Xetʼan 3

¿Ma‘chunkʼiluk ja Jesusi?

¿Jas yuj wa sbʼi‘ilan ja Jesusi ja «bʼankilal»? (1)

¿Jas yuj wa sbʼi‘ilan ja Jesusi «ja Yabʼali»? (1)

¿Jas yuj jak bʼa lu‘um ja Jesusi jastal jun winik? (2-4)

¿Jas yuj skʼulan niwak senya ja yajni ti‘ ajyi bʼa lu‘umi? (5)

¿Jas ma‘ oj skʼuluk ja Jesusi ja bʼa tyempo ti‘ jakumi? (6)

1. Ja yajni mito xjak bʼa lu‘um ja Jesusi ti‘ ajyi sakʼan bʼa satkʼinal jastal ikʼ ason. Ja Jyobaji skʼulan bʼajtan ja Jesusi, ja‘ yuj wa sbʼi‘ilan «bʼankilal» (Colosenses 1:15; Apocalipsis 3:14). Ja yunin kechanta ye‘n skʼulunej ja Dyosi ja‘a Jesusi. Yajni ti‘ ajyi bʼa satkʼinal ja Jesusi, ja Jyobaji ya makunuk jastal jun ya‘tum ja yajni wanto skʼulajel spetsanil ja jastik junuk tey bʼa satkʼinali soka bʼa lu‘umi (Proverbios 8: 22-31; Colosenses 1: 16, 17). Chomajkil ja Jyobaji ya makunuk ja Jesusi bʼa oj yayi ekʼuk ja ixuk winike‘i ja srason wax ya‘a ja ye‘n, ja‘ yuj ja Jesusi wa sbʼi‘ilan «ja Yabʼali» (Juan 1:1-3; Apocalipsis 19:13).

2. Bʼa yojol jun ixuk sbʼi‘il María ja Jyoba ti‘ ya‘a ja sakʼanil ja skeremi, jachuk ja Jesusi ti‘ pojki bʼa ixuk jaw. Ja‘ yuj ja Jesusi mini ajiyi ja sakʼanil yuj jun winik, jachuk ja ye‘n mini pojki sok mulala. Ja Dyosi sjekakon bʼa lu‘um ja yunini yuj oxe rason. June, bʼa oj yal kabʼtik ja smeranil sbʼaj ja Dyosi (Juan 18:37). Bʼa xchabʼil,  bʼa oj sje sbʼa toj lek bʼa sti‘ sat ja Dyosi sok jachuk oj nochtik yi‘ ja smodo‘i (1 Pedro 2:21). Bʼa yoxil, jak ya ja sakʼanili bʼa oj ya elkotik ja bʼa mulali soka bʼa chamel chʼakeli. ¿Jas yuj tʼilan ya‘a ja sakʼanili? (Mateo 20:28).

3. Yajni ja bʼajtan winik sbʼi‘il Adan skʼokʼo ja mandar ya‘unej ajyi ja Dyosi, ja winik jaw ko ja bʼa Bibli‘a wax ya sbʼi‘iluk «mulal». Ja‘ yuj ja Dyosi yalyabʼ ojni chamuka (Génesis 3:17-19). Yajni ja Adani mixa skʼulan ja jas wa skʼana ja Dyosi, ti‘ tiw pax jun mulanum. Takal takal och awelaxuk sok man chami. Ja Adani yayi ekʼuk ja mulali spetsanil ja yuntikili, ja‘ yuj ja ke‘ntiki wala kotik chamel, wala awelaxitik sok wala chamtik. Pe, ¿jastal ma‘ oj bʼobʼ jta‘ jkoltajeltik? (Romanos 3:23; 5:12).

 4. Ja Jesus waj jun winik mey smul jastal ajyi ja‘ Adani. Pe, ja Jesusi mi slaja ja smodo ja‘ Adani. Ja Jesusi tolabida skʼu‘an ja jas wax yala ja Dyosi, ama ekʼ sbʼaj jitsan wokol. Ja‘ yuj ja ye‘n bʼobʼ ni ya ja sakʼanili bʼa oj ya elkotik ja bʼa mulal sle‘akan ja Adani. Ja Bibli‘a wax ya sbʼi‘iluk ja jas skʼulani «koltajel». Jachuk ja yuntikil ja Adani oj bʼobʼ koltajuke bʼa mixa ojto chamuke. Spetsanil ja ma‘ wa sje‘a wa skʼu‘an bʼa Jesusi, ojni bʼobʼ kusjuk yi‘ ja smuli sok oj bʼobʼ sta‘ sakʼanil bʼa juntiro (1 Timoteo 2:5, 6; Juan 3:16, YT; Romanos 5:18, 19).

5. Yajni jak bʼa lu‘um ja Jesusi, stojbʼes ja matik ayi‘oj chameli, yayi swa‘el jitsan ixuk winik sok ya lamxuk ja ikʼ sok ja ja‘i. Cha ya‘a sakʼwuk ja chamwinik jumasa‘. ¿Jas yuj skʼulan ja jastik junuk it? Yuj oxe rason. June, yaj wax yabʼ ja yajni ja ixuk winike‘i wan ekʼel sbʼaje wokol sok wa skʼana oj skoltay. Bʼa xchabʼil, ja niwak senya skʼulani sje‘a yunini Dyosa. Bʼa yoxil, soka ja skʼulani sje‘a ja jas oj skʼuluk ja bʼa tyempo ti‘ jakumi yajni ye‘n xa oj ya mandar ja bʼa lu‘umi bʼa oj skoltay ja matik kʼu‘um-abʼal aye ja we‘go (Mateo 14:14; Marcos 2:10-12; Juan 5:28, 29).

6. Ja Jesusi chami ja yajni ti‘ ajyi bʼa lu‘umi. Ja Dyosi ya‘a sakʼwuk jastal ikʼ ason sok kumxi bʼa satkʼinal (1 Pedro 3:18). Yajni ekʼ ja tyempo, ja Dyosi yayi xchol jastal jun mandaranum. Ja Jesusi mojan xa oj xchʼaysnajel ja matik mi lekuk ja jas wa skʼulane‘i soka wokol ay ja bʼa lu‘um ja we‘go (Salmo 37:9-11; Proverbios 2:21, 22).

[Dibujoʼik ja bʼa slam 7]

Ja bʼa a‘tel jak skʼuluki ja Jesusi sje‘a ja smeranili, skʼulan niwak senya sok cho ya‘a ja sakʼanili bʼa oj skoltayotik