Xetʼan 9

Ja matik wax ya‘teltay ja Dyosi tʼilan toj sok asyado oj ajyuke

¿Jas yuj tʼilan toj sok asyado oj ajyukotik? (1)

¿Jastal ma‘ oj bʼobʼ ka‘teltaytik toj ja Dyosi? (2)

¿Jastal ma‘ oj ajyuk toj ja jmodotiki? (3)

¿Jastal oj ajyuk toj ja jpensartiki? (4)

¿Jastal ma‘ oj bʼobʼ ajyukotik asyado? (5)

¿Jas tikʼe kʼumal mi lekuk yaljel mi oj jnebʼ ja ke‘ntiki? (6)

1. Ja Jyobaji jel sak sok toj. Ja ye‘n wani skʼana ja matik wax a‘teltajiyuji tʼilan toj oj ajyuk ja ya‘teltajel wax yawe yi‘i, ja smodo‘e‘i, ja jas wa spensarane‘i, sok asyado oj ajyuke (1 Pedro 1:16, YT). Tʼilan oj kʼujoluktik bʼa oj ajyukotik toj bʼa sti‘ sat ja Dyosi. Ja bʼa lu‘umi jel ja jastik junuk bʼa mi lekuki. Chomajkil ja jpensartiki tolabida ja wajel skʼujol skʼulajel ja bʼa mi lekuki, pe, mok katikan aya kokotik lu‘um ja jaw.

2. Ya‘teltajel toj ja Dyosi: Wan kʼa xkʼana oj ka‘teltaytik ja Dyosi ojni jiptikan spetsanil sjejel soka jas kʼajyel wax kʼulaxi ja bʼa relijyon mi meranuki. Ojni elkotik ja bʼa relijyon mi meranuki, sok mi oj jkʼuluktik ja jas wa skʼulane‘i (2 Corintios 6:14-18; Apocalipsis 18:4). Jnebʼatik ta kʼa ja smeranil sbʼa ja Dyosi, tʼilan oj talnay jbʼajtik bʼa mi oj slolayotik ja matik mi sje‘a jastal oj ka‘teltaytik toj ja Dyosi (2 Juan 10, 11).

3. Modo bʼa toj: Ja Jyobaji wani skʼana ja ya‘tum jumasa‘ oj sje‘e jun smodo‘e bʼa toj chikan bʼa wax taxye-ekʼa (1 Pedro 2:12). Ja ye‘n wax yila spetsanil ja jas wax kʼulantiki, ama nakʼuluk (Hebreos  4:13). Mini oj kokotik mulal sok jun ixuk ma‘ winik bʼa mi ja‘uk ja jnuptiki, ma‘ chikan xa jas junuk wa skʼulan ja ixuk winike‘i bʼa mi lekuk (1 Corintios 6:9-11).

4. Pensar bʼa toj: Ta wax bʼutʼutik ja jpensartiki sok jastik junuk bʼa toj, ja jmodotiki toj ni cha oj ajyuka (Filipenses 4:8). Pe, ta tolabida ja wajel jkʼujoltik ja bʼa mi lekuki, ojni cha jkʼuluktik jastik junuk bʼa mi lekuka (Mateo 15:18-20). Mini oj jmaklaytik sok oj kiltik jastik junuk bʼa wax ya kuxbʼuk ja jpensartiki. Ta wax kʼumantik ja Bibli‘a, jachuk oj jbʼutik ja spensartiki sok jastik junuk bʼa toj.

5. Asyado oj ajyukotik: Jastal ya‘tijum wax je‘a jbʼajtik bʼa Dyos, tʼilan sak oj ajyuk ja jkʼutiki soka jkwerpotiki. Ojni sakʼ ja jkʼabʼtiki ja yajni xchʼak katik makunuk ja letrina, sok bʼajtan oj och wakotik ma‘ oj och jtojbʼestik jun wa‘elal. Yuj kʼa ja bʼa jnajtiki mey drenaje bʼa oj wajuk ja kuxil ja‘i, ojni jmuktik ja jpaxyaltiki (Deuteronomio 23:12, 13). Asyado‘otik kʼa mini jel oj kokotik chamela. Ja snaj ja matik wax ya‘teltay ja Dyosi sak ni oj ajyuka sok tulubʼal lek ja yojoli soka bʼa jwera. Bʼa jachuk oj tajuke ti‘al lek.

6. Kʼumal bʼa lek: Ja ya‘tijum jumasa‘ ja Dyosi tʼilan oj yal-e ja smeranili tolabida. Ja matik mix yala ja smeranili mini oj ajyuke sakʼan ja bʼa tsamal kʼachinubʼ skʼapunej ja Dyosi (Efesios 4:25; Apocalipsis 21:8). Ja ma‘ wax ya‘teltay ja Dyosi mini xyalawe jastik junuk bʼa mi lekuk yabʼjel, mini smaklaye sok mi xyalawe lo‘il bʼa mi lekuk ma‘ tajnel lo‘il bʼa kʼixwela sbʼaj. Wa sje‘a sbʼaje wax ya‘teltaye Dyos yuj lek ja jas wax yalawe‘i ja bʼa eskwela, soka sbesino‘e‘i soka bʼa ya‘tele‘i (Efesios 4:29, 31; 5:3).

[Dibujoʼik ja bʼa slamik 18 sok 19]

Toj sok asyado ni oj ajyuk ja ya‘tijum jumasa‘ ja Dyosi