Yuja Jesús mey yi’oj mulal, mini ajyiyuj ja jitsan wokolik sok ja chamkʼujolik jastalni ja jbʼajtiki. Chomajkil, jelni cham skʼujol ja kristyanoʼik sok puestoni ajyi bʼa xchʼakjel sbʼaj yuj yeʼnle. Mini kechan skʼulan ja bʼa tʼilani, aytoni jas mas skʼulan. Jani yuja syajal skʼujol ja nikjiyuj bʼa oj skoltay ja tuk. Ojni bʼobʼ kiltik jujuntik sjejel ja bʼa kapituloʼik 32, 37, 57 sok 99.

Kristyanoʼik bʼa tuktukil sjabʼile, jastal ja keremtik akʼixuk sok ja matik ayxa skʼujol jelni skʼanawe oj mojxuke sok ja Jesús, yujni ja yeʼni wa skʼana oj ajyuksok ja tuk sok mini xyaʼa sbʼaj niwanil. Yajni ja kristyano wa xyilawe wa xcham skʼujol bʼa yeʼnle, jelni lek xyabʼye ja ajyelsoke. La kiltik jastal sjeʼa skʼana ajyelsok ja tuk ja bʼa kapituloʼik 25, 27 sok 95.

Ja Jesús tikʼani wa xyayi orasyon sok spetsanil skʼujol, jach stuchʼil sok cha jachuk yajni teysok ja matik wa xyaʼteltay ja Dyosi. Jitsan ekʼele wa xyayi orasyon, bʼa mi kechanukta ja yajni ojxa waʼuki. Ja bʼa yorasyonik, wani xyayi tsʼakatal sok stoyjel ja sTat, sok wani skʼanayi stojelal bʼajtanto ay jas tʼilan oj stsaʼ skʼulajel. La jpaklaytik ja ekʼeleʼik yayi orasyon wa staʼa tiʼal ja bʼa kapituloʼik 24, 34, 91, 122 sok 123.

Ama ay ekʼele ja Jesús skʼana oj jijluk, pe mini skʼulan bʼa oj skoltay ja tuki. Mini yeʼnta sleʼa slekilal. Ja it yakankitik jun sjejel bʼa tʼilan oj cha jnochtik ja keʼntiki. La kiltik jastal sjeʼa ja modoʼalik it ja bʼa kapituloʼik 19, 41 sok 52.

Ja Jesús mi kechanta sjeʼa ja stʼilanil bʼa tolabida puesto oj ajyukotik yajel perdon ja tuki, cha yaʼani sjejel ja bʼa jastal sjeʼa ja smodo soka snebʼumanik sok ja tuk kristyanoʼiki. La kiltik jastal skʼulan ja bʼa kapituloʼik 26, 40, 64, 85 sok 131.

Ja bʼa jastik alubʼal oj ekʼuki, yalunej ke tʼusan mi yibʼanaluk ja judíoʼik mi oj skis-e ja Mesías sok ja skontraʼiki ojni smil-e. Ja yuj, bʼobʼta ja Jesús ojni yayi stikʼanil ajyi ja jas oj skʼuluki. Pe jelni skʼujolan skoltajel ja meran skʼuʼajeli. Jach jastal jaw, yakankitik jun sjejel jastal snochumanotik bʼa oj nochtik, yajni mi lek wala iljitik ma asta yajni jel tsats ay ja wokoliki. La jpensaraʼuktik ja jas wa xcholo ja kapituloʼik 16, 72 sok 103.

Ja Jesús masni ekʼxel yuja kristyanoʼik mulanumi bʼa tuktukil modo, jastal ja bʼa snajel sok ja biboʼil. Mini ayiʼoj mulal, ja yuj mini maʼ xbʼobʼ slaj sbʼajsok ja jas wa snaʼa skʼulajeli sok ja jastik wa spensarani. Pe tolanibida yaʼa sbʼaj chʼin sok yaʼteltay ja tuki. Ojni bʼobʼ jnebʼtik ja jastal chʼin yaʼa sbʼaj ja bʼa kapituloʼik 10, 62, 66, 94 sok 116.

Yajni ja nebʼumanik sok ja tuk kristyano mi snochowe ja sjejel ya’a ja Jesús ma mi xyawe makunuk ja srasoniki, ja yeʼn tolabida ajyi spasensya soke. Jitsan ekʼele wa xyala yabʼye sok spasensya ja sjejelik tʼilan snebʼ-e, bʼa oj bʼobʼ mojxuke soka Jyoba. La kiltik jujuntik modo jastal sjeʼa ja spasensya ja Jesús ja bʼa kapituloʼik 74, 98, 118 sok 135.