KAPITULO 8

¿Jastal kʼotele ja lekil amigo’ik?

«Yajni tajkel ayon, wani xkʼana ay ma’ oj kalyabʼ ja jastal ayon xkabʼi.Ta triste’ayon, wani xkʼana oj aljukabʼ lek oj chʼak elkʼot ja jastiki. Sok ta gusto’ayon, wani xkʼana ay ma’ oj kalyabʼi. B’a keʼna, ja amigoʼiki jelni tʼilane» (Brittany).

JUJUNTIK wa xyalawe ke ja yal untiki wani skʼana smoje tajnel, sok jaxa ma’ wan soltero’axeli, yamigo’e. Pe ¿jasa stukili?

Juna moj tajnel wani smojtaya.

Juna wamigo wani slaja sbʼaj soka jas waxa kʼuʼani.

Ja Biblia cha wa sjeʼa ke jun meran amigo’al «wa xkʼanwani spetsanil tyempo, sok wa sjeʼa sbʼaj lajansok juna wermano ja yajni wan ekʼel wokoli» (Proverbios 17:17). Ja jastal waxa wilabʼajsok jun meran amigo, mastoni tsats ke yuja jastal wa xyila sbʼaje ja yal untiki.

Ja smeranili, yajni wan julel jawa kʼujoli ojni makunukawuj amigo’ik b’a...

1) ... ayiʼoje lekil modoʼalik.

2) ... wa xyawe makunuk ja lekil rasonik snebʼuneje.

3) ... akʼotuke jun lekil sjejel b’a weʼna.

Ja sjobʼjeli: ¿Jastal oj bʼobʼa ta’ wa wamigo’ik b’a jachuke jastal it? La kiltik bʼa jujune ja jas ti chʼikan ja b’a oxe jasunuk it.

Bʼajtan: Lekil modoʼalik

Ja jas tʼilan oja naʼ. Mini yibʼanaluk ja maʼ wa xyala kʼotele juna wamigo jachuke jastal wa xmajlaxi bʼa jun amigo. Ja Yabʼal ja Dyos wa xyala «ayni jmojtik bʼa puestoxta aye bʼa yeʼnta oj xchʼaykʼujoluk sbʼaje» (Proverbios 18:24). Bʼobʼta lajansok jelxelxa b’a weʼna, pe pensaraʼan: ¿Ay ma’ b’a ajyelawuj juna «wamigo» b’a yaʼunej el slekilal b’a weʼna, b’a skʼenuneja spatika tsʼeʼel sok yalunej jastik junuk mi meranuk b’a weʼna? ¿Mi ma’ meranuk ja jastik it wani xbʼobʼ xchʼay ja jastal waxa jipakʼujol jawa wamigo? * Ajuluka kʼujol, ja mas tʼilani mi jaʼuk ja janekʼ wa wamigo’ik awiʼoj, jani ta kʼotele lekil amigo’ik.

Ja jas oj bʼobʼa kʼuluki. Tsaʼa awamigo’ik b’a ayiʼoje lekil modoʼalik.

«Spetsanil ja kristyano jelni lek staʼawe ti’al ja b’a kamiga Fiona. Jelni xkʼana kʼotel jastal yeʼna sok oj tajukon tiʼal jastalni ja yeʼn. Jelni chaʼanyabʼal xkila» (Yvette, b’a 17 jabʼil).

Kʼulan ja it:

1. Kʼuman ja Gálatas 5:22, 23.

2. Job’o abʼaj: «¿Ay ma’ yiʼoje ja kamigo’ik ja modoʼalik b’a ti chʼikan ‹ja b’a satinel ja yip ja Dyosi›?».

3. Tsʼijbʼan ja sbʼiʼil jawa wamigo’ik mas kʼubʼan awiʼoji sok ja jastik lek yiʼoji.

Sbʼiʼil

․․․․․

Jastik yi’oj

․․․․․

Jun rason: Ta kechan wa x-ekʼ b’a wa pensar jastik mi lekuk yi’oj, bʼobʼta jani sjutsʼinil oja tukbʼes jawa wamigoʼiki.

