Xetʼan 14

¿Jastal tojbʼel ja a‘tel wa skʼulane ja ta‘umanti‘ jumasa‘ bʼa Jyobaji?

¿Jas ma‘ jabʼilil kʼejan ja ya‘tele bʼa jtyempotik xa ja ta‘umanti‘ jumasa‘ bʼa Jyobaji? (1)

¿Jastal ma‘ wa skʼulane ja stsomjele ja Ta‘umanti‘ jumasa‘? (2)

¿Bʼa ma‘ wax el ja takʼin soka a‘tel wa skʼulane‘i? (3)

¿Ma‘chunkʼiluk ma‘ ja olomal wa sje‘a ja bʼa tuktukil tsome bʼa ta‘umanti‘ jumasa‘ bʼa Jyobaji? (4)

¿Jas ma‘ tuk stsomjele wa skʼulane jachʼ jabʼil jabʼil? (5)

¿Jas ma‘ a‘tel wa xkʼulaxi ja bʼa opisina‘ik olomal ay soka bʼa tuktukil opisina‘ik bʼa spetsanil ja lu‘umi? (6)

1. Bʼa jabʼil 1870, kʼejan ja ya‘tele bʼa jtyempotik xa ja ta‘umanti‘ jumasa‘ bʼa Jyobaji. Ja yajni kʼeyejani wa xnaji sbʼaje jastal Matik wa Skʼumane ja Bibli‘a‘i, pe, bʼa jabʼil 1931 yi‘aje ja sbʼi‘ile wax tax bʼa yojol ja Bibli‘a jastal ta‘umanti‘ jumasa‘ bʼa Jyoba (Isaías 43:10). Man kʼeye jani ja yal tsome Ta‘umanti‘ jumasa‘ jaw pojxita ele bʼa jitsan miyon ixuk winik bʼa wa sje‘awe yi‘ ja tuki ja jas wax yala ja Bibli‘a bʼa mas ja 230 chonabʼ jumasa‘.

2. Tʼusan mi spetsaniluk ja Ta‘umanti‘ jumasa‘ wa stsomo sbʼaje oxe ekʼele ja semana‘i. Wax lokowatikon bʼa oja tsoma bʼaj sok ye‘nle (Hebreos 10:24, 25). Ja jas wax jexi‘i ti‘ wax el bʼa Bibli‘a. Ja stsomjele‘i wax kʼe sok jun orasyon sok jachuk ja yajni wax chʼaki, cha wa stsʼebʼantaye sok spetsanil skʼujole ja Dyosi tsʼebʼoj jumasa‘ (Efesios 5:18, 19). Mi oja tup bʼa oj ochan sok mix kʼanji takʼin ja bʼa yojoli (Mateo 10:8).

3. Tʼusan mi spetsaniluk ja ya‘tijum ja Dyosi ti‘ wa stsomo sbʼaje bʼa jun na‘its skʼuluneje ye‘nle; ja lugar it wa sbʼi‘ilan Na‘its bʼa wa Stsomo sbʼaje ja Ta‘umanti‘ jumasa‘ bʼa Jyobaji. Ja bʼa yojoli mey kʼulubʼal dyos ma‘ krus ma‘ chikan xa jas junuk jastal jaw. Ja takʼin wa xchʼakawe soka a‘tel wa skʼulane‘i ti‘ wax el bʼa takʼin wax ya‘awe sok spetsanil skʼujole ja ixuk winike jumasa‘ bʼa spetsanil ja lu‘umi. Ja matik wax yala skʼujol oj ya‘e takʼin oj bʼobʼ ya‘ekan bʼa jujuntik yal kaja kʼulubʼal bʼa it (2 Corintios 9:7).

 4. Bʼa spetsanil tsome Ta‘umanti‘ ay ansyano‘ik, ja winike it ye‘nle ja olomal bʼa sjejel yi‘ ja matik wa stsomo sbʼajsoki ja jas wax yala ja Bibli‘a‘i (1 Timoteo 3:1-7; 5:17, YT). Chomajkil ay tuk winike wax a‘tiye jastal skoltuman ansyano‘ik (1 Timoteo 3:8-10, 12, 13). Mini mas tʼilanuke yuj ja tuk ya‘tijum ja Dyosi (2 Corintios 1:24). Mini x-ajiyile jun sbʼi‘ile bʼa cha‘an lek yabʼalil (Mateo 23:8-10). Mini tuk wa slapa ja skʼu‘e‘i yuj ja tuk smoje‘i. Mini syama stsʼakole soka a‘tel wa skʼulane‘i. Ja ansyano‘iki gustolek wa skoltay ja tuk smoje‘i bʼa jastal oj ya‘teltaye ja Dyosi. Sok wa skoltaye sok wa stsatsankʼujolane ja yajni wan ekʼel sbʼaje wokoli (Santiago 5:14-16; 1 Pedro 5:2, 3).

5. Ja Ta‘umanti‘ jumasa‘ wani skʼulane niwak stsomjele jabʼil jabʼil. Ja bʼa stsomjele jaw wa sta‘a sbʼaj jitsan ixuk winik bʼa oj smaklaye lo‘ilik elel bʼa Bibli‘a. Bʼa spetsanil ja stsomjele jaw wax yi‘aje ja‘ ja yajkʼachil ta‘umanti‘ jumasa‘ bʼa Jyobaji (Mateo 3:13-17; 28:19, 20).

6. Bʼa xchonabʼil Nueva York, tey tiw ja opisina‘ik bʼa wax kʼelxi ja a‘tel wa skʼulane bʼa spetsanil lu‘um ja Ta‘umanti‘ jumasa‘. Chomajkil tey tiw jun tsome ansyano bʼa jitsan xa jabʼil wane ya‘teltajeljan ja Dyosi, ye‘nle ja olomale bʼa skʼeljel spetsanil ja ya‘tele ja Ta‘umanti‘ jumasa‘ bʼa lu‘umi, ja ye‘nle‘i wa sbʼi‘ilane Tsome wax Tojwani. Bʼa spetsanil ja lu‘umi ay mas ja 100 na‘its bʼa ay tuktukil opisina‘ik bʼa wax a‘tiye jitsan ta‘umanti‘ jumasa‘ bʼa Jyoba. Ja matik wax a‘tiye ja bʼa opisina‘ik jaw, wa stojbʼese sok wa sjekawe ju‘un jumasa‘ jastal it bʼa tuktukil lugar. Ja bʼa opisina‘ik jaw, ti‘ wax kʼelxi ja a‘tel bʼa spukjel ekʼe ja lekil rason wa skʼulane ja Ta‘umanti‘ jumasa‘. ¿Jas yuj mix waja wulatay ja opisina‘ik bʼa wax a‘tiye ja Ta‘umanti‘ jumasa‘ bʼa mas mojana wi‘oji?