KAPITULO 35

¿Jastal oj bʼobʼ kamigoʼuk ja Dyos?

Ja Gabriel yila ja janekʼto chaʼanyabʼal yamigo’ajel ja Dyos yajni stʼaspun jun tsatsal wokol. Ja yeʼn wa xcholo. «Ja jtati yaʼawotikonkan yajni ayto kiʼoj 12 jabʼil. Wa xjul jkʼujol jun akwal ja bʼa jchʼati, albʼelek kalayabʼ ja Jyoba aya kumxuk».

Ja Gabriel mini jel gustoʼayuk, pe och skʼumuk ja Biblia. Staʼa jun bersikulo yajni ja tsʼijbʼanum wan yaljelyabʼ ja Jyoba sbʼaja it: «Bʼa weʼna wa sleʼa skoltajel ja maʼ wa xkʼulajiyi bʼa malo bʼa mey yiʼoje smajlajel; weʼnani ja maʼ wa skoltay ja mebʼa» (Salmo 10:14). Ja Gabriel wa xyala kʼotni man skʼujol ja yaljelik jaw: «Yajni wanon skʼumajeli, kabʼ ja Jyoba wan yaljelkabʼ oj skoltayon sok wan yaljelkabʼ ke yeʼnani ja jTati. ¿Sok maʼ tatal mas lek wa xbʼobʼ ajyuk?».

¿JACH maʼ wala tax jastal ja Gabriel? Bʼobʼta jachuk ma miyuk. Pe ay jun jasunuk jel tʼilan oja naʼ: ke ja Jyoba wa skʼana oja wamigoʼuk. Kʼela ja jas wa xyala ja Biblia: «Mojxanik soka Dyosi sok jaxa yeʼni ojni mojxuka mokex» (Santiago 4:8). ¿Awila maʼ? Anima mi xbʼobʼ kiltik sok mi junxta kʼotelotiksok. Ja Jyoba wani slokowotik oj kamigoʼuktik.

Pe ja yamigoʼajel ja Jyoba mini jachta lom wa xtaxi. Tʼilani skʼujolajel. La katik jun sjejel. ¿Ay maʼ bʼa jun ekʼele wa nolunej jun yal kʼul? Ta waxa kʼana lek akʼiʼuk, ¿jasa tʼilan oja kʼuluki? Pes tʼilani oja leʼ bʼa oja waʼe sok tikʼan oja pekʼ yalel. Mini oja jipkani. Junxtani wa x-ekʼ ja oja wamigoʼuk ja Dyos. ¿Jas oja kʼuluk bʼa oj kʼiʼuk?

Ja estudio jel tʼilan

Jastalni waxa naʼa, bʼa lek oj yil sbʼaje chabʼ amigo, tʼilani oj loʼilanuke sok oj smaklay sbʼaje. Cha jachni junxta soka Dyos bʼa chikan maʼ wa skʼana oj yamigoʼuk. Pe ¿jastal oj bʼobʼ jmaklaytik ja Jyoba? Jani skʼumajel sok skʼulajel estudiar ja Yabʼal, ja Biblia (Salmo 1:2, 3).

Pe ja skʼulajel estudiar bʼobʼta mini jel xyawi gusto. Bʼobʼta masni wa xyawi gusto tuk jastik, jastal ja telebisyon, ja videojuegoʼik sok elel soka wamigoʼik. Pe ta waxa kʼana oja wamigoʼuk ja Dyos, ja jas kechanta oja kʼuluki: jani tʼilan oja maklay ja jas wa xyala ja Yabʼali.

Mokni apensaraʼuk skʼulajel estudiar ja Biblia jelni axwela sbʼaj. Yujni oj kʼe awabʼ stsamalil ta wa kʼulani, ama waxa wabʼ mixa bʼajin skʼulajel estudiar. Meran ja bʼajtani jani oja pil styempoʼil. ¿Bʼa oj kʼeʼan? Ojni bʼobʼa kʼuluk jastal jun akʼix sbʼiʼil Lais. Ja yeʼn wa xcholo: «Ayni kiʼoj jun orario. Yajni wala kʼeyon, wa xkʼuman tsʼikan jun kapitulo ja Biblia». Ja María bʼa 15 jabʼil, cha tukni ja sprograma yiʼoji: «Kada akwal wa xkʼuman jun rato bʼajtanto oj waj waykon».