Xchabʼil: Lekil rasonik snebʼuneje

Ja jas tʼilan oja naʼ. Ta wego waxa kʼana oja ta’a wamigo’ik, bʼobʼta masni mi jel oja ta’e. Sok nunka mok chʼayuka kʼujol ja jas wa xyala ja Biblia sbʼaja it: «Ja maʼ wa smojtay ja matik sonso mini lek oj elkʼota» (Proverbios 13:20). Ja il ja yaljel «sonso», mini jaʼ kʼoteluk ja kristyano’ik b’a mi lek x-elyujile ja scalificacione ja b’a eskuela ma mi jel snaʼawe skʼulajel jun jasunuk, jani kʼotel ja matik wa sjeʼa jun smodo’e b’a mi snaʼawe kʼinal sok kaprechudo’e. ¿Anke meran mixa kʼana oj ajyuka wamigo’ik jastal it?

Ja jas oj bʼobʼa kʼuluki. Tsaʼa lek jawa wamigo’ik; sok mok chikan ma’ oja tsaʼe (Salmo 26:4). Ja’it mi wa xkʼan yal oja wil menos ja tuki. Wani stojolan tʼilan oja k’el lek b’a oja naʼ ja «stukil yiʼoj june maʼ toj sok june maʼ malo, ja stukil june maʼ wa xyaʼteltay ja Dyos sok june maʼ mi xyaʼteltay» (Malaquías 3:18).

«Jelni gusto’ayon yuja jnantat skoltayone stajel lekil kamigo’ik, keremtik b’a jabʼil sok b’a tsats lek wane yaʼteltajel ja Jyoba» (Christopher, b’a 13 jabʼil).

Ayi sjakʼjel ja sjobʼjelik it:

¿Wan ma’ la xiw oj stʼena jawa wamigo’ik b’a oja kʼul jun jasunuk waxa naʼa ke mi lekuk?

□ Wan

□ Miyuk

¿Mi maʼ xa kʼana oja kʼulyi presentar jawa nantat yuja waxa k’u’an mi lek oj yil-e?

□ Wan

□ Miyuk

Jun rason: Ta wayi sjakʼjel ke wan, masni lek le’a wamigo’ik b’a wa xyawe makunuk ja lekil rason snebʼuneje, b’a tini aye ja b’a yaʼtijumik Dyos b’a wa xyaʼawe jun lekil sjejel.

Yoxil: Jun lekil sjejel b’a weʼna

Ja jas tʼilan oja naʼ. Ja Yabʼal ja Dyos wa xyala ke «ja matik mi lek smojtajeleʼi wa sjomo ja lekil jmodotiki» (1 Corintios 15:33). Jachni wa sjeʼa ja jas ekʼ sbʼaj ja Lauren, ja yeʼn wa xyala: «Ja ke’n wani xkʼana ke ja jmojik b’a eskuela a-skisone. Pe b’a oj skisone tʼilani oj kʼuluk ja jas wa xyalawe kabʼi. Sok yuja tuchʼil ayon xkabʼi, kʼeni jkʼuluk jastal yeʼnle b’a oj lajbʼajsoke». Ja smeranili, ta waxa kʼulan ja jas wa skʼulane’i, jastalni ja Lauren, kechani oj kʼotan jastal jun tikʼe ixta’al b’a oja kʼuluk ja jas wa skʼanawe’i. ¿Ja ma’ jaw ja jas waxa kʼana ja weʼn?

Ja jas oj bʼobʼa kʼuluki. A’akan smojtajel ja matik wa skʼulana obligar oja tukbʼes ja jastal kʼotela sok oja wiʼ ja tikʼe sakʼanil yiʼoje. Bʼobʼta maxani mi oj kanuka wamigo’ik, pe maxani oja wabʼ gusto oj ajyan. Cha maxani oja ta’ modo’ik b’a stajela wamigo’ik b’a oj kʼotuke jun lekil sjejel b’a weʼna (Romanos 12:2).

«June ja b’a lekil kamigo’ik wa sbʼiʼilan Clint. Ja yeʼn mini xjelxi sok wani xyabʼ stojol b’a tolabida wa stsatsankʼujolanon» (Jason, b’a 21 jabʼil).

Ayi sjakʼjel ja sjobʼjelik it:

¿Wan maʼ xa tukbʼes ja jastal waxa kʼutesabʼaj, ja wala kʼumani ma ja jas waxa kʼulan b’a kechanta yajel gusto’axuk jawa wamigo’ik?

□ Wan

□ Miyuk

¿Wan ma’ la waj b’a lugarik mi jel lekuk yuja wa xwaj ja yeʼnleʼi?

