Xetʼan 10

Jastik wa skʼulan ja ixuk winike‘i bʼa mi lek xyila ja Dyosi

¿Jastal ma‘ oj kiltik ja jastik mi lek oj kʼulaxuk wax yala ja Dyosi? (1)

¿Jas ekʼele mi lekuk wayel sok jun ixuk ma‘ winik? (2)

¿Lek ma‘ slejel abʼal? (3)

¿Lek ma‘ tajnel sok takʼin? (3)

¿Lek ma‘ elkʼanel? (3)

¿Lek ma‘ ixta oj kiltik ja tuki? (4)

¿Lek ma‘ a‘tel sok ja pukuj jumasa‘? (5)

¿Lek ma‘ oj yakbʼukotik? (6)

¿Jas ma‘ oj bʼobʼ skoltayotik bʼa oj kijnaytik ja bʼa mi lekuki? (7)

1. Tini oj el bʼa jkʼujoltik skʼulajel ja bʼa leki bʼa jachuk oj kʼuluktik ja jas wa skʼana ja Dyosi sok oj kijnaytik ja bʼa mi lekuki (Romanos 12:9). Ja iti wax kʼan yal ja ke‘ntiki mini xkʼulantik ja jastik junuk mi lek xyila ja Dyosi. ¿Jastik ma‘a jaw?

2. Ko‘el mulal sok ixuk ma‘ winik: Ko‘el mulal sok ixuk ma‘ winik bʼa mi nupanelukasok ma‘ yijel yi‘ spatik ja‘wa che‘umi ma‘ wa tatami sok pilan ixuk winik, wayel sok chante, yijel sbʼaj jachʼ ita spamilya sbʼaje, yijel sbʼaj winik sok winik ma‘ ixuk sok ixuk, spetsanil ja it niwak mulal bʼa sti‘ sat ja Dyosi (Levítico 18:6; Romanos 1:26, 27; 1 Corintios 6:9, 10). Ojni yakan sbʼaje ta jun ixuk sok jun winik lajan xa aye pe, mito kʼa nupaneluke. Lajan xa kʼa wax kʼan ajyuke ojni nupanuke‘ela (Hebreos 13:4).

3. Slejel abʼal, tajnel sok takʼin sok elkʼanel: Ja Jyobaji mini sle‘a abʼala (Tito 1:2). Mini oj sle‘e abʼal ja matik wa skʼanawe oj iljuke lek yuja ye‘n (Proverbios 6:16-19; Colosenses 3:9, 10). Ja matik wax ya‘teltay ja Dyosi mini xtajniye sok takʼin, jastal bʼa wax ajni kawuj, bʼa wax tiro‘aniye gallo ma‘ chikan jas junuka. ¿Jas yuj mix tajniye sok takʼin? Pes yujni wa sjomo ja spensar ja ixuk winike‘i bʼa oj skʼan oj sta‘e  mas ja bʼa janekʼ xa yi‘oje‘i (Efesios 5:3-5, YT). Mini x-elkʼaniye, mini smanawe jun jas junuk wa sna‘awe elkʼubʼal, mini syamawe jachʼ ita lom jastik junuk bʼa mi sbʼajuke (Éxodo 20:15; Efesios 4:28).

4. Ma‘ jel kistal xtajki, sok ixta wax yila ja tuki: Ta jel kistal la tajkitik wax yi‘awotik oche bʼa oj kixtala‘antik ja tuki (Génesis 4:5-8). Ja ma‘ jel kʼakʼi sok ixta wax yila ja tuki mini oj bʼobʼ yamigo‘uk ja Dyosi (Salmo 11:5; Proverbios 22:24, 25). Mini lekuk oj katik yi‘ stup ja jas wa skʼulankitik ja tuki (Proverbios 24:29; Romanos 12:17-21, YT).

5. A‘tel sok pukuj: Jujuntik ixuk winik wa skʼanawe yi‘ ja pukuj jumasa‘ akoltajuke bʼa oj yawe tojbʼuk ja ma‘ ayi‘oj chameli, tuk bʼa oj skʼuluke yi‘ jastik junuk bʼa mi lekuk ja skontra‘e‘i bʼa oj yawe ko chamel, ma‘ bʼa oj smil-e‘ele. Tini chʼikan ja Dyablo ja bʼa jastik junuk it. Ja‘ yujil ja matik wax ya‘teltay ja Dyosi mini oj skʼuluke ja jastik junuk it (Deuteronomio 18:9-13; Apocalipsis 21:8, YT). Ta teya mojan sbʼaj ja Jyobaji mini jas oj ekʼuka bʼaja ama ay jas wax kʼan skʼulukawi ja ixuk winike‘i (Proverbios 18:10).

6. Yakbʼel: Lekni yujel tʼusan trago ma‘ serbesa ma‘ chikan xa jas ja‘il jastal jaw (Salmo 104:15; 1 Timoteo 5:23). Pe, ja Dyosi mini lek xyila ta jel xjelxikujtik juntiro ja yujeli ma‘ la bʼechʼeljitik xa ekʼe yuja jyakbʼelaltiki (1 Corintios 5:11-13; 1 Timoteo 3:8). Ta jel xjelxikujtik ja yujeli ojni ya kokotik chamel sok oj sjom ja jastal tsoman ay ja jpamilyatiki. Chomajkil oj bʼobʼ ya kokotik lu‘um we‘go bʼa oj jkʼuluktik jastik junuk bʼa mi lekuk (Proverbios 23:20, 21, 29-35).

7. Ja matik wa skʼulane ja jastik junuk mi lekuk skʼulajel wax yala ja Dyosi mini «oj sbʼat-e ja lugar jaw bʼa wax ya‘a mandar ja Dyosi» (Gálatas 5:19-21, YT). Ta waxa yajtay meran ja Dyosi sok wax kʼana kʼuluk ja jas wa skʼana ojni‘a wijnay ja jas mi lekuki (1 Juan 5:3). Jipakan ja jastik junuk mi lekuk skʼulajel wax yala ja Dyosi (Romanos 12:9). Mojtay ja matik toj aye‘i (Proverbios 13:20; 1 Corintios 15:33, YT). Ja matik takʼanik xa ja bʼa yoj xchonabʼil ja Dyosi jelni oj bʼobʼ skoltaya‘a (Santiago 5:14). Ja mas tʼilani, ayi orasyon ja Dyosi bʼa oj skoltaya (Filipenses 4:6, 7, 13).

[Dibujoʼik ja bʼa slamik 20 sok 21

Ja Dyosi mi lek xyila ta wala yakbʼitik, wala elkʼanitik, wala tajnitik sok takʼin, ma‘ ixta wax kilatik ja tuki