Ti kʼiyon bʼa jun barrio ja bʼa chonabʼ Los Ángeles (California, Estados Unidos), jel naʼubʼal jbʼajtikon yuja wa xkatikon ekʼ drogaʼik sok ja bʼa banda wala ajyitikon ekʼ ja bʼa calle. Ja jnantati ajyi wake yuntikil sok keʼnon ja bʼa xchabʼili.

Man jchʼinil, ja jnani wa xyiʼajotikon b’a jun iglesya b’a relijyon evangélica. Pe yajni wanon solteroʼaxel, ja jas wa xyalawe ja tiw, wa x-och b’a jun jchikini sok wa x-el b’a pilan lado. Ja b’a domingo wala tsʼebʼaniyon ja b’a iglesya, jaxa xchʼakulabʼil ja semana wala wajyon bʼa kʼinik, wa xkabʼan drogaʼik sok wala koyon mulal sok ixuk winik.

Ajyikuj jun jmodo bʼa jela makʼwaniyon sok jel wego la tajkiyon. Chikani jasa wani xka makunuk jastal jun arma kechanta b’a oj kʼuluk ganar ja tiroʼaneli. Ja jas jnebʼa ja bʼa iglesya mini jas skoltayon, kechan sjomowon mas. Sok kechani wa xkala: «Ja Kajwaltiki yeʼnani wa xya stupe sok teyon bʼa skoltajel». Ja bʼa xchʼakulabʼil ja jabʼil 70 yajni ay kiʼoj 18 jabʼil, jkʼana oj ochkon ja bʼa grupo político Panteras Negras, bʼa naʼubʼal sbʼaje yuja jastal wa skʼulane luchar ja derechoʼiki. Ochyon bʼa jun grupo estudianteʼik wa skoltaye ja junxta derechoʼiki. Jitsan ekʼele wa stsomo jbʼajtikon wajel ekʼ marchaʼanel bʼa tʼilan wa xlutji jun tyempo ja eskuela.

Pe ja it mini malan waj bʼa keʼna. Ja ilkʼujoli yiʼajon och bʼa koʼel chaʼanik mulal. Jun sjejel, wala wajtikon bʼa cine soka kamigoʼik bʼa yiljel pelikulaʼik sbʼaja jastal wa x-ixtalajiye ja mosoʼik africanoʼik ja bʼa Estados Unidos. Jel tajkitikon ja jastik mi tojuk wa skʼulane, ja yuj jmakʼatikon ja keremtik sak yelawe teye ja bʼa cine sok wala wajtikon ja bʼa barrioʼik wa x-ajyiye ja matik sak yelaw bʼa oj makʼtikon.

Ja bʼa tyempo jaw, ja keʼn soka kermanoʼik jelxani jtaʼunej jmultikon sok ayxa kiʼojtikon wokolik soka matik ay xcholi. June ja bʼa kijtsʼini, tini ay bʼa jun banda jel malo ja smodoʼe, ja keʼn cha wani la ajyiyonsoke. Ja jsakʼanil wanxtani jomel.

Ja snantat june ja b’a kamigoʼik kʼotele testigoʼik b’a Jyoba sok slokowone ja bʼa sreunione. Ja bʼajtan ekʼele wajyoni kila ja jastal tuk lek kʼotele. Naka ayni yiʼoje jun Biblia sok wa xyawe makunuk. ¡Asta ja keremtik akʼixuk wa xyawe ekʼ sloʼile! Jelni cham kabʼ yajni jnaʼa ke ja Dyos sbʼiʼil Jyoba sok wani xyawe makunuk yajni wa staʼawe tiʼal bʼa yeʼn (Salmo 83:18). Anima ay kristyano bʼa tuktukil chonabʼ, mini tukuk xyila sbʼaje.

Ja bʼajtani mini xkʼana oj yaweki estudio bʼa Biblia, pe wani xkiʼaj gusto wajel ja bʼa reunioni. Jun akwal yajni teyon bʼa reunión, jujuntik ja kamigoʼik wajye bʼa jun kʼin sok smakʼawe jun kerem man smilawe bʼa oj yiʼekan ja xchaqueta bʼa cuero. Ja bʼa pilan kʼakʼu jelni stoyo sbʼaje yuja jas skʼulaneʼi. Asta yajni teye ja bʼa matik ay xcholi mini tʼun xiwye. Tʼusan mi yibʼanaluke lutjiye preso. ¡Jelni yaki gusto ja mi wajyonsoke! Ja yuj, jkʼana oj tukbʼes ja jsakʼanil sok kʼe jkʼul estudiar ja Biblia.