□ Wan

□ Miyuk

Jun rason: Ta waʼunejyi sjakʼjel stojol lek ja b’a sjobʼjelik ja b’a slam ekʼta, ala yabʼ jawa nantat ma june ma’ ayxa skʼujol b’a a-skoltaya stsajel jawa wamigo’ik b’a oj kʼotuke jun lekil sjejel b’a weʼna. Sok ta testigo’a b’a Jyoba, ojni bʼobʼa ta’ loʼil jun ansyano ja b’a wa kongregasyon.

OJA TAʼ MAS XCHOLJEL JA B’A KAPITULO 9 JA B’A XCHAB’IL VOLUMEN

JA BʼA KAPITULO JAKUMIR

¿Ay ma’ akʼubʼala ochan probar, ma ay maʼ b’a awabʼunej oja kʼuluk jun jasunuk waxa naʼa ke mi lekuk?

[Nota]

RASON BʼA BIBLIA

«Ay jun kamigotik mas kʼubʼan yuj jun kermanotik» (Proverbios 18:24).

JUN MODO BʼA SKʼULAJEL

Kʼujolan bʼa oj wa makunuk ja jastik lek anebʼuneji. Jachuk ja maʼ junxta cha wa skʼana oj skʼuluki ojni mojxuke amok. ¡Sok ja yeʼnleʼi ojni kʼotuke lekila wamigoʼik!

¿WAN MAʼ XA NAʼA JA IT?

Ama ja Dyos mini kechanta june maʼ lek xyila, pe wantani stsaʼa ja maʼ oj yamigoʼuki (Salmo 15:1-5).

¡KʼEʼAN KʼULAN!

¿Jasa oj kʼuluk bʼa oj taʼ lekil kamigoʼik? ․․․․․

Jani ja kristyanoʼik it bʼa ayxa skʼujole bʼa wa xkʼana oj naʼ sbʼaje leki: ․․․․․

¿Jasa wa xkʼana oj jobʼyi ja jnantat sbʼaja tema it? ․․․․․

JA WEʼN, ¿JAS WAXA PENSARAʼAN?

● ¿Jas modoʼal mas chaʼanyabʼal waxa wila bʼa jun amigo? Xcholo jas yuj.

● ¿Jasa tʼilan oja kʼuluk bʼa oj kʼotan jun lekil amigo?

[Xcholjel]

«Ja jnantati yaweki rason la kakan smojtajel jujuntik kamigo’ik. Ja bʼajtanto mini xkʼana oj kʼuluk pes wa xpensaraʼan kechan yeʼnle ja wa xkilabʼajesok leki. Pe juni lekil rason, sok yajni kʼot naʼ sbʼaje leki, kaʼa jbʼaj kuenta ke ayto kristyano’ik mas leke b’a yamigoʼajel» (Carlos).

[Recuadro]

Pilan modoʼik bʼa skʼulajel

Loʼilanansok jawa nantat sbʼaja tema. Jobʼoyile jastal ja yamigoʼe yajni jachuketo jastal wa jabʼil. ¿Ay maʼ bʼa jun ekʼele mi lek stsaʼawe ja yamigoʼe? ¿Jas yuj? Jobʼoyile jas tojelal wa xbʼobʼ yawi bʼa mi oja chʼikabʼaj wokol.

Kʼulanyile presentar jawa wamigoʼik jawa nantati. Ta mixa kʼana oja kʼuluk, jobʼo abʼaj jas yuj. ¿Yuj maʼ ay jun jasunuk waxa naʼa mi oj skʼuluke gusto jawa nantati? Ta jachuk, bʼobʼta tʼilani oja tsaʼ lek jawa wamigoʼiki.

Maklay lek jawa wamigoʼik. Jeʼa waxa kisa ja jas wa spensaran sok wa xchamakʼujol ja jastal ayi (Filipenses 2:4).

Abʼan stojole sok aʼa perdon. Moka majlay mixa oj skʼul payar jawa wamigoʼiki. Jastalni wa xyala ja Santiago 3:2, «kibʼanaltik wa xleʼa jmultik».

Moka kʼula tuchʼil ja jastiki. Ta meran amigoʼe, tini oj ajyuke amok yajni mas wa xmakuniwuji (Eclesiastés 4:9, 10).

[Poto]

Ta waxa kʼulan ja jas wa skʼulane’i, kechani oj kʼotan jastal jun tikʼe ixta’al b’a oja kʼuluk ja jas wa skʼanawe’i