KAPITULO 37

¿Tʼilanxa maʼ oj ki jaʼ?

Tsʼijbʼan ta meran ma mi meranuk:

Yibʼanal ja snochumanik Kristo tʼilani oj yiʼe jaʼ.

□ Meran

□ Mi meranuk

Ja yijel jaʼ jani oj skoltaya bʼa mi oj koʼan mulal.

□ Meran

□ Mi meranuk

Ja yijel jaʼ wani xbʼobʼ skoltaya bʼa oja taʼ asakʼanil.

□ Meran

□ Mi meranuk

Mini oj kayi kuenta ja Dyos ta mito kiʼunejuk jaʼ.

□ Meran

□ Mi meranuk

Yuja wanexa yijel jaʼ ja kamigoʼik, tʼilani oj cha kiʼ ja keʼn.

□ Meran

□ Mi meranuk

¿WAN maʼ xa wiʼaj juna sakʼanil jastalni wa xyala ja bʼa jastik kujlajel bʼa Biblia? ¿Wan maʼ xa kʼujolan bʼa oja wamigoʼuk ja Dyos? ¿Wan maʼ xa walayabʼ tuk kristyanoʼik ja skʼuʼajela wiʼoj? Ta ja sjakʼjel ja bʼa oxe sjobʼjelik it ke meran, bʼobʼta wanaxani pensar oja wiʼ jaʼ. Pe bʼajtanto tʼilani oja wil ta chapanxa aya. Jun jasunuk oj skoltaya jani snajel ta lek awayi sjakʼjel ja bʼa skʼeʼulabʼili.

● Yibʼanal ja snochumanik Kristo tʼilani oj yiʼe jaʼ.

Meran. Jani ja mandar jaw yayi ja Jesús ja snebʼumanik bʼa oj skʼuluke (Mateo 28:19, 20). Cha yiʼajni jaʼ ja yeʼn. Ja yuj bʼa oja noch ja Kristo, ja weʼn cha tʼilani oja wiʼ jaʼ yajni takʼanaxa sok yajni seguroxa aya lek bʼa oja kʼuluk.

● Ja yijel jaʼ jani oj skoltaya bʼa mi oj koʼan mulal.

Mi meranuk. Ja yijel jaʼ juni senya bʼa oj snaʼe ja tuk ke waʼunejxayi jawa sakʼanil ja Jyoba. Sok bʼa june wa xyayi ja sakʼanil ja Jyoba yujni wa skʼana oj skʼuluk ja jas wa skʼana ja yeʼni, sok mi kechanta obligado oj yabʼ bʼa mi oj skʼuluk jastik mi lekuk bʼa wa xpayjiyuj.

● Ja yijel jaʼ wani xbʼobʼ skoltaya bʼa oja taʼ asakʼanil.

Meran. Jastalni wa xyala ja Biblia, ja yijel jaʼ jelni tʼilan bʼa oj taʼ jsakʼaniltik (1 Pedro 3:21). Pe ja yijel jaʼ, mini wa stojolan jun jasunuk oj kʼulaxuk bʼa oj stalnayotik bʼa yibʼanal ja jastik xiwela sbʼaji. Tʼilani oj skʼuluk june yuj wa syajtay ja Jyoba sok wa skʼana oj yaʼteltay sok spetsanil skʼujol bʼa tolabida (Marcos 12:29, 30).

● Mini oj kayi kuenta ja Dyos ta mito kiʼunejuk jaʼ.

Mi meranuk. Ja Santiago 4:17 wa xchiktes «ta ay maʼ wa snaʼa skʼulajel ja bʼa jas toji pe mi skʼulan, wanxani slejel smul» ama yiʼojxa jaʼ ma mito. Ja yuj, pensaran: ¿Wan maʼ xa wabʼ stojol ja jas wa smajlay ja Dyos bʼa weʼna? ¿Takʼanaxa maʼ bʼa spaklajel meran jastal wa xtax jawa sakʼanili? Anto, bʼobʼta jaxani styempoʼil oj loʼilanansok jawa nantati ma jun yaʼtijum Dyos bʼa takʼanxa. Ja yeʼnle ojni skoltaya bʼa stajel jawa kʼelsat bʼa yijel jaʼ.

● Yuja wanexa yijel jaʼ ja kamigoʼik, tʼilani oj cha kiʼ ja keʼn.

Mi meranuk. Ja oja tsaʼ bʼa oja wiʼ jaʼ tʼilani ti oj wa el man bʼa wa kʼujol (Salmo 110:3). Sok tʼilan kechan oja tsaʼ yajni wanxa xa wabʼ lek stojol ja jasa ti chʼikan kʼotel jun testigo bʼa Jyoba sok mixa ayuka duda ta chapanxa aya bʼa oja kʼuluk ja cholal jaw (Eclesiastés 5:4, 5).