Yuja mi lek xkila ja tuk ja rasa, jelni cham kila ja jastik wa skʼulane testigoʼik bʼa Jyoba. Jun sjejel, yajni jun testigo skʼulan biajar bʼa pilan país, yaʼakanyi ja yuntikil bʼa oj stalnaye jun pamilya bʼa kʼikʼ yelawe. Sok jun pamilya bʼa sak yelaw snolowe jun kerem bʼa kʼikʼ yelaw bʼa wa skʼana jun lugar bʼa oj ajyuk. Ja jaw ya jkʼuʼuk ke ja testigoʼik bʼa Jyoba wani skʼulane ja jas yala ja Jesukristo ja bʼa Juan 13:35: «Sok ta waxa yajta abʼajex, jach oj snaʼe yibʼanal kristyano ja weʼnlexi kʼotelex jnebʼumanik». Kʼot jnaʼ jtaʼata ja meran yaʼtijumik Dyosi.

Yajni wanon skʼulajel estudiar ja Biblia, kʼot jnaʼ tʼilan oj tukbʼes ja jmodo. Tʼilani jkʼujolan mi kechan oj jeʼ jun jmodo laman, cha jachni ja bʼa jkʼujoli (Romanos 12:2). Takal takal tukbʼi ja jmodo sok ja bʼa enero bʼa 1974, kiʼaj jaʼ sok kʼotyon testigo bʼa Jyoba.

Tsaʼan yajni kiʼajta jaʼ, tʼilantoni jkʼujolan yajelkan ja jmodo mi lekuki. Jun sjejel, jun kʼakʼu yajni wajumotikon yulatajel jun pamilya bʼa xcholjel yabʼye, kila jun elkʼanum wan yijel ja jradio ja bʼa karro. Wegoxta kiʼaj spatik. Yajni ojxa jlaji, sjipakan ja jradio sok cha snochoyi ajnel. Yajni jcholo yabʼye ja bʼa grupo jastal kiʼajkan ja jradio, june ja maʼ mas ayxa yiʼoj experiencia, yalakabʼi: «¿Jas oja kʼul ajyi lek wa yamukxta?». Soka sjobʼjel jaw, kaʼa jbʼaj kuenta aytoni jas wa skʼana oj tukbʼes ja bʼa jmodo.

Ja bʼa octubre bʼa 1974, kʼe aʼtijukon choljel bʼa tyempo tsʼikan. Wani xcholo junuk 100 oraʼik kada ixaw bʼa sjejelyile bʼa Biblia ja tuk kristyano. Tsaʼan lokjiyon aʼtel ja bʼa mero yechalil wa xkʼelji ja yaʼtele ja testigoʼik bʼa Jyoba, bʼa Brooklyn (Nueva York). Ja bʼa 1978 kumxiyon bʼa Los Ángeles bʼa oj talnay ja jnani yuja maloʼayi. Chabʼ jabʼil tsaʼan, nupaniyon soka Aarhonda. Ja yeʼn jelni skoltayon yajni wantikon stalnajel ja jnani man chami. Tsaʼan lokjitikon ja bʼa Eskuela sbʼa Biblia bʼa Galaad bʼa Watchtower. Yajni chʼak ja chapjelal ajikitikoni, jekjitikon jastal misionero bʼa Panamá, bʼa ti wantikon koltanel ja wego.

Man yajni kiʼaj jaʼ, ay ekʼele wokol kabʼunej skomjel ja jmodo mi lekuki. Ja jas wa xkʼulani, wego wa xpila jbʼaj bʼa mi oj tiroʼanukon ma wa xleʼa modo yajel lamxuk ja jas wan ekʼeli. Jitsan kristyano bʼa ti chʼikan ja jcheʼumi, yaʼunejeki tsʼakatal yuja jas wa xkʼulani, asta keʼn mismo jel cham xkabʼi. Mini xbʼajin ja toyjelal wa x-ajiki yuja jastal tukbʼel ja jsakʼanili. Wan xkʼuʼan juni sjejel ja bʼa janekʼto yip yiʼoj ja Biblia bʼa wa stukbʼes ja kristyano (Hebreos 4:12).

Ja Biblia yaʼunejyi stojol ja jsakʼanili sok sjeʼunejki ajyel laman. Mixato maʼ wa xmakʼa, jaʼuktoma, ja wego wanxa xkoltay ja kristyano bʼa oj snaʼe sbʼaj ja Dyos. Asta kayi estudio bʼa Biblia june ja bʼa jkontra ajyi yajni wanonto skʼulajel estudiar ja bʼa eskuela. Tsaʼan yajni yiʼaj jaʼ, wajni jun tyempo lajan ajyitikon bʼa kuarto, jelni kamigoʼan jbʼajtikon. Man wego, ja keʼn soka jcheʼumi, jkoltunejtikon mas ja 80 kristyanoʼik bʼa kʼotele testigoʼik bʼa Jyoba.

Jelni xkayi tsʼakatal ja Jyoba yuja yaʼunejki jun jsakʼanil bʼa ay stojol, gusto lek sok bʼa teyonsok ja meran yaʼtijumik Dyosi.