Xetʼan 11

Skʼu‘ajel sok kʼin bʼa mi lek xyila ja Dyosi

¿Jastik ma‘ skʼu‘ajel sok kʼin mi lek skʼulajel? (1)

¿Lek ma‘ oj bʼobʼ skʼu‘uke ja ma‘ wax ya‘teltay Dyosi, ja Ye‘n, ja yipi soka Jesusi june ita? (2)

¿Jas yuj mi skʼintaye ja matik wax ya‘teltay Dyosi ja kʼakʼu pojki ja Jesusi, ja kʼin santo soka yajni wa stsʼikwi sjabʼil jun ixuk winik? (3, 4)

¿Ay ma‘ jas wax bʼobʼ skʼulkitik ja chamwiniki? (5)

¿Ti‘ ma‘ cham bʼa jun krus ja Jesusi? (6)

¿Janekʼ ma‘ stʼilanil yi‘oj yajel gusto‘axuk ja Dyosi? (7)

1. Ayni lek jujuntik kʼin ma‘ skʼu‘ajel yi‘oj ja ixuk winike‘i. Pe, ja Dyosi mini lek xyila ja kʼin jumasa‘ soka skʼu‘ajel ti‘ jakel bʼa relijyon mi meranuki, ma‘ wa sjomo ja jas wax yala ja Bibli‘a‘i (Mateo 15:6).

2. Skʼu‘ajel ja Dyosi, ja yipi soka Jesusi june ita: ¿June ita ma‘ ja Dyosi, ja yipi soka Jesusi? ¡Miyuk! Ja Jyobaji kechani ye‘n ja «Dyos smeranili» (Juan 17:3; Marcos 12:29). Ja Jesusi jani ja‘ bʼajtan yunin skʼulan ja Dyosi, sok ibʼ kʼabʼal ay yuj ja Dyosi (1 Corintios 11:3). Ja Jyobaji ye‘n ja tatali, mas ni niwan yuja skeremi (Juan 14:28). ¿Lajan ma‘ ja Dyosi sok ja yipi? Miyuk, ja yipi kechanta ja‘a jas wax ya makunuki bʼa oj skʼul chikan jas junuka (Génesis 1:2; Hechos 2:18, YT).

3. Skʼintajel ja kʼakʼu pojki ja Jesusi soka kʼin santo: Ja Jesusi mini pojki bʼa skʼakʼujil 25 bʼa yixawil diciembre, bʼobʼta pojki bʼa sbʼajtanil skʼakʼujil och ja yixawil octubre. Ja bʼa ixaw och jaw, ja talnachej jumasa‘ tini wa stalnay ja xcheje‘i bʼa jaman kʼinal snajtil akʼwal (Lucas 2:8-12). Ja Jesusi mini yala akʼintaxuk ja kʼakʼu pojki‘i. Ja jas yala oj kʼulaxuki ja‘ oj katik juljkʼujoltik ja xchamelali (Lucas 22:19, 20). Ja jastik wa skʼulane bʼa oj skʼintaye ja kʼakʼu pojki ja Jesusi tini elel bʼa relijyon mi meranuk bʼa najate. Junxta cha wax bʼobʼ kaltik sbʼaj ja kʼin santo. Ja ya‘tijum Dyos bʼa najate soka bʼa jtyempotiki mini skʼintaye ja kʼakʼu pojki ja Jesusi soka kʼin santo.

4. Skʼintajel ja yajni wa stsʼikwi sjabʼil jun ixuk ma‘ winik: Ja chabʼ winik wa sta‘a ti‘al ja Bibli‘a‘i bʼa skʼulane jun kʼin ja yajni tsʼikwi sjabʼile‘i, mini xya‘teltaye  ja Jyobaji (Génesis 40:20-22; Marcos 6:21, 22, 24-27). Ja matik wax ya‘teltay Dyos ja najate‘i mini skʼulane ja kʼin iti. Ja kʼin iti tini cha elel jan bʼa relijyon mi meranuk bʼa najate. Ja ya‘tijum jumasa‘ ja Dyosi wani xyatalan sbʼaj smajtane sok wa skʼulane jujuntik kʼin bʼa gusto oj ajyuke chikan jas kʼakʼujiluk ja bʼa jabʼili.

5. Xiwel yuj ja chamwiniki: Ja chamwinik jumasa‘ mini jas wax bʼobʼ skʼuluke sok mi jas wa sna‘awe. Ja ke‘ntiki mi xbʼobʼ jkoltaytike, jaxa ye‘nle‘i mi jas wax bʼobʼ skʼulukitik (Salmo 146:4; Eclesiastés 9:5, 10). Yajni wax cham jun ixuk ma‘ winik ti‘ wax chʼak tiwi, mini jas wax eli bʼa oj kan sakʼan (Ezequiel 18:4). Pe, ay ekʼele ja smoj jumasa‘ ja Dyablo‘i, sbʼi‘ile pukuj, wa skʼulan sbʼaje lajansok ye‘nle ja ma‘ chamel xa. Xiwel yuja chamwiniki sok skʼintajele, spetsanil ja jastik junuk it mini lek skʼulajela (Isaías 8:19).

6. Krus: Ja Jesus ti‘ cham bʼa jun te‘ mi ti‘uk cham bʼa jun krus. Yajni tsʼijbʼaxi ja yabʼal ja Dyos ja najate‘i bʼa kʼumal griego mi tsʼijbʼaxi ja Jesusi cham bʼa jun krus, tsʼijbʼaxi ti‘ cham bʼa jun te‘. Ja jastal wax yawe makunuk ja krusi tini jakel bʼa relijyon mi merunuk bʼa najate. Ja ya‘tijum Dyos bʼa najate‘i mini xyawe makunuk sok mini stoyowe ja krusi. Jas waxa pensara‘an, ¿lek ma‘ oja wa makunuk jun krus ja bʼa stoyjel wax axiyi ja Dyosi? (Deuteronomio 7:26; 1 Corintios 10:14).

7. Bʼobʼ ta wokol sjipjelkan ja skʼu‘ajel soka kʼin jumasa‘ it. Bʼobʼ ta ja‘wa pamilya ja‘wa wamigo‘iki oj smon-a bʼa mi oja jipkan ja skʼu‘ajel awi‘oji. Pe, yajel gusto‘axuk ja Dyosi mas ni tʼilan yuj yajel gusto‘axuk ja ixuk winike‘i (Proverbios 29:25; Mateo 10:36, 37).

[Dibujo bʼa slam 22]

Ja Dyosi, ja yipi soka Jesusi mini june‘uketa

[Dibujo bʼa slam 23]

Ja skʼintajel ja kʼakʼu pojki ja Jesusi tini elel jan bʼa relijyon mi meranuk bʼa najate

[Dibujo bʼa slam 23]

Mok xiwkotik yuja chamwiniki sok mok jkʼintaytike