Xetʼan 8

La kitik och jun sakʼaniltik bʼa pamilya bʼa lek wax yila ja Dyosi

¿Machʼa olomal ja bʼa yojol ja pamilya? (1)

¿Jastal oj sje ja smodo ja tatamal soka xche‘umi? (2)

¿Jas xchol yi‘oj ja tatali? (3)

¿Jas xchol yi‘oj ja che‘umali? (4)

¿Jas ma‘ wa skʼana ja Dyosi oj skʼuluk ja nan tatal soka untikali? (5)

¿Jas ma‘ wax yala ja Bibli‘a sbʼaj ja ma‘ wa sjipakan sbʼaje‘i? (6)

¿Jas wax yala ja Bibli‘a sbʼaj ja ma‘ wa skʼutsu ja snupaneli bʼa sti‘ sat ma‘ ay xchol? (7)

1. Ja Bibli‘a wax yala ja tatamali ye‘nani ja olomal ja bʼa yojol ja pamilya (1 Corintios 11:3). Ja winiki kechantani jun xche‘um oj ajyuk, jaxa snupanele‘i tʼilani kʼe‘el jun sju‘unil bʼa sti‘ sat ma‘ ay xchola (1 Timoteo 3:2; Tito 3:1).

2. Ja tatamali ojni syajtay ja xche‘umi jastal wa syajtay sbʼaj ja ye‘n. Ojni snoch yi‘ ja smodo ja Jesusi ja jastal wa syajtay ja snochuman jumasa‘ (Efesios 5:25, 28, 29). Ojni skise sok jel oj skʼane. Mini oj smakʼe ma‘ ixta oj yil (Colosenses 3:19; 1 Pedro 3:7).

3. Ja tatali ojni a‘tuk bʼa oj sle ja jas wa skʼana ja spamilya. Ojni sle swa‘ele, skʼu‘e sok jun snaj bʼa oj ajyuk soka yuntikili soka xche‘umi. Sok ojni skoltay ja spamilya ja bʼa ya‘teltajel wax yawe yi‘ ja Dyosi (1 Timoteo 5:8). Ja tatali ojni skʼel sok oj skoltay ja spamilya bʼa oj snebʼ-e mas sbʼaj ja Dyosi sok ja jas wa skʼana oj skʼuluk ja Ye‘ni (Deuteronomio 6:4-9; Efesios 6:4).

4. Ja che‘umali ojni skoltay ja statami (Génesis 2:18). Ojni skoltay ja statami ja bʼa sjejel yi‘ ja yuntikile‘i bʼa oj skʼuluke ja bʼa leki (Proverbios 1:8). Ja Jyobaji wani skʼana ja che‘umali astalnay sok spetsanil skʼujol ja statami soka yuntikili (Proverbios 31:10, 15, 26, 27; Tito 2:4, 5). Ja che‘umali tʼilani oj skis lek ja statami (Efesios 5:22, 23, 33).

5. Ja Dyosi wani skʼana ja untik jumasa‘ kʼu‘abʼal oj ajyuk soka snan state‘i (Efesios 6:1-3). Ja Dyosi wani smajlay ja nan tatal jumasa‘ asje‘e yi‘ sok askoltay ja yuntikile‘i bʼa oj stukbʼes ja smodo‘e‘i ta mi kʼa lekuk ja jas wane skʼulajeli. Ja nan tatal jumasa‘ ojni spil styempo‘e bʼa oj lolanuk soka yuntikile‘i bʼa oj yil-e jasunkʼil wax  ekʼ ja bʼa skʼujole‘i, sok ojni skʼumuke lajan ja Bibli‘a bʼa oj skoltaye ja bʼa ya‘teltajel wax yawe yi‘ ja Dyosi (Deuteronomio 11:18, 19; Proverbios 22:6, 15). Yajni ja nan tatal jumasa‘ wa sje‘awe yi‘ ja yuntikile‘i bʼa oj skʼuluke ja bʼa leki, mini oj syajbʼese ma‘ jel tsats oj ya ja smandare‘i (Colosenses 3:21).

6. Yajni jun ixuk sok jun winik bʼa nupanele mixa xbʼobʼ ajyuke lajan yuj ay xa stiro‘e, tʼilani oj skʼu‘uke ja rason wax ya‘a ja Bibli‘a, bʼa wax yala oj ka jbʼajtik perdon sok oj je syajaljkʼujoltik (Colosenses 3:12-14). Ja Bibli‘a mi wax yala asjipkan sbʼaje, bʼa jachuk oj tojbuk ja tiro yi‘oje‘i bʼa mi jel cha‘anukyabʼalil. Pe, ja ixuki ojni bʼobʼ yakan ja statami ta jachʼ kʼa wa skʼana ta, june, mixa kʼa xkʼan yayi ja jas wa xmakuniyuj ja spamilya; xchabʼil, jel kʼa xmakʼji juntiro soka it ja ye‘n wax ko chamel sok xetʼantik xta mix chami; ma yoxil, mikʼa skʼana sok wa smaka tarega ja xche‘umi bʼa mi oj ya‘teltay ja Jyobaji (1 Corintios 7:12, 13).

7. Ja ma‘ nupaneli mini oj xchʼik sbʼaj sok pilan ixuk ma‘ winik. Yujni jun niwan mulal bʼa sti‘ sat ja Dyosi sok wa syajbʼes ja snupi (Hebreos 13:4). Ja Bibli‘a wax yala ta yuj kʼa ja ma‘ nupanelasoki wa xchʼika sbʼaj sok pilan ixuk ma‘ winik, kechanta jachuk ja we‘n oja pensara‘uk ta oja kʼuts ja‘wa nupaneli bʼa sti‘ sat ma‘ ay xchol sok wa pensar we‘na ta ojto nupanan pilan ekʼele (Mateo 19:6-9; Romanos 7:2, 3, YT). Jun kʼa ixuk ma‘ winik wa skʼutsu ja snupaneli yuj jun rason mix taxi bʼa yojol ja Bibli‘a sok wax nupani sok pilan ixuk ma‘ winik, ja Jyobaji mini lek xyila ja jas wa skʼulani (Malaquías 2:14-16).

[Dibujoʼik ja bʼa slamik 16 sok 17]

Ja Dyosi wani smajlay ja nan tataliki asje‘e yi‘ sok askoltay ja yuntikile‘i bʼa oj skʼuluke ja bʼa leki

[Dibujo bʼa slam 17]

Ja tatal jel ja syajalskʼujoli wani sle‘a yi‘ ja jas wa xmakuniyuj ja spamilya sok wa skoltay ja bʼa ya‘teltajel wax yawe yi‘ ja Dyosi