Tito 1:1-16
1 Bʼa sparte ja Pablo, smoso ja Dyosi sok sjekabʼanum ja Jesukristo. Ja skʼuʼajel kiʼoj sok ja kaʼtel jastal jekabʼanum akuerdoni ay soka skʼuʼajel yiʼoje ja matik tsaʼubʼalexa sbʼaja Dyosi sok ja meran snajelil sbʼaja smeranili, bʼa akuerdoni ay soka xiwel yuja Dyosi
2 sok jani yipunej ja smajlajel bʼa sakʼanil bʼa tolabida ja it ayxa lek tyempo skʼapunej ja Dyos, ja maʼ mi xbʼobʼ sleʼ abʼali
3 (ama ja bʼa mero styempoʼili xchiktes ja yabʼal stsʼakatal yuja xcholjel aji bʼa jkʼabʼ yuj smandar ja jKoltanumtik, ja Dyosi).
4 Sbʼaja Tito, jun tojil uninala bʼa junxta skʼuʼajel kiʼojtik:
Ja jTatik Dyos sok ja Kristo Jesús ja jKoltanumtiki ayawi ja lekil skʼujole mi xbʼajintik sok ja slamanileʼi.
5 Ti kaʼawakan bʼa Creta bʼa oja tojbʼes ja jastik mi lek ayi sok oj wa och ansyanoʼik bʼa kada chonabʼ, pe jachni oja kʼuluk jastalni ja tojelalik kaʼunejawiʼi:
6 ja ansyano tʼilan oj kʼot jun winik bʼa mey spalta, kechanta jun xcheʼum oj ajyuk sok cha tʼilan kʼuʼumanik* ja yuntikili bʼa mi oj lejuk smule ke ayiʼoje jun kistal sakʼanile* sok jel kaprechudoʼe.
7 Pes jastalni smayordomo ja Dyosi, ja talnanumi tʼilan mey spalta, tʼilan mi kaprechudoʼuk sok mi wegoxta wa xtajki, mi jun yakbʼumuk sok mi jun makʼwanumuk, mi x-okʼ skʼujol skʼulajel ganar bʼa jun modo mi sbʼejuk.
8 Pes tʼilani jaman skʼujol oj ajyuk, oj syajtay ja bʼa jas leki, tsʼikan oj ajyuk ja spensari,* toj oj ajyuk sok oj xiwyuj ja Dyosi, sok tʼilani oj skom sbʼaj.
9 Tʼilani mok sijpuk ja tojil yabʼal ja Dyosi sbʼaja jastal wa sjeʼa, bʼa jachuk oj bʼobʼ stsatsankʼujoluk ja tuk soka lekil* sjejeli sok stojel ja matik wa xyiʼaj spakaxili.
10 Yujni ay jitsan winike, pe mastoni ja matik wa xyalawe ke tʼilan oj axukyi senya ja swinkil june, bʼa jel kaprechudoʼe, bʼa mey stojol ja jas wa xyalawe sok wa sloʼlaye ja tuki.
11 Ja winike it tʼilani oj makxukyile ja stiʼe, pes yeʼnleni ja matik wane sjomjel ja skʼuʼajel yiʼoje ja pamilyaʼik ja yajni wa sjeʼawe jastik mi sbʼejuk bʼa jachuk oj skʼuluke ganar bʼa jun modo mi sbʼejuk.
12 Asta june ja bʼa yeʼnle, bʼa kʼotel aluman, yala: «Ja swinkil Creta mero mentirosoʼe, kʼotele jastal kʼakʼal chanteʼik, mi xmalxiye soka swaʼele pe mi jas xkʼanxiyujile skʼulajel».
13 Ja yaljelik it meroni smeranila. Ja yujil, moka wakan stojele tsats lek bʼa jachuk lek oj ajyuk ja skʼuʼajel yiojeʼi
14 sok moka maklayex ja skuentoʼe mi meranuk ja judíoʼiki sok ja smandare ja winike bʼa wa spila sbʼaje ja bʼa smeranili.
15 Yibʼanal ja jastik junuki nake sak ay sbʼaja matik sak ayeʼi. Pe sbʼaja matik kux bʼa mey yiʼoje skʼuʼajeli mini jas sak ay, yujni kux ay tanto ja spensare sok ja sconcienciaʼe.
16 Wani xyalawe bʼa stiʼ sat ja kristyano wa snaʼawe sbʼaj ja Dyosi, pe soka jastik wa skʼulane wa sjeʼawe ke mi skisawe, yujni ja yeʼnleʼi wa x-ijnajiye sok mi kʼuʼabʼaluke sok mi akʼubʼalyile permiso bʼa skʼulajel chikan jas tikʼe lekil aʼtel.