Jun skʼulajel bʼa oj stukbʼes jawa sakʼanili

Ja yijel jaʼ juni jasunuk bʼa wa stukbʼes jawa sakʼanil sok wa sjamawi ja puerta bʼa jitsan slekilal. Pe cha wani x-ajyiwuj jun niwan cholal. ¿Jasunkiluk? Yajel kʼot yibʼanal ja jas waxa kʼapayi ja Jyoba yajni waxa wayi jawa sakʼanili.

¿Wan xa maʼ mojxel ja styempoʼil bʼa oja wiʼ jaʼ? Anto, ayni wiʼoj rason bʼa gusto oj ajyan. ¿Jasa chaʼan cholal wa xbʼobʼ ajyuk ja yaʼteltajel ja Jyoba sok spetsanila kʼujol sok sjejelyi kada kʼakʼu ke waxa waʼteltay? (Mateo 22:36, 37).

JA BʼA KAPITULO JAKUMI

Ila jastal oj wa makunuk lek jawa sakʼanili.

RASON BʼA BIBLIA

«Oja waʼex jawa kuerpoʼex jastal jun majtanal bʼa sakʼan ay, bʼa sak ay sok bʼa lek xyila ja Dyosi; sok jachuk oj wa makunukex tsʼikan lek jawa pensarex bʼa yaʼteltajel ja Dyosi» (Romanos 12:1).

JUN MODO BʼA SKʼULAJEL

Jobʼoyi jawa nantat jas hermano ma hermana ja bʼa kongregasyon oj bʼobʼ skoltaya bʼa kʼiʼel ja bʼa yaʼteltajel ja Dyos (Hechos 16:1-3).

¿WAN MAʼ XA NAʼA JA IT?

Ja yijel jaʼ kʼotelni jun parte jel tʼilan ja «bʼa marka» oj ajyukawuj bʼa oja taʼ asakʼanil (Ezequiel 9:4-6).

¡KʼEʼAN KʼULAN!

Sjejelik bʼa Biblia bʼa tʼilan oj kabʼ lek stojol bʼa oj bʼobʼ kiʼ jaʼ: ․․․․․

¿Jasa wa xkʼana oj jobʼyi ja jtat ma ja jnan sbʼaja tema it? ․․․․․

JA WEʼN, ¿JAS WAXA PENSARAʼAN?

● ¿Jas yuj ja yijel jaʼ juni jasunuk jel tʼilan?

● ¿Jas yuj jujuntik keremtik akʼixuk mixani tʼun spensarane ja wa xyiʼaje jaʼ?

● ¿Jas yuj jujuntik keremtik akʼixuk jel x-albʼiye yajelyi ja sakʼanile ja Dyos sok yijel jaʼ?

[Xcholjel]

«Ja wa xkaʼ juljkʼujol ke kiʼoj jaʼ wa skoltayon skʼulajel ja bʼa stojoli sok jach mi xchʼika jbʼaj bʼa wokol». (Noemí)

[Recuadro sok dibujo]

sjobʼjelik mas tikʼan wa x-axi sbʼaja yijel jaʼ

¿Jas wa stojolan ja yijel jaʼ? Yajni wala muljiko ja bʼa jaʼi lajansok wala chami yajelkan yibʼanal ja jastik waxa kʼana. Sok yajni wala el ja bʼa jaʼi lajansok cha wala sakʼwi, pe ja bʼa ekʼele it jani bʼa skʼulajel ja jas wa skʼana ja Jyoba, wa xkʼan alxuk, ja jas wa skʼana oja kʼuluki.

¿Jas wa stojolan yajelyi ja jsakʼanil ja Jyoba? Wa stojolan mixa weʼn waxa kʼulan mandar jawa sakʼanili sok jaxani waxa wayi ja Jyoba (Mateo 16:24). Ja yuj bʼajtanto ja kʼakʼu bʼa yijel jaʼi, tʼilani wa kʼulan jun orasyon skʼapjelyi ja Jyoba oja wa bʼajtan bʼej tolabida ja jas wa skʼana.

¿Jasa tʼilan oj kʼuluk bʼajtanto oj kiʼ jaʼ? Tʼilani oja wiʼ juna sakʼanil jastalni wa sjeʼa ja Biblia sok yaljelyabʼ ja tuk kristyanoʼik sbʼaja jas waxa kʼuʼani. Cha jelni tʼilan oja wilabʼaj lek soka Dyosi, bʼa oj lajxukawuj tʼilani oja kʼul estudiar sok yajelyi orasyon. Jelni tʼilan oja waʼteltay ja Jyoba yujni weʼn waxa kʼana sok mini jaʼuk yuja tuk wa xyalawabʼi.

