Xetʼan 4

¿Ma‘chunkʼiluk ja Dyablo‘i?

¿Jastal ma‘ kʼot ajyuk ja Dyablo soka Satanasi? (1, 2)

¿Jastal ma‘ wa slolay ja Dyablo ja ixuk winike‘i? (3-7)

¿Jas yuj tʼilan oj kuchukawuj ja jastik junuk wax yijan ja Dyablo‘i? (7)

1. «Dyablo» wa stojolan june ma‘ lom wa sle‘a yi‘ smul tuk smoj. Jaxa «Satanas» wa stojolan jun kontra‘anum. Ja chabʼ sat kʼumal it, wa sje‘a ja smodo ja ma‘ jel skontra‘an ja Dyosi. Ja najate waj jun lekil yunin ja Dyosi, ja ye‘ni tini ajyi bʼa satkʼinala. Pe, tsa‘an ja smodo tukbʼi-ele, kʼe skʼul sbʼa niwanil sok skʼana ye‘n oj toyjuk, anke kechan ta ma‘ oj toyxuki ja‘ ta ni ja Dyosi (Mateo 4:8-10).

2. Ja Dyablo‘i ya‘a makunuk jun bʼitsʼbʼichan bʼa oj lolanuk soka Eba‘i. Ja bʼitsʼbʼichan it yalayabʼ abʼal ja Eba‘i bʼa oj skʼok ja mandar ya‘unej ajyi ja Dyosi. Soka it ja Dyablo‘i kol sje ja Jyobaji mini sbʼajin ja xchol yi‘oj bʼa kechan ye‘n oj ya mandar. Kol yale ja Dyosi mini stojoluk ja jastal wax ya‘a ja smandar sbʼaj ja ma‘ wax a‘teltajiyuji. Cha kolyal mini bʼi ay jun ixuk ma‘ winik bʼa mi oj yakan ja Dyosi. Yajni skʼulan ja iti, ti‘ tiw pax jun skontra ja Dyosi. Jachuk kʼot najuk sbʼaj jastal Satanas sok Dyablo (Génesis 3:1-5; Job 1:8, 11; Apocalipsis12:9, YT).

3. Ja Dyablo‘i wa sle‘a jitsan jastik junuk bʼa jachuk ja ixuk winike‘i astoy-e (2 Corintios 11:3, 14). Jun modo wax ya‘a makunuk bʼa oj slolay ja ixuk winike‘i ja‘a relijyon mi meranuki. Jun kʼa relijyon wa sle‘a abʼal sbʼaj ja Dyosi, ja‘ ni wane skʼulajel ja jas wa skʼana ja Dyablo‘i (Juan 8:44). Ja matik wax wajye bʼa relijyon mi meranuki wa skʼu‘ane ja‘ wane ya‘teltajel ja Dyosi, pe, ja‘ ni wane ya‘teltajel ja Dyablo‘i, pes ye‘nani ja ma‘ wax ya‘a mandar jastal «yajwalil ja lu‘um it», sok wa skʼana ye‘n oj toyxuk (2 Corintios 4:4, YT).

4. Bʼa oj slolay ja ixuk winik ja Dyablo‘i wa snika ja skʼujole‘i bʼa oj a‘tuke sok ja pukuj jumasa‘. Jujuntik wa skʼanawe yi‘ ja pukuj jumasa‘ atalnajuke, bʼa oj skʼul-e yi‘ jastik junuk bʼa mi lekuk ja tuki ma‘ bʼa oj aljuk yabʼye ja jas ojto ekʼuki, sok bʼa oj skʼuluke niwak senya. Ja ma‘ wa xya eljan ja jastik junuk it jani ja Dyablo‘i. Ta wa xkʼanatik oj katik gusto‘axuk ja Dyosi, mini oj a‘tukotik sok ja pukuj jumasa‘ (Deuteronomio 18:10-12; Hechos 19:18, 19, YT).

5. Ja Dyablo‘i wa slolay ja ixuk winike‘i bʼa oj spensara‘uke jel tsa‘ubʼal ja srasa‘ile‘i yuja tuki. Chomajkil wa slolay bʼa oj stoy-e ja matik ay xcholi. Jitsan ixuk sok winik wa spensara‘ane mas cha‘an yabʼalil ja xchonabʼile‘i yuja tuk chonabʼ jumasa‘.  Ja jawi mini meranuka (Hechos 10:34, 35, YT). Jitsan ixuk winike wa smajlaye ja mandaranum jumasa‘ astojbʼese ja wokol yi‘oje‘i. Ja yajni jachʼ wa skʼulane‘i wa sje‘awe mi skʼanawe oj ya mandar ja Dyosi, pes kechantani ye‘n wax bʼobʼ xchʼay spetsanil ja wokol ki‘ojtiki (Daniel 2:44).

6. Tuk modo bʼa oj slolay ja ixuk winike ja Dyablo‘i ja‘wa snika yi‘ ja skʼujole‘i bʼa oj skʼuluke jastik junuk bʼa mi lekuk. Ja Jyobaji wax yala mok jkʼuluktik ja jastik junuk bʼa mi lekuki, pes ja ye‘n wani sna‘a mini lek oj elkotikʼo ta (Gálatas 6:7, 8). Ay ni jujuntik ixuk winik wa skʼanawe oja kʼuluk ja jastik junuk mi lekuk wa skʼulane‘i. Pe, na‘a lek ja‘a Dyablo ja ma‘ wa skʼana oja kʼuluk ja jastik junuk jaw (1 Corintios 6:9, 10; 15:33).

7. Chomajkil ja Dyablo‘i wax ya‘a makunuk ixuk winike bʼa oj yixtala‘ukotik bʼa oj katikan ya‘teltajel ja Jyobaji. Bʼobʼ ta jujuntik ja bʼa yojol ja‘wa pamilya mi oj yi‘e slekil ja we‘n oj kʼe‘a nebʼ sbʼaj ja Bibli‘a. Ma‘ ay ni oj jtselajanana. Pe, ¿ma‘chunkʼil yawi ja‘wa sakʼanil bʼa? Ja Dyablo‘i wax kʼan ya xiwan bʼa jachuk oja wakan snebʼjel bʼa Jyoba. Pe, moka wakan aya ko‘an lu‘um soka jaw (Mateo 10:34-39; 1 Pedro 5:8, 9). Yajni xkuchawuj ja jastik junuk wax yijan ja Dyablo‘i, oj bʼobʼa wa gusto‘axuk ja Jyobaji sok oja je waxa kʼu‘an kechantani ye‘n oj bʼobʼ ya‘otik mandara (Proverbios 27:11).

[Dibujoʼik ja bʼa slam 9]

Ja relijyon mi meranuki, ja a‘tel sok ja pukuji soka stoyjel ja jchonabʼiltiki wa slolay jitsan ixuk winike

[Dibujo bʼa slam 9]

Oj kuchukawuj ja jastik junuk wax yijan ja Dyablo‘i ja yajni xa nebʼa mas sbʼaj ja Jyobaji