Xetʼan 5

¿Jasunkil ma‘ wa skʼana oj skʼuluk ja Dyos sok ja lu‘umi?

¿Jas yuj skʼulan ja lu‘um ja Jyobaji? (1, 2)

¿Jas yuj ja we‘go ja lu‘umi mi jun tsamal kʼachinubʼuk? (3)

¿Jas oj ekʼ sbʼaje ja matik wa skʼulan jastik junuk bʼa mi lekuki? (4)

¿Jas oj skʼuluk ja Jesusi ja bʼa tyempo ti‘ jakumi soka matik malo‘ayi, soka ma‘ awel xa, soka chamwiniki? (5, 6)

¿Jas ma‘ oj bʼobʼ wa kʼuluk bʼa oja bʼajuk ja slekilal jumasa‘ tito jakumi? (7)

1. Ja Jyobaji skʼulan ja lu‘umi bʼa ti‘ tiw oj ajyuk sakʼan ixuk winike bʼa tolabida. Ja ye‘n wa skʼana ajyi oj ajyuk sakʼan gustolek ixuk winike sok oj skʼuluke ja bʼa leki (Salmo 115:16; Isaías 45:18). Ja lu‘umi mini oj chʼaysnajela, ojni ajyuk bʼa tolabida‘a (Salmo 104:5; Eclesiastés 1:4).

2. Mito skʼulunejuk ajyi ja ixuk winike‘i, ja Dyosi stsa‘a jun xetʼan lu‘um bʼa oj ya pax jun tsamal kʼachinubʼ sok ya sbʼi‘iluk «tsamal kʼachinubʼ bʼa Eden». Ti‘ ya‘a ja bʼajtan winik sbʼi‘il Adan soka bʼajtan ixuk sbʼi‘il Eba. Ja spensar ajyi ja Dyosi ja winik soka ixuk it, a‘ajyuk yuntikile sok asbʼutʼ-e ja lu‘umkʼinali. Jachuk takal takal oj ya‘e paxuk ajyi ja lu‘umi jun tsamal kʼachinubʼ (Génesis 1:28; 2:8, 15).

3. Ja Jyobaji ya eluk ja bʼa tsamal kʼachinubʼ ya‘unej ja Adan soka Eba yuj ja skʼokowe ja mandar ya‘unej ajyi, jachuk ja tsamal kʼachinubʼi chʼaysnajel (Génesis 3:1-6, 23). Pe, ja Jyobaji mito xchʼayskʼujol ja jas wa skʼana oj skʼuluk sok ja lu‘umi. Ja ye‘ni wa skʼapa oj cha ya paxuk jun tsamal kʼachinubʼ bʼa oj ajyuk sakʼan ixuk winike bʼa tolabida. Pe, ¿jastal ma‘ oj bʼobʼ yuj ja jaw? (Salmo 37:29).

4. Bʼajtan ojni chʼay snajel ja matik wa skʼulane ja jastik junuk bʼa mi lekuki, tsa‘an ja lu‘umi oj pax jun tsamal kʼachinubʼ (Colosenses 3:6, YT). Bʼa Armajedon, ja skʼakʼanel ja Dyosi, oj chʼaysnajel ja matik wa skʼulane ja jastik junuk bʼa mi lekuki. Tsa‘an ja Dyablo‘i oj lutjuk 1,000 jabʼil, yajni x-ekʼ ja iti mini june bʼa wa skʼulan ja bʼa mi lekuki oj kan sakʼan bʼa oj sjom ja lu‘umi. Kechantani oj kan sakʼan ja matik wax ya‘teltay ja Dyosi (Apocalipsis 16:14, 16; 20:1-3).

 5. Anto 1,000 jabʼil ja Jesusi oj ya mandar sbʼa ja lu‘umi (Apocalipsis 20:6). Takal takal oj ya chʼayuk ja mulal ki‘ojtik ja bʼa jpensartiki soka bʼa jkwerpotiki. Oj paxukotik jastal ajyiye ja Adan soka Eba ja yajni mito sle‘a smule‘i. Jachuk mixa oj ajyuk chamel jumasa‘, mixa ma‘ oj awelaxuk mixa ma‘ oj chamuk. Ja matik malo‘ayi oj tojbʼuke, jaxa ma‘ ay xa skʼujoli oj ya‘awbʼuk ja sbʼakʼteli (Job 33:25; Isaías 33:24; Apocalipsis 21:3, 4).

6. Ja bʼa 1,000 jabʼil oj ya mandar ja Jesusi, ja ixuk winik kʼu-abʼal aye‘i oj a‘tuke bʼa oj yawe paxuk ja lu‘umi jun tsamal kʼachinubʼ (Mateo 5:5, YT). Chomajkil jitsan oj sakʼwuke jani sok tini oj ajyuke sakʼan bʼa lu‘um (Hechos 24:15). Ta wa skʼulane ja jas wa skʼana ja Dyosi, oj ajyuke sakʼan tolabida. Ta mi skʼulane ojni chʼaysnajele juntiro‘a (Juan 5:28, 29; Apocalipsis 20:11-15).

7. Jachuk oj kʼotuk ja jas wa skʼana oj skʼuluk ja Dyos sok ja lu‘umi. ¿Wan ma‘ xkʼana bʼajuk ja slekilal jumasa‘ tito jakumi? Wan kʼa, ojni wa nebʼ mas sbʼaj ja Jyobaji sok oja kʼuluk ja jastik junuk wa skʼana oj kʼulaxuki. Ja jas oj bʼobʼ skoltaya ja‘ oj wajan ja bʼa stsomjele bʼa Na‘its wa Stsomo sbʼaje ja Ta‘umanti‘ jumasa‘ bʼa Jyoba bʼa kulana (Isaías 11:9; Hebreos 10:24, 25).

[Dibujo bʼa slam 10]

Ja tsamal kʼachinubʼ chʼayi.

[Dibujoʼik ja bʼa slam 11]

Yajni x-ekʼ ja Armajedoni, ja lu‘umi oj ajuk paxuk jun tsamal kʼachinubʼ