¿Jastal jawa programa bʼa estudio oj ajyukawuji? Bʼajtan kʼela ja  recuadro ja bʼa slam 292. Tsaʼan aʼoch juʼun jas sjutsʼinil ja bʼa kʼakʼu oja pil nalan ora bʼa skʼulajel estudiar ja Yabʼal ja Dyos.

․․․․․

Pe ajyelawuj jun orario jatoni ja skʼeʼulabʼili. Yajni xkʼeʼa kʼul estudiar ja Biblia, ojni awil mi tolabida pasil skʼumajel. Bʼobʼta ojni ekabʼaj jastal ja Jezreel, jun kerem bʼa 11 jabʼil, bʼa wa xyala: «Bʼa jujuntik jelni wokol xkabʼi». Pe mok eluka gana. Ajuluka kʼujol ja skʼulajel estudiar ja Biblia jani wana smaklajel jawa lekil amigo Jyoba. Ojni awil oja kʼul gusto. Yajni mas waxa wayi stʼilanil, masni oja wabʼ stsamalil sok masni oj wa el slekilal.

Moka wakan yajelyi orasyon

Ja orasyon jani ja jas yaʼunej ja Dyos bʼa loʼilanel soka yeʼn. Juni majtanal jel tsamal. Pensaraʼan: ojni loʼilanan soka yeʼn bʼa chikan jas ora ja bʼa kʼakʼu ma bʼa akwal. Ja Jyoba tolabida puestoʼay. Cha wani skʼana oj smaklaya. Ja yuj ja Biblia wa xyawi ja rason it, «bʼa chikan jastal wala taxyex» ja bʼa jas wa xmakuniwuj «awik snaʼ [...] ja jastik waxa kʼanawexi», bʼa jani amakunuk ja «orasyonik» sok ja «spatjel kʼujolal», sok mokni chʼayuka kʼujol «yajel tsʼakatal» (Filipenses 4:6).

Ja it wa xkʼan yal ojni bʼobʼa walyabʼ ja Dyos bʼa chʼikan jastik, jastal jawa wokoliki sok jawa chamkʼujoliki. Pe cha jelni tʼilan oja wayi tsʼakatal. Tsaʼan cha tʼilani oja wayi tsʼakatal ja jastik wa skʼulanawi jawa wamigoʼiki. Cha mini ay jun amigoʼal bʼa masni ay jas skʼulunejawi ke yuja Jyoba (Salmo 106:1).

Tsʼijbʼan jitsan jastik junuk bʼa waxa wayi tsʼakatal ja Jyoba.

․․․․․

Ta ay ekʼele waxa wabʼ mixa xkuchawuj jawa xiweli ma jawa chamkʼujoliki, ¿jas oj bʼobʼa kʼuluk? «Jipa jawa wijkats sbʼaja Jyoba, soka yeʼn ojni skoltaya. Sok mini oj yakan ja maʼ toj ayi amokʼuk» (Salmo 55:22).

Tsʼijbʼan jujuntik jas wa xchama kʼujol bʼa waxa kʼana oja chʼik ja bʼa worasyoni.

․․․․․

Nebʼa ja jas wa x-ekʼabʼaji

Ay pilan jasunuk ja bʼa yamigoʼajel ja Dyos bʼa tʼilani mi oj wa ekʼ chaʼan. Ja David stsʼijbʼan jun tsʼebʼoj bʼa wa xyala: «Abʼan sok ila ja Jyoba jel lek» (Salmo 34:8). Yajni stsʼijbʼan ja it, wantoni chʼak ekʼ sbʼaj jun jasunuk bʼa xiwela sbʼaj. Tʼusan mi kol miljuk yuja rey Saúl. Bʼa tiʼ wa snakʼa sbʼaj ja bʼa yoj skontraʼik filisteo. Lajansok ja tiw mixani oj el sakʼan. Pe bʼobʼni yuj. ¿Wan maxa naʼa jastal? Sok jun modo jel lek: sjeʼa sbʼaj ke loko ay (1 Samuel 21:10-15).

