Xetʼan 12

La kiltik cha‘anyabʼalil ja sakʼaniltiki soka chikʼi

¿Jastal ma‘ oj kiltik ja sakʼaniltiki? (1)

¿Lek ma‘ yajel ekʼuk lom jun alats bʼa mito yora‘uk? (1)

¿Jastal ma‘ wa sje‘awe ja ya‘tijum ja Dyosi wa xchamskʼujole bʼa mi jas oj ekʼ sbʼaje? (2)

¿Lek ma‘ smiljel ja chante‘i? (3)

¿Jastal wax bʼobʼ jetik mi cha‘anuk yabʼalil wax kilatik ja sakʼaniltiki? (4)

¿Jas ma‘ mandar ya‘unej ja Dyosi sbʼa jastal oj kiltik ja chikʼi? (5)

¿Lek ma‘ oj kitik ja chikʼi? (6)

1. Jyoba ye‘n wax ya‘a ja sakʼaniltiki. Ja‘ yuj spetsanil ja ma‘ sakʼani, sakʼan ay yuj tsʼakatal ja ye‘n (Salmo 36:9). Ja Dyosi jel cha‘anyabʼalil xyila ja sakʼaniltiki. Jun alats mito xpojki cha‘an xa yabʼalil wax yila ja ye‘n. Ja ye‘n mini lek xyila yajel ekʼ lom jun alats bʼa mito yora‘uk (Éxodo 21:22, 23; Salmo 127:3).

2. Ja matik wax ya‘teltay ja Dyosi wani xchamskʼujole bʼa mi jas oj ekʼ sbʼaje. Wani skʼelawe ta lek ay ja skarro‘e‘i soka snaje‘i bʼa mi jas oj ekʼ sbʼaje (Deuteronomio 22:8). Ja ya‘tijum Dyosi mini skʼulane jastik junuk bʼa wax bʼobʼ xchʼay ja sakʼanile‘i bʼa kechanta gusto oj ajyuke. Mini xtajniye bʼa tajnel bʼa lom oj syajbʼese ja tuki. Mini skʼelawe jastik junuk bʼa wa sje‘a wa smakʼa sbʼaje ja ixuk winike‘i (Salmo 11:5; Juan 13:35).

3. Ja Dyosi cha‘anyabʼalil wax yila ja sakʼanil ja chante‘i. Ja  matik wax ya‘teltay ja Dyosi wani xbʼobʼ smil-e jujuntik chante bʼa oj skʼux-e, ma‘ oj skʼul skʼu‘e soka stsʼujmili, bʼa mi oj ko‘uke chamel, ma‘ bʼa mi oj miljuke yuja chante jumasa‘i (Génesis 3:21; 9:3; Éxodo 21:28; Marcos 1:6). Pe, ja mi lekuki ja smiljel lom ja chante‘iki (Proverbios 12:10).

4. Mini lek oj snukʼ-e may sok oj sbʼukʼ-e ma‘ oj yu‘e droga ja matik wax ya‘teltay ja Dyosi. Mini lekuk yuj oxe rason; june,  mixa xbʼobʼ katikan yabʼjel ja jaw; xchabʼil, wa sjomo ja kojoltiki; sok yoxil, mixa xya ajyukotik asyado (Romanos 6:19, YT; Romanos 12:1; 2 Corintios 7:1). Sjipjelkan ja jastik junuk it wokolni‘a, pe, ta wan kʼa xkʼanatik oj katik gusto‘axuk ja Dyosi ojni jiptikana.

5. Ja Dyosi cha‘anyabʼalil wax yila ja chikʼi. Ja ye‘n wax yala ja sakʼaniltiki tini ay bʼa chikʼ. Ja‘ yuj mini lekuk slojel ja chikʼi. Cha mini lekuk skʼuxjel ja sbʼakʼtel jun chante bʼa mi eleluk lek ja xchikʼeli. Mini lek skʼuxjel ja sbʼakʼtel jun chante bʼa kechan tsʼotubʼal yi‘ ja snukʼi ma‘ ti‘ cham bʼa jun trampa. Ta jun kʼa chante jmilatik sok bala ma‘ sok ule ojni katik yi‘ el we‘go ja xchikʼeli bʼa oj bʼobʼ jkʼuxtik (Génesis 9:3, 4; Levítico 17:13, 14; Hechos 15:28, 29).

6. ¿Lek ma‘ oj kitik chikʼ? La ka juljkʼujoltik ja Jyobaji wax yala mok kabʼtik ja chikʼi. Ja iti wa stojolan mini oj katik ochuk bʼa kojoltik, ja xchikʼel tuk ixuk winik, ama ja‘uk ja jchikʼeltiki, ta nolji ta kʼa jun tyempo mi xa ni oj kitika (Hechos 21:25). Ja matik wax ya‘teltay ja Dyosi mini xyi‘aje chikʼa. Pe, wanix yi‘aje a‘an bʼa mey yi‘oj chikʼ. Wa skʼanawe oj ajyuke sakʼan, pe, mini skʼanawe bʼa oj kanuke sakʼan oj skʼok-e jun mandar ya‘unej ja Dyosi (Mateo 16:25).

[Dibujoʼik ja bʼa slam 25]

Mini oj kitik chikʼ, mini oj nukʼtik may sok mini oj jkʼuluktik jastik junuk bʼa wax bʼobʼ jchʼay ja sakʼaniltiki; jachuk oj katik gusto‘axuk ja Dyosi