Tito 2:1-15
2 Pe ja weʼn moka wakan yaljel ja bʼa jas akuerdo ay soka lekil* sjejeli.
2 Ja winike bʼa ayxa skʼujole mok jelxuke ja bʼa jastik wa skʼulane sok ayil-e stʼilanil ja jastik junuki, tsʼikan aʼajyuk ja spensareʼi sok lek aʼajyuk ja skʼuʼajel yiʼojeʼi, ja syajal skʼujole sok ja kuchelyujile* ja wokoliki.
3 Cha jachuk ja ixuke bʼa ayxa skʼujole aʼajyuk jun smodoʼe bʼa oj yayi stoyjel ja Dyosi, mok abʼaltanuke, mok ochuke mosoʼil sbʼaja yujel vino sok akʼotuke maestraʼik ja bʼa jas leki,
4 bʼa jachuk oj bʼobʼ yaweyi rason* ja ixuke bʼa mas akʼixeto bʼa oj syajtaye ja statame sok ja yuntikileʼi,
5 bʼa tsʼikan aʼajyuk ja spensareʼi, bʼa sak aʼajyuke, bʼa a-stalnaye lek ja snajeʼi,* leke, sok ibʼ kʼabʼal aʼajyuke soka statameʼi, sok jachuk mi oj tajuk tiʼal malo ja yabʼal ja Dyosi.
6 Cha jachni junxta moka wakan yajelyi rason ja winike bʼa mas keremto bʼa jachuk oj ajyuk tsʼikan ja spensare,
7 sok kʼotan jun lekil sjejel ja bʼa tuktukil lekil aʼteli. Ila lek stʼilanil sjejel ja bʼa jas saki*
8 sok lekil* yaljelik bʼa mi xbʼobʼ kʼenajuk, bʼa jachuk ja kontraʼaliki oj kʼixwuke yajni mi staʼawe jas malo oj yal-e bʼa keʼntik.
9 Jaxa mosoʼaliki ibʼ kʼabʼal aʼajyuke soka yajwale bʼa yibʼanal ja jastik junuki: a-sleʼe modo oj yawe gustoʼaxuke, mok sjakʼeyi stiʼ
10 sok mok yelkʼuke, mas lek a-sjeʼe wani xbʼobʼ jipjuk lek skʼujole, bʼa jachuk oj yawe tsamalbʼuk bʼa tuktukil modo ja sjejelik sbʼaja jKoltanumtiki, ja Dyosi.
11 Yujni ya chijkajuk ja lekil skʼujol mi xbʼajintik ja Dyosi ja yajni yayi skoltajel spetsanil ja tuktukil tikʼe kristyano.
12 Ja it wa sjeʼakitik oj kijnaytik ja jastal mi xkisji ja Dyosi sok ja skʼankʼunelik ja luʼumkʼinali sok yijel jun jsakʼaniltik bʼa tsʼikan ja jpensartiki, stojolil sok xiwel yuja Dyos ja bʼa jastal wa xtax ja tyempo* it,
13 malan wantik smajlajel ja tsamal smajlajel sok ja jastal jel chaʼanyabʼal oj chijkajuk ja niwan Dyos sok ja jKoltanumtiki, ja Jesukristo.
14 Ja yeʼn yaʼa ja sakʼanil yuj keʼntik bʼa oj ya elkotik libre* bʼa tuktukil tikʼe bʼa jas malo* sok yajel sakbʼuk bʼa yeʼn jun xchonabʼ tsaʼubʼal sok jel xkʼankʼuniyuj skʼulajel* bʼa jastik lek.
15 Moka wakan yaljel ja jastik it sok yajel rason* sok tojwanel soka cholal akʼubʼalawiʼi. Moka wakan ay maʼ oj yila menos.
Notaʼik
^ Ma «meran».
^ Ma «tekʼxelyujile».
^ Ma «yawe snaʼ kʼinal», «sjeʼeyi».
^ Ma «aʼaʼtijuke ja bʼa snajeʼi».
^ Ma bʼobʼta «jach sak lek».
^ Ma «meran».
^ Kʼela ja bʼa Yaljelik cholubʼal, Ja jastal wa xtax ja tyempo.
^ Ma «slokʼolukotik», «stupotik».
^ Ma «mi akuerdo ayuk soka leyi».
^ Ma «sok kongana wa skʼulan».
^ Ma «tsatsankʼujolanel».
