Xetʼan 2

¿Ma‘chunkʼiluk ja Dyosi?

¿Ma‘chunkʼiluk ja Dyos smeranili? ¿Jas ma‘ sbʼi‘il? (1, 2)

¿Jas yuj mi xbʼobʼ kiltik ja Dyosi? (3)

¿Jas modo jel wa sje‘akitik ja Dyosi? (4)

¿Oj ma‘ bʼobʼ katik makunuk kʼulubʼal dyos ja yajni wax toyotik ja Dyos smeranili? (5)

¿Jas chabʼ modo‘il wax bʼobʼ jnebʼtik sbʼaj ja Dyosi? (6)

1. Ja ixuk winike‘i wa stoyowe jitsan jas junuk. Pe, ja Bibli‘a wax yala kechan ay jun Dyos SMERANIL. Ye‘n skʼulan spetsanil ja jas ay ja bʼa satkʼinali sok ja bʼa lu‘umi, sok ye‘n ya‘a ja sakʼaniltiki, ja‘ yuj kechantani ye‘n oj toytik (1 Corintios 8:5, 6; Apocalipsis 4:11).

2. Ja Dyosi sbʼi‘il JYOBA. Bʼa jitsan Bibli‘a kusubʼal-ele ja mero sbʼi‘ili sok xchʼikuneje «Ajwalal» ma‘ «Dyos». Pe, ja yajni tsʼijbʼaxi ja Bibli‘a, ja sbʼi‘il ja Dyosi, Jyoba, wax taxi jun juke mil ekʼele (Éxodo 3:15; Salmo 83:18).

3. Ja skwerpo ja Jyobaji tuk lek yuj ja jbʼajtiki. Ja Bibli‘a wax yala: «Ja ye‘ni ikʼ ason ni ay ekʼa» (Juan 4:24, YT). Jun tikʼe sakʼanil jastal jaw mas cha‘anyabʼalil yuja sakʼaniltiki. Mini ma‘ yilune ja Dyosi. Anke ja Jyobaji tey bʼa satkʼinal wax yilakon spetsanil ja jas wax ekʼ ja bʼa lu‘umi (Juan 1:18; Hebreos  4:13). ¿Lajan ma‘ ja Dyosi soka yipi? ¡Miyuk! Ja yipi kechanta ja‘a jas wax ya makunuki bʼa oj skʼuluk chikan jas junuka (Salmo 104:30).

4. Ja Bibli‘a‘i wax yal kabʼtik jastal ja Jyobaji, pes wax yala ja smodo jel wa sje‘akitiki, tey ja syajalskʼujoli, ja stojolil ja bʼa jas wa skʼulani, ja sbibo‘ili soka yipi (Romanos 11:34, 35; 1 Juan 4:8, YT; Apocalipsis 11:17; 16:5). Chomajkil wax yal kabʼtik ja ye‘n yaj wax yabʼ ja yajni wax ekʼ jbʼajtik jastik junuk bʼa mi lekuk. Lek ja skʼujoli, wa skusu ja jmultiki, gustolek wax yakitik jastik junuk bʼa lek sok wa sna‘a stekʼjel. Wa xje‘atik kʼu‘um-abʼal ayotik ja yajni wax nochotik yi‘ ja smodo jumasa‘ it (Efesios 5:1, 2).

5. ¿Lek ma‘ oj kokotik sbʼaj mekʼan sok oj katik yi‘ orasyon jun kʼulubʼal dyos? Miyuk (Hechos 17:24, 25, 29). Ja Jyobaji wax yala kechanta ye‘n oj ka‘teltaytik, ja ye‘n mini skʼepa ja stoyjel wax axiyi‘i sok mini jun jas junuk tey bʼa lu‘um ma‘ bʼa satkʼinal. Chomajkil ja kʼulubʼal dyos jumasa‘ mix bʼobʼ skoltayotik (Isaías 42:8; Apocalipsis 9:20).

6. ¿Jastal oj bʼobʼ kʼot jnatik sbʼaj lek ja Dyosi? Jun modo ja‘ oj kiltik ja jas skʼuluneji, sok oj jpensara‘uktik jas wa sje‘akitik bʼa ye‘na. Ja jastik skʼulunej ja Dyosi wa sje‘akitik jel ja yipi sok jel bibo juntiro. Spetsanil ja jas skʼuluneji wa sje‘akitik ja syajalskʼujoli (Salmo 19:1-6; Romanos 1:20). Bʼa xchabʼil modo bʼa oj kʼot jnatik sbʼaj lek ja Dyosi ja‘ oj jkʼumuktik ja Yabʼali. Ja bʼa tiwi wax yala jas tikʼe Dyosil ja ye‘n. Chomajkil wax yal kabʼtik ja jas oj skʼuluki soka jas wa skʼana oj jkʼuluktik ja ke‘ntiki (Amós 3:7; 2 Timoteo 3:16, 17).

[Dibujo’ik bʼa slam 5]

Wax bʼobʼ jnebʼtik mas sbʼaj ja Dyosi yajni wax kilatik ja jas skʼuluneji sok skʼumajel ja Yabʼali