyuka pasensyaʼex masan ja yajni tixa ay* ja Kajwaltiki. Kʼelawik, ja tsʼunumani mini xyaʼakan smajlajel sok pasensya ja tsamal sbʼaʼal ja luʼumi man x-eljul ja styempoʼil mi jel xyaʼa jaʼi sok ja styempoʼil jel xyaʼa jaʼi. ⁸ Cha aʼajyuka pasensyaʼex ja weʼnlexi; awik yijbʼuk jawa kʼujolexi, yujni jelxa mojan ja yajni tixa oj ajyuk* ja Kajwaltiki. ⁹ Kermano jumasaʼ, moka waʼabʼajex parte* bʼa jachuk mi oj kʼulajananik jusgar. Kʼelawik, ja Juesi tixa ay bʼa puerta. ¹⁰ Kermano jumasaʼ, ilawik jastal sjejel ja alumanik bʼa staʼawe tiʼal ja sbʼiʼil ja Jyoba* bʼa kuchyujile wokolik sok ajyi spasensyaʼe. ¹¹ Kʼelawik, wani xkalatik jel gustoʼaye* ja matik kuchelyujile.* Ja weʼnlexi awabʼunejex sbʼaja jastal kuchyuj ja Job sok awilunejex jastal aji koʼ slekilal mas tsaʼan yuja Jyoba,* ja yuj wani xa naʼawex ja Jyoba* yajxta wa x-ilwani* sok jel syajulal skʼujol. ¹² Kala kermano jumasaʼ, jel tʼilan moka wawex ochuk testigoʼil ja Dyosi, mini ja bʼa satkʼinali sok mini ja bʼa luʼumi sok minisok chikan jasunuk. Mas lek, yajni xa walawex «ojo», yujni ojoʼa, sok yajni xa walawex «miyuk», pes yujni miyuka, bʼa jachuk mi oj skʼulukex jusgar ja Dyosi. ¹³ ¿Ayma june ma’ wan yijel wokol ja bʼa weʼnlexi? Mokni yakan yajelyi orasyon. ¿Ayma june maʼ gusto ay? A-stsʼebʼantay salmoʼik. ¹⁴ ¿Ayma june maʼ maloʼay ja bʼa weʼnlexi? A-spay ja ansyanoʼik bʼa kongregasyon sok jaxa yeʼnleʼi ayaweyi orasyon yuj yeʼna, yajelyi aseyte bʼa sbʼiʼil ja Jyoba.* ¹⁵ Jaxa orasyon wa xkʼulaxi sok skʼuʼajeli oj ya tojbʼuk ja maʼ maloʼayi,* jaxa Jyoba* oj stule. Chomajkil, ta ja yeʼn sleʼunej smul, ojni ajuk perdon. ¹⁶ Ja yujil, alabʼajik jaman lek jawa mulexi sok taʼabʼajik tiʼal bʼa orasyon, bʼa jachuk oj tojbʼanik. Jelni ja yip* ja jastal wa spata kʼujolal ja winik maʼ toji. ¹⁷ Ja Elías wajni jun winik jastalni keʼntik, pe yajni mi yaʼakan yajelyi orasyon bʼa mok yaʼ jaʼ, mini ya’a jaʼ oxe jabʼil sok wake ixaw ja bʼa luʼumi. ¹⁸ Anto cha yayi orasyon pilan ekʼele, sok koʼkon jaʼ ja bʼa satkʼinali sok jaxa luʼumi bʼaʼalani. ¹⁹ Kala kermano jumasaʼ, ta june ja bʼa weʼnlexi wa xpilji ja bʼa smeranili sok pilan maʼ wa xya kumxuk, ²⁰ naʼawik ke chikan maʼ wa xya kumxuk jun mulanum ja bʼa sbʼej mi lekuki ojni skoltay bʼa mi oj chamuk sok oj skoltay bʼa oj ajuk perdon ja smuliki.