Xetʼan 15

La jkoltaytik ja tuki bʼa oj skʼuluke ja jas wa skʼana ja Dyosi

¿Jas yuj oja walyabʼ ja tuki ja jas wana snebʼjeli? (1)

¿Matik ma‘ oj bʼobʼa walyabʼ ja lekil rason wana snebʼjeli? (2)

¿Jastal ma‘ oj skoltay ja tuki ja‘wa lekil modo waxa je‘a‘i? (2)

¿Jas ma‘ tyempo‘il oj xa bʼobʼa mojtay ja jmoj-aljeltiki bʼa spukjel ekʼe ja lekil rasoni? (3)

1. Ja we‘n wa nebʼa ta ja jas wa xyala ja Bibli‘a. Ja snajel it oj skoltaya bʼa oja tojbʼes ja‘wa modo‘i (Efesios 4:22-24). Chomajkil soka snajel it oj bʼobʼa ta wa sakʼanil bʼa juntiro (Juan 17:3). Pe, ja tuki tʼilani oj yabʼye ja lekil rasoni bʼa jachuk oj cha sta‘ skoltajele. Spetsanil ja matik wax ya‘teltay ja Dyosi tʼilani oj sje‘e yi‘ ja tuki ja jas wax yala ja Bibli‘a. Ja iti jun mandar jakel bʼa Dyos (Romanos 10:10, YT; 1 Corintios 9:16; 1 Timoteo 4:16).

2. Oj bʼobʼa walyabʼ ja‘wa pamilya, ja‘wa wamigo jumasa‘, wa moj a‘teli soka wa moj jumasa‘ bʼa eskwela ja jas wana snebʼjeli. Tsamal xa je‘ayile sok a‘ankʼujol (2 Timoteo 2:24, 25). Ajulukakʼujol ja ixuk winiki ja mas wa skʼelawe ja jmodotiki, mi ja‘uk ja jas wax kalatiki. Ja‘ yuj yajni lek waxa je‘a wa modo oj bʼobʼ skoltay ja tuki bʼa oj smaklay ja rason wana yaljeli (Mateo 5:16, YT; 1 Pedro 3:1, 2, 16).

3. Yajni x-ekʼ ja tyempo bʼobʼ ta wa kʼulan ta ja jastik junuk tʼilani bʼa jachuk oj xa bʼobʼ elan bʼa spukjel ekʼe ja lekil rasoni. Ja it jun jas junuk jel tʼilan bʼa oj kʼi‘an bʼa yoj xchonabʼil ja Dyosi (Mateo 24:14, YT). ¡Jelni oj ya gusto lek xa koltay jun ixuk ma‘ winik bʼa oj pax jun ya‘tijum ja Jyobaji sok bʼa oj sta‘ sakʼanil bʼa tolabida! (1 Tesalonicenses 2:19, 20).