Xetʼan 13

Jastal oj bʼobʼa na‘ bʼay ja relijyon smeranili

¿Lek ma‘ wax yila spetsanil ja relijyon ja Dyosi, ma‘ kechan june? (1)

¿Jas yuj jel jitsan ja relijyon wax yalawe wax ya‘teltaye meran ja Dyosi? (2)

¿Jastal oja na‘ sbʼaj ja matik wax ya‘teltay meran ja Dyosi? (3-7)

1. Ja Jesusi kechan ya‘akan kulan jun relijyon bʼa wa sje‘a ja smeranili. Ja‘ yuj ja we‘go kechantani ay jun kʼole bʼa wax ya‘teltaye meran ja Jyobaji (Juan 4:23, 24; Efesios 4:4, 5, YT). Ja Bibli‘a wax yala kechan tʼusan ixuk winike ti‘ wane bʼejyel ja bʼa latsʼan bʼej wax yi‘ajotik och bʼa sakʼaniltiki (Mateo 7:13, 14).

2. Ja Bibli‘a yalunej ajyi, ja yajni xchʼak chamuke ja bʼajtan snochuman ja Jesusi, takal takal oj kʼe jexuk sjejel bʼa mi meranuk bʼa yojol ja ya‘tijum jumasa‘ ja Dyosi. Oj bʼi ajyuk ixuk winike oj sjom yi‘ yolom ja tuki bʼa oj nochjuke ja bʼa jas wa sje‘awe‘i sok bʼa oj yawekan snochjel ja Jesusi (Mateo 7:15, 21-23; Hechos 20:29, 30). Ja‘ yuj ja we‘go jel jitsan ja relijyon wax yalawe wax ya‘teltaye meran ja Dyosi. ¿Jastal ma‘ oj natik sbʼaj ja matik wax ya‘teltaye meran ja Dyosi?

3. Jun modo wa sje‘a sbʼaje ja matik wax ya‘teltay meran ja Dyosi ja‘ ni ja jel syajtay sbʼaje‘i (Juan 13:34, 35). Mini je‘ubʼaluk yile jel cha‘an oj ya sbʼaje yuj ja ma‘ tuk ja srasa‘i ma‘ tuk ja yelawi. Mini je‘ubʼaluk yile oj yilkʼujoluke ja matik sbʼa bʼa tuk chonabʼi (Hechos 10:34, 35). Ja‘ yuj ja ye‘nle‘i mix wajye ja bʼa kʼakʼaneli. Ja matik wane ya‘teltajel meran ja Dyosi wax yila sbʼaje jastal smoj-alijel sbʼaje (1 Juan 4:20, 21).

4. Pilan modo wa sje‘a sbʼaje wax ya‘teltaye meran ja Dyosi ja‘a wa skisawe lek ja Bibli‘a‘i. Wa skʼu‘ane ja Bibli‘a Yabʼal ni Dyosa sok wa skʼu‘ane ja jas wax yala (Juan 17:17; 2 Timoteo 3:16, 17). Mas ni tʼilan xyilawe ja yabʼal ja Dyosi yuja jas wa spensarane sok ja jas wa skʼulane ja ixuk winike‘i (Mateo 15:1-3, 7-9). Ja jas wa snebʼawe bʼa Bibli‘a ja‘wa skʼulane ja bʼa sakʼanile‘i. Ja jas wa sje‘awe yi‘ ja tuki, ja‘ ni cha wa skʼulane ja bʼa sakʼanile‘i (Tito 1:15, 16).

 5. Ja matik wax ya‘teltay meran ja Dyosi wani xyawe cha‘anbʼuk ja sbʼi‘il ja Ye‘n (Mateo 6:9). Ja Dyosi sbʼi‘il Jyoba. Ja Jesusi sje‘a yi‘ ja ixuk winike‘i ja bʼi‘ilal it, junxta ni oj cha skʼuluke ja matik wax ya‘teltay ja Dyosi (Juan 17:6, 26; Romanos 10:13, 14). ¿Ma‘chtik ma‘ wa sta‘a ti‘al ja sbʼi‘il ja Dyosi ja bʼa kulana?

6. Ja matik wax ya‘teltay ja Dyosi ojni xchol-e ekʼe ja lekil rason ja bʼa mandaranum stsa‘unej ja Dyosi. Ja Jesusi tolabida sta‘a ti‘al ja mandaranum it (Lucas 8:1). Cha yalayabʼ ja snochuman jumasa‘ askʼuluke ja a‘tel it bʼa sutanal ja lu‘umkʼinali (Mateo 24:14, YT; Mat. 28:19, 20). Ja matik wax ya‘teltay ja Dyosi wani skʼu‘ane kechanta ja mandaranum stsa‘unej ja Dyosi oj ya ajyuk sakʼan gusto ja ixuk winike‘i sok oj yijan slamanil ja bʼa lu‘umi (Salmo 146:3-5).

7. Ja matik wa snochowe ja Jesusi mini skʼulane ja jastik bʼa mi lekuk wa skʼulan ja ixuk winike‘i (Juan 17:16). Mini xchʼika sbʼaje stsajel ma‘ oj och kan xchol ma‘ oj ke‘uke kʼumal sbʼaj ja ma‘ ay xcholi. Mini spensarane junxta jastal ja matik mix ya‘teltay ja Dyosi sok mi skʼulane ja jas wa skʼulane‘i (Santiago 1:27; 4:4). ¿Wan ma‘ xa na‘a sbʼaj jun relijyon bʼa wa skʼulane ja jastik junuk it bʼa wa sje‘awe meran wane ya‘teltajel ja Dyosi?

[Dibujoʼik ja bʼa slamik 26 sok 27]

Ja matik wax ya‘teltay meran ja Dyosi wani syajtay sbʼaje, wa skisawe ja Bibli‘a sok wa sta‘awe ti‘al ja mandaranum stsa‘unej ja Dyosi