Pe ja David mini spensaran kan sakʼan yuja jel listo. Ja bʼa skʼeʼulabʼil ja stsʼebʼoji jani yayi stoyjel ja Dyos: «Ja keʼn jobʼoyi ja Jyoba, jaxa yeʼn sjakʼaki. Ja yeʼn ya elkon libre bʼa yibʼanal ja jxiwelik» (Salmo 34:4). Ja yuj, ja jas ekʼ ja bʼa sakʼanili, bʼobʼni yalkan ja it: «Abʼan sok ila ja Jyoba jel lek». *

Pensaran bʼa jun ekʼele ay jas ekʼ ja bʼa wa sakʼanil bʼa wila wa stalnaya ja Jyoba sok tsʼijbʼan ja jas ekʼi. Mini yajnaluk jun jasunuk bʼa jel chaʼanyabʼal; bʼobʼta juni jasunuk lek, ke ay ekʼele mi jel chaʼanyabʼal wa xkilatik.

․․․․․

Bʼa kada jujune tʼilani oj kʼujoluktik jach jtuchʼiltik yamigoʼajel ja Dyos sok jachni yajni ja jnantatik sjeʼunejkitik ja smeranili bʼa Biblia. ¿Wana maʼ skʼujolajel yamigoʼajel? ¿Maʼ mito? Anto, ja kapitulo it oj skoltaya bʼa oj kʼeʼa kʼuluk. Ja Jyoba ojni ya koka lekilal ja janekʼto oja kʼujoluk, pes ja Biblia wa xyala kabʼtik: «Moka waʼexkan skʼanjel sok ojni ajukawilex, moka waʼexkan slejel sok ojni ataʼex» (Mateo 7:7).

OJA TAʼ MAS XCHOLJEL JA BʼA KAPITULOʼIK 38 SOK 39 JA BʼA BʼAJTAN VOLUMEN

JA BʼA KAPITULO JAKUMI

¿Jel maʼ wokolxa wabʼ loʼilanel bʼa Dyos soka kristyano? ¿Jastal oj bʼobʼa koltay ja skʼuʼajela wiʼoji?

[Nota]

RASON BʼA BIBLIA

«Jel gusto wa x-ajyiye ja matik tʼabʼan skʼujole bʼa tʼilan oj snebʼ-e sbʼaja Dyosi» (Mateo 5:3).

JUN MODO BʼA SKʼULAJEL

Ta kada kʼakʼu waxa kʼuman chane slam ja Biblia, ojni chʼakawuj bʼa jun jabʼil.

¿WAN MAXA NAʼA JA IT?

Ja smeranili ja weʼn wana skʼumajel ja libro it sok wanani skʼuʼajel ja rasonik yiʼoj bʼa Biblia, yujni ja Jyoba wa skʼana oj kʼot yamigoʼuka (Juan 6:44).

¡KʼEʼAN KʼULAN!

Ja it ja jas oj kʼuluk bʼa oj ka el mas slekilal skʼulajel: ․․․․․

Ja it ja jas oj kʼuluk bʼa oj kayi orasyon mas tikʼan: ․․․․․

¿Jasa wa xkʼana oj jobʼyi ja jtat ma ja jnan sbʼaj tema it? ․․․․․

JA WEʼN, ¿JAS WAXA PENSARAʼAN?

● ¿Jas oj bʼobʼa kʼuluk bʼa mas lek oj wajkawuj ja wa estudio bʼa Biblia?

● ¿Jas yuj jel tʼilan xyila ja Jyoba ja orasyonik wa skʼulane ja kristyano mulanumi?

● ¿Jastal oj wa tojbʼuk mas ja jastal waxa wayi orasyoni?

