Xetʼan 7

Jastal oj mojxukotik soka Dyos bʼa orasyon

¿Jas yuj tʼilan oja wayi ja‘wa worasyon tolabida? (1)

¿Ma‘ oja kʼumuk ja bʼa wa worasyoni sok jastal oja kʼumuk? (2, 3)

¿Jastik ma‘ junuk oj bʼobʼa kʼan ja bʼa wa worasyoni? (4)

¿Chikan ma‘ jas ora oj bʼobʼa wayi ja‘wa worasyoni? (5, 6)

¿Wan ma‘ smaklay spetsanil ja orasyon ja Dyosi? (7)

1. Yajel orasyon wa stojolan lolanel soka Dyosi. Tʼilan oj kati yi‘ orasyon ja Dyosi tolabida. Jachʼ kʼa wax kʼulantik oj kiltik ja Dyosi jastal jun kamigotik bʼa jel xkʼanatik. Anke ja Jyobaji jel niwan sok jel ja yipi, gustolek wa smakla ja yajni wax katik yi‘ orasyoni. ¿Wan ma‘ xa wayi orasyon tolabida ja Dyosi? (Salmo 65:2; 1 Tesalonicenses 5:17).

2. Ja orasyoni tini chʼikan ja bʼa stoyjel wax katik yi‘ ja Dyosi. Ja‘ yujil kechantani oj kʼumuktik ja Jyobaji ja bʼa korasyontiki. Yajni ti‘ ajyi bʼa lu‘um ja Jesusi, kechantani wax yayi orasyon tolabida ja Jyobaji. Ojni cha jnochtik yi‘ ja smodo jaw (Mateo  4:10; 6:9). Ja korasyontiki ojni katik yi‘ bʼa sbʼi‘il ja Jesusi. Jachuk wa xje‘atik wantik skisjel ja xchol yi‘oji sok wax kʼu‘antik ya‘a ja sakʼanili bʼa oj skoltayotik (Juan 14:6; 1 Juan 2:1, 2).

3. Tini oj el bʼa jkʼujoltik ja jas wax kaltik yabʼ ja Dyosi. Mini junxta oj kaltik ja korasyontiki ja yajni xkʼumantik ja Dyosi, mini cha ti‘ oj jkʼumuktik bʼa jun ju‘un bʼa tsʼijbʼunubʼal xa ja jas oj kaltiki (Mateo 6:7, 8). Oj bʼobʼ ajyukotik tekʼan, kulan ma‘ mekʼan ja yajni xkʼumantik ja Dyosi, chikan bʼa wala taxtik ekʼa chikan jas ora‘il oj bʼobʼ katik yi‘ ja korasyontiki. Ama kechan wan kʼumal ja jkʼujoltiki ja Dyosi wax yabʼi (1 Samuel 1:12, 13). Yuj kʼa oj kʼuluktik jun orasyon bʼa sakʼanil ke‘ntik ta tini oj katik yi‘ bʼa jun lugar bʼa jtuchʼiltik (Marcos 1:35).

4. ¿Jastik ma‘ junuk oj bʼobʼa kʼan ja bʼa wa worasyoni? Chikan jas junuk bʼa oj skoltaya ja bʼa jastal waxa wila bʼaj soka Jyobaji (Filipenses 4:6, 7). Ja orasyon sje‘akan ja Jesusi wa sje‘a oj jkʼantik aniwanbʼuk ja sbʼi‘il ja Dyosi, sok akʼotuk ja jas wa skʼana ja ye‘n. Chomajkil ojni bʼobʼ jkʼantik yi‘ ja jas wax makunikujtiki bʼa oj ajyukotik sakʼan, askus ja jmultiki, sok bʼa oj kuchkujtik bʼa mi oj jkʼuluktik ja jastik junuk mi lekuki (Mateo 6:9-13). Ja bʼa korasyontiki mi kechanuk oj jkʼantik ja jas wax makunikujtik ja ke‘ntiki. Kechan wax bʼobʼ jkʼantik jastik junuk bʼa lek wax yila ja Dyosi (1 Juan 5:14).

5. Ojni bʼobʼa wayi ja‘wa worasyoni chikan jas ora wax yala ja‘wa kʼujol oja wayi tsʼakatal sok oja tsʼebʼantay ja Dyosi (1 Crónicas 29:10-13). Moka wakan yajel ja orasyoni ja yajni wan ekʼela bʼaj wokoli soka yajni wan ixtalajel ja skʼu‘ajel awi‘oj soka Dyosi (Salmo 120:1; 1 Pedro 5:7). Bʼajtanto yuj och wa‘an tʼilani oja wayi tsʼakatal ja Dyosi yuja wa wa‘eli (Mateo 14:19). Ja Jyobaji was lokowotik oj katik yi‘ orasyon «kʼakʼu kʼakʼu» (Efesios 6:18).

6. Yuj kʼa jle‘atik jun niwan jmultik, ojni katik yi‘ orasyon ja Jyobaji sok oj kʼantik yi‘ asna‘ jyajaltik sok askus ja jmultik jaw. Ja Dyosi ojni «skus ja jmultiki» ta wax kaltik yabʼ ja jas jkʼulantiki sok ta wax kipantay jbʼajtik bʼa mixa oj jkʼulutik pilan ekʼele ja jas jkʼulantik ta (Salmo 86:5; Proverbios 28:13).

7. Ja Jyobaji kechan wa smaklay ja yorasyon ja ma‘ toj ay ja bʼa sti‘ sati. Bʼa oj smaklay ja Dyos ja‘wa worasyoni, tʼilani oja wipantabʼa bʼa oja kʼu‘uk ja mandar jumasa‘ ya‘uneji (Proverbios 28:9; 1 Pedro 3:12). Ja yajni xa wayi ja‘wa worasyoni tʼilan oja je chʼin waxa wa‘a bʼaj (Lucas 18:9-14). Ja jas waxa kʼana ja bʼa wa worasyoni ja‘ ni oj cha wa je soka jas waxa kʼulani. Jachuk oja je waxa jipa wa kʼujol bʼa Dyos sok waxa jama yi‘ ja‘wa kʼujoli ja yajni waxa wa‘yi orasyoni. Kechan jachuk ja Jyobaji oj sja‘kʼ ja‘wa worasyoni (Hebreos 11:6).