Ti pojkiyon bʼa Acul, jun chonabʼ najat wa xkanyuj ja b’a witsik oeste b’a Guatemala. Ja jpamilya ti sbʼaje b’a chonabʼ ixiles, jun kʼole bʼa ti eleljan bʼa maya. Mini kechan jnebʼa español cha jnebʼani ja jkʼumaltikoni. Kʼiyojan ja bʼa styempoʼil ajyi ja guerra ja bʼa país, bʼa albʼi 36 jabʼil. Ja bʼa guerra jaw chamye jitsan ixiles.

Yajni ayto kiʼoj chane jabʼil, ja kermano bʼa ayiʼoj juke jabʼil wan tajnel sok jun bomba bʼa skʼabʼ sok bʼojti. Ja keʼn tup ja jsati, jaxa kermano chami. Man tyempo jaw, tixani kʼiyojan bʼa jun eskuela sbʼaj matik mi xyilawe kʼinal ja bʼa chonabʼ Guatemala bʼa ti jnebʼa skʼumajel braille. Mini jnaʼa jas yuj, pe ja maʼ wa stalnayotikon mini tʼun skʼana oj kʼumuk tuk yal untik sok ja jmojiki cha mi skisawone. Tolabida jtuchʼil ajyiyon sok jel xjul jkʼujol ja chabʼ ixaw bʼa kada jabʼil bʼa oj cha ajyukonsok ja jnani, bʼa jelni syajtayon. Tristeni yabʼjel, pe chami yajni ay kiʼoj lajune jabʼil. Mini xnaʼa jas oj kʼuluk, pes yujni chamkuj ja ma’ kechan jel xkʼana.

Yajni ay ki’oj 11 jabʼil, kumxiyon ja b’a jchonabʼi sok wajyonsok ja majan kermano sok ja spamilya. Skoltayone soka ja jastik wa xmakunikuji, pe mini ma’ xbʼobʼ skoltayon jas jastal wa xkabʼ ayoni. Ay ekʼele kʼakʼxta wa xkala yabʼ ja Dyos: «¿Jas yuj cham ja jnani? ¿Jas yuj mixa xkila kʼinal?». Ja kristyano wa xyalawekabʼ ke ja jwokoliki yeʼni wan yajel ekʼuk ja Dyos. Ja yuj wa xpensaran ja Dyos wa skʼulan bʼa mi tojuk sok mini snaʼa jyajaltik. Lek taʼukxta modo jmilata jbʼaj.

Yajni chʼay ja jsati kabʼ mixa la makuniyon ja jastal wala taxyoni sok ja bʼa jastal wa xkabʼ ayoni. Man yal jchʼinil tʼenjiyon wayel jitsan ekʼele. Mini tʼun kaʼa parte sbʼaja jaw, yujni wa xpensaran mi maʼ oj yayi stʼilanil. Ja kristyano mini jelukxta skʼumanon. Jelni triste la ajyiyon sok mini maʼ xkʼana ajyelsoke, yujni mi maʼ xjipa jkʼujol.

Yajni ay kiʼoj 13 jabʼil, jun nupanum testigo bʼa Jyoba skʼumanone yajni teytikon bʼa recreo ja bʼa eskuela. Jun maestra bʼa jel snaʼa jyajal yalunej yabʼye ajak yulatayone. Ja yeʼnle yalawekabʼ ke ja Biblia wa skʼapa ja matik mi xyilawe kʼinali oj kʼot ilwanuke sok ja matik chamelexa oj sakʼwuke (Isaías 35:5; Juan 5:28, 29). Jel xkiʼaj gusto smaklajele, pe yuja mi k’ajyelukon loʼilanel kechan wala kanyon chʼabʼan. Ama jela kʼixwiyon tolabida ajyi spasensyaʼe, yajxta wa xyilawone sok wa xyulatayone bʼa oj sjeʼeki ja jas wa xyala ja Biblia. Tʼilani oj bʼejyuke lajune kilometro yoj jkʼul bʼa oj kʼotuke ja bʼa jlugari.

Yajni ja majan kermano xcholokab’ bʼa yeʼnle, yalakabʼ ke kʼotele kristyano jel pobreʼe pe jelni chapan x-ajyiye ekʼ. Wani xchiknaji jel syajtayone, pes yujni wa xyaweki yal chʼin majtanalik. Wa xkʼuʼan lek kechani ja yaʼtijumik Dyos ja maʼ puestoʼaye bʼa skʼulajel ja janekʼ wa xbʼobʼ yujile.