[Xcholjel]

«Yajni chʼinonto, tʼusan mi spetsanil junxta wa xkayi ja korasyoniki. Ja wego wanxani xkala ja jastik lek sok mi lekuk wa x-ekʼ jbʼaji. Yuja kada kʼakʼu tuktukil, mixani junxta ja jas wa xkala» (Eva).

[Rekuagro sok dibujo]

 kʼulan estudiar jawa Biblia

1. Tsaʼa jun loʼil bʼa Biblia bʼa waxa kʼulan gusto. Bʼa oja wabʼ lek stojol, kʼanayi ja Jyoba ayawi biboʼil.

2. Kʼuman tsʼikan lek. Moka kʼum lijero. Aʼekʼ bʼa wa pensar tsʼikan lek: jun sjejel, aʼekʼ bʼa wa pensar ja jas wan ekʼeli, smaklajel ja skʼumal ja personajeʼik, yabʼjel ja yikʼili sok yabʼjel yajbʼal... Jachuk ja loʼili oj sakʼwukjan bʼa weʼna.

3. Aʼabʼaj sjobʼjelik. Yajni xchʼaka kʼumuk ja loʼili, jobʼo abʼaj:

● ¿Jas yuj yaʼunejkan ja Jyoba ja bʼa Yabʼali?

● ¿Jas personajeʼik kʼotel jun lekil sjejel bʼa keʼna sok ja bʼa miyuki?

● ¿Jasa wa xbʼobʼ jnebʼ sbʼaja it bʼa oj makunuk ja bʼa jsakʼanili?

● ¿Jasa wa sjeʼaki sbʼaja Jyoba sok sbʼaja jas wa skʼulan?

4. Ayi jun orasyon. Choloyabʼ ja Jyoba ja jas wa nebʼunej ja bʼa estudio sok jastal waxa pensaran oj wa makunuk. Cha ajuluka kʼujol yajelyi tsʼakatal yuja Yabʼal, Ja Biblia.

[Dibujo]

«Jawa wabʼali juni lámpara sbʼaja koki, sok jun ijlabʼ ja bʼa jbʼeji» (Salmo 119:105).

[Rekuagro sok dibujo]

stsajel ja jasa mas tʼilan skʼulajel

¿Kʼotela maʼ ja maʼ nunka staʼa tyempo bʼa yajelyi orasyon sok skʼulajel estudiar ja Biblia? Jitsan ekʼele, jani oja tsaʼ ja jasa mas tʼilan skʼulajel.

La jkʼuluktik jun jasunuk: Leʼa jun balde sok aʼoch jujuntik niwak ton ja bʼa yojoli. Tsaʼan aʼoch arena man bʼa stiʼ ja balde. ¿Jasa yiʼoji? Jelni pasil: jun balde bʼutʼel ton sok arena.

Ja wego aʼeluk ja arena sok ja toniki, cha kʼulan yajkʼachil ekʼele, pe jach spakaxil. ¿Jasa ekʼi? ¿Anke mi chʼak ochuk ja toni? Jani yuja ekʼele it jaʼ bʼajtan wa ochuk ja arena.

¿Jas waxa nebʼa? Ta ja bʼa wa sakʼanil ja waxa kʼulan bʼajtan ja bʼa jastik mas chʼiniki, jastal ja yajel ekʼ gustoʼil, mini oj ajyukawuj tyempo ja bʼa mas niwaki, wa xkʼan alxuk, ja jastik bʼa Dyos. Jakʼa yuja Biblia wa xyala yabʼ ja yaʼtijumik ja Jyoba «ke oja naʼex lek jastik junuk ja mas tʼilani» (Filipenses 1:10). Ta waxa kisa ja rason it, ojni wil aya tyempo ja bʼa jastik bʼa Dyosi sok jachni bʼa yajel ekʼ gustoʼil jujuntik ekʼele. Ajuluka kʼujol: ja jas kechanta oja stsaʼi jani ja jas mas tʼilan skʼulajel.

[Dibujo]

Ja yamigoʼajel ja Dyos jach jastal jun yal kʼul: wani skʼana stalnajel bʼa oj kʼiʼuk