Tito 3:1-15
3 Moka wakan yajel julskʼujole bʼa ibʼ kabʼal sok kʼuʼabʼal aʼajyuke soka gobyernoʼik sok ja matik ay xcholi, bʼa puesto aʼajyuke bʼa skʼulajel tuktukil tikʼe lekil aʼtel,
2 mok maʼ staʼe tiʼal malo, mok sleʼe tiro, aʼochuke rason sok tolabida manso aʼajyukesok yibʼanal ja winikeʼi.
3 Yujni ajyi jun tyempo ja keʼntiki cha mini xkabʼtik stojol sok kaprechudoʼotik, loʼlubʼalotik sok moso ajyitik yuj tuktukil tikʼe kʼankʼunelik sok wa xkatik ekʼuk ja jgustotik ajyi, kiʼonejtik jun jsakʼaniltik ajyi bʼa bʼutʼel maloʼil sok imbidia, wani la ijnajitik sok wa xkilkʼujolan jbʼajtik.
4 Pe yajni xchiktes ja lekil skʼujol ja jKoltanumtik, ja Dyosi, sok ja syajal skʼujol sbʼaja luʼumkʼinali,
5 ja yeʼn skoltayotik (mi yuj jkʼulantik jastik bʼa toj, jani yuja syajulal skʼujoli) yuja jaʼ* bʼa yaʼa sakʼanil sok yuja skʼulanotik ajkʼachi stsʼakatal ja yip ja Dyosi.*
6 Ja yeʼn ya kokitik jitsan lek ja ipal it stsʼakatal yuja jKoltanumtik Jesukristo,
7 bʼa jachuk, yajni aljita kʼotelotik toj yuja lekil skʼujol mi xbʼajintiki, ojni bʼobʼ ajukitik ja dote b’a akuerdoni ay soka smajlajel bʼa sakʼanil bʼa tolabida.
8 Wani xbʼobʼ jipjkʼujoltik ja yaljelik it, sok wa xkʼana moka wakan yaljel jitsan ekʼele ja jastik it bʼa jachuk ja matik skʼuʼunejexa ja Dyosi jaʼ oj waj skʼujole skʼulajel lekil aʼtelik. Ja jastik it jelni lek sok wa xyabʼye slekilal ja winikeʼi.
9 Pe moka chʼikabʼaj bʼa kʼeʼel kʼumalik bʼa mi xmakuni, mini ja bʼa lame intilalik, mini bʼa snikjel kʼumal sok mini bʼa kʼeʼel tiro sbʼaja Leyi, yujni mi jas xmakuni sok mini tʼun xkoltani.
10 Jaxa winik maʼ wa xpilwani yajel el jun kʼole, mokxa akis ta mi skʼuʼan ja yajni ajita julskʼujol* june ma chabʼ ekʼele,
11 yujni waxa naʼa ja winik jaw spilunej sbʼaj ja bʼa bʼeji sok wan slejel smul, sok yeʼnta wa skʼulan sbʼaj jusgar.
12 Yajni xjekawi ja Ártemas ma ja Tíquico, kʼulan ja janekʼ oj bʼobʼukawuj bʼa oj waja wilon bʼa Nicópolis, yujni wa xkala ti oj ka ekʼ tiw ja styempo cheʼeji.*
13 Ayi ja Zenas, ja maʼ jel snaʼa sbʼaja Leyi, sok ja Apolos yibʼanal ja jas oj makunukyujile bʼa jachuk mi jas oj skʼulyile palta ja bʼa sbiajeʼe.
14 Pe ja kermanotiki cha a-snebʼe skʼulajel tikʼan lekil aʼtelik bʼa oj koltanuke ja yajni ay jun nesesida jel tʼilan, bʼa jachuk oj kʼotuke kristyanoʼik bʼa oj satinuke.
15 Spetsanil ja matik teye jmoki wa sjekawe akoltanel. Ayi skoltanele ja matik jel yaj xyilawotike bʼa kʼotelexa kʼuʼumanik.*
Aʼajyuka mokex awibʼanalex ja lekil kʼujolal mi xbʼajintiki.
Notaʼik
^ Ma «atnel».
^ Ma «espíritu santo». Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «ajitayi rason».
^ Ma «invierno».
^ Ma «kreyenteʼik».