¿Janekʼ ja jabʼil bʼa oj bʼobʼ kiʼ jaʼ? Mini jaʼuk mas tʼilan ja janekʼ jabʼila wiʼoj. Pe, tʼilani oja wabʼ lek stojol ja jas wa stojolan yajelyi jawa sakʼanil ja Jyoba.

¿Jasa oj kʼuluk ta wa xkʼana oj kiʼ jaʼ pe ja jnantati wa xyalawekabʼ ke oj majlay? Ta ja yeʼnle wa spensarane ke wanto skʼanawuj tyempo bʼa yajel makunuk ja rasonik bʼa Biblia kʼuʼan yile, sok amakunuk ja tyempo bʼa yajel yijbʼuk ja jastal waxa wilabʼaj soka Jyoba (1 Samuel 2:26).

[Recuadro]

Slam bʼa spensarajel jas oj bʼobʼa kʼuluk

¿wanaxa maʼ spensarajel bʼa oja wiʼ jaʼ?

Ja sjobʼjelik ti jakumi oj skoltaya bʼa oja wil ta wan lajxelawuj bʼa oja wiʼ jaʼ. Pe, ¡mokni chʼayuka kʼujol oja kʼumuk ja tekstoʼik bʼajtanto oja wayi sjakʼjel!

¿Wan maʼ xa jipa akʼujol bʼa Jyoba? ¿Jastal wana sjejel? (Salmo 71:5). ․․․․․

¿Wan maʼ xa naʼa yiljel ja stukil ja bʼa lek soka bʼa mi lekuki ¿Jastik ekʼele wa kʼulunej? (Hebreos 5:14). ․․․․․

¿Tikʼan maʼ waxa wayi orasyon?. ․․․․․

¿Wan maʼ xa wala ja jastik mas tʼilan ja bʼa wa worasyoniki? ¿Wan maʼ sjeʼa ja jas waxa wala ke waxa yajtay ja Jyoba? (Salmo 17:6). ․․․․․

¿Jasa waxa kʼana yajel tojbʼuk ja bʼa wa worasyoniki? ․․․․․

¿Tikʼan maʼ waxa kʼulan estudiar ja Biblia? (Josué 1:8). ․․․․․

¿Bʼa jastik waxa kʼulan estudiar atuchʼil? ․․․․․

¿Jastik kʼelsat waxa kʼana oj ajyukawuj ja yajni waxa kʼulan estudiar atuchʼil? ․․․․․

¿Oj maʼ wal ke jel lek ja jastal waxa cholo? (Jun sjejel: ¿Wan maʼ xa naʼa xcholjel ja jas mas tʼilan wa sjeʼa ja Biblia? ¿Wan maʼ la kumxi yulatajel ja matik wa skisawe ja rasoni? ¿Wana maʼ slejel modo stajel juna westudio bʼa Biblia?)

□ Wan □ Miyuk

¿Wan maʼ la el xcholjel anima mi x-elye jawa nantati? (Hechos 5:42).

□ Wan □ Miyuk

¿Jastik kʼelsat waxa kʼana oj ajyukawuj ja bʼa xcholjeli? (2 Timoteo 2:15).

¿Wan maʼ la och yibʼanal ja reunioni ma jel tikʼan waxa chʼaya? (Hebreos 10:25).

¿Bʼa jastik modo wala koltani?

Ta waxa kʼanayi permiso jawa nantati, ¿wan maʼ la waj ja bʼa reunionik yajni ja yeʼnle mi xbʼobʼ wajuke?

□ Wan □ Miyuk

¿Oj maʼ wal waxa wabʼ stsamalil skʼulajel ja jas wa skʼana ja Dyosi? (Salmo 40:8).

□ Wan □ Miyuk

¿Wan maʼ xjula kʼujol bʼa jun ekʼele mi skʼulana ganar ja stʼenwanel jawa mojiki? (Romanos 12:2).

¿Jasa waxa pensaran oja kʼuluk bʼa nunka oj chʼayuk ja yajtanela wiʼoj bʼa Jyoba? (Judas 20, 21).

¿Ojto maʼ waʼteltay ja Jyoba ta jawa nantat ma jawa wamigoʼik xyawekan ja smeranili? (Mateo 10:36, 37).

□ Ojo □ Miyuk

[Dibujo]

Ja stsajel bʼa yijel jaʼ jachni jastal ja bʼa nupanel: tʼilani spensarajel lek