Wa xkʼulan estudiar ja Biblia yajel makunuk ja juʼunik bʼa braille. Wa xkabʼ stojol ja jasa wanon snebʼjeli, pe ay jujuntik jasunuk bʼa jel wokol xkabʼ skʼuʼajel. Jun sjejel, jelni wokol xkabʼ skʼuʼajel ke ja Dyos wa xcham skʼujol bʼa keʼna sok oj yil-one ja tuk jastalni wa xyilawon ja yeʼn. Cha kabʼ stojol jas yuj wanto yajelkan a-ekʼuk ja wokoli, pe jelni wokol kabʼ yiljel jastal jun tatal jel xyajtani. *

Yajni wanon snebʼjel ja jas wa sjeʼa ja Biblia, takal takal och tukbʼuk ja jastal wa xpensarani. Jun sjejel, jnebʼa ke ja Dyos jelni yaj wa xyabʼ yajni wantik yijel wokoli. Sok sbʼaja yaʼtijumik wa x-ixtalajiye, ja yeʼn wa xyala: «Kilunej lek ja jastal ja swokol ja jchonabʼ [...]. Sok wa xnaʼa lek ja syajal ja swokoleʼi» (Éxodo 3:7). Yajni kaʼa jbʼaj kuenta ja jastal jel xyajtani ja Jyoba, jkʼana oj kayi ja jsakʼanil sok skʼulajel ja jas wa skʼana. Ja bʼa 1998 kiʼaj jaʼ sok ochyon testigo bʼa Jyoba.

Yajni ayxa jun jabʼil kiʼoj jaʼ, ochyon bʼa jun estudio bʼa kristyanoʼik matik mi xyilawe kʼinal ja bʼa chonabʼ Escuintla. Jun ansyano bʼa kongregasyon ja bʼa chonabʼ jaw, yabʼ ja jastal jel wokol xkabʼ wajel ja reunionik bʼa Acul, pes yujni tʼilan oj ekʼ jkʼuts chaʼan witsik jastalni ja nupanum Testigo bʼa yaweki estudio. Bʼa oj skoltayon ja ansyano, sleʼa jun pamilya Testigo ja bʼa chonabʼ jaw bʼa oj snol-one bʼa snaje sok oj skoltayone wajel ja bʼa reunioniki. Man wego, wa stalnayone sok wa xyilawone jastal mero spamilyaʼe.

Ojni bʼobʼ jchol jitsan jastik sbʼaja jastal jel syajtayone ja hermanoʼiki. Seguroni ayon lek ke soka testigoʼik bʼa Jyoba tini ayonsok ja meran yaʼtijumik Dyos (Juan 13:34, 35).

Mixani xkabʼ mila makuniyon sok ta mey kiʼoj smajlajel; pes ja wego ayxa stojolil ja jsakʼanili. Jaʼuktoma oj waj jkʼujol ja mixa tsʼikanukoni, wa xka makunuk tsʼikan lek ja jtyempo bʼa skoltajel ja tuk bʼa oj snaʼe ja smeranil bʼa Biblia. Ja wego ay kiʼoj ja cholal jastal ansyano bʼa kongregasyon sok wa xka ekʼ loʼil bʼa Biblia ja bʼa kongregasyonik mojani. Cha jelni xkaʼa tsʼakatal yuja wa xbʼobʼ ka ekʼ loʼilik bʼa Biblia ja bʼa asambleaʼik bʼa wa x-ajyiye jitsan kristyano.

Ja bʼa 2010, jkʼulan jbʼaj graduar ja bʼa Eskuela de Entrenamiento Ministerial (ja wego wanxa sbʼiʼilan Eskuela bʼa Cholumanik sbʼaja sGobyerno ja Dyosi) ja bʼa El Salvador. Ja Eskuela it skoltunejon bʼa oj kʼul tsʼikan lek ja cholal kiʼoj ja bʼa kongregasyoniki. Wajni jun chapjelal ya kabʼ jel chaʼanyabʼalilon sok yajtanubʼalon yuja Jyoba, bʼa wa xbʼobʼ yayi ja cholal chʼikan maʼ wa sbʼajin oj skʼuluk ja yaʼteli.

Ja Jesukristo yala: «Masni wa xyaʼa gustoʼil ja yajeli ke yuja oj ajukawiʼi» (Hechos 20:35). Jelxani gustoʼayon. Ama mini tʼun jpensaran ta oj bʼobʼkuj, pe ja wego wa xkabʼ wanxa xbʼobʼ jkoltay ja tuk.