Man najate, june ja bʼa jastik jel xnaji sbʼaje ja Taʼumantiʼ jumasaʼ jani ja chapjelal wa x-ajiyile bʼa Jyoba. Sbʼaja matik wa x-aʼtiye bʼa tyempo tsʼikan ja bʼa xcholjeli, wa x-ajiyile jun xchapjelal jel tʼilan bʼa chapan oj ajyuke ‹yaljel ja yabal ja Diosi› (2 Timoteo 4:5).

Eskwela bʼa Aʼtel bʼa Precursor. Ja bʼa xchʼakulabʼil ja bʼajtan jabʼil bʼa aʼtel bʼa tyempo tsʼikan yiʼoj jun precursor regular, wa x-aji och juʼun bʼa jun eskwela bʼa wa x-ajiyi xchapjelal wake kʼakʼu. Ja it wa xkʼulaxi bʼa jun Naʼits bʼa Tsomjel bʼa mas mojan ay. Ja chapjelal it jani bʼa skoltajel ja precursori bʼa oj mojxuk mas soka Jyoba, bʼa mas chapan oj ajyuk soka tuktukil yaʼteli sok bʼa mini oj yakani.

Eskwela bʼa Cholumanik sbʼaja sGobyerno ja Dyosi (Escuela para Evangelizadores del Reino). Ja eskwela it, wa x-albʼi chabʼ ixaw, kʼulubʼal bʼa xchapjel ja precursor jumasaʼ bʼa ayxa tyempo wane aʼtel sok wani skʼapa sbʼaje gustolek bʼa yajelkan ja snajeʼi bʼa wajel chikan bʼa wa xjekjiye. Jaʼ wa snochowe ja niwan Choluman maʼ jak ja bʼa luʼumi, ja Jesukristo, sok wa xyalawe: «It bʼayonjula, jekawon keʼna» (Isaías 6:8; Juan 7:29). Yajelkan jawa naji bʼa wajel jun pilan chonabʼ wani stojolan yijel jun tikʼe sakʼanil bʼa mi chaʼanyabʼaliluk. Bʼobʼta tukni lek ja kostumbre, ja waʼelali sok bʼobʼta ja lugari kʼixin kʼinal ma cheʼel kʼinal soka jastal kʼajyelaʼi. Ayni ekʼele tʼilan oja nebʼ pilan kʼumal. Ja eskwela it wa xchapa solteroʼik, solteraʼik soka matik nupanele bʼa ayiʼoje 23 man 65 jabʼil. Ja eskwela it, wa xkoltajiye bʼa a-sjeʼe lekil modoʼal ja bʼa oj jekjukeʼi sok chapan ajyel bʼa oj ajuk makunuke tsʼikanlek yuja Jyoba soka xchonabʼili.

Eskwela bʼa Biblia bʼa Galaad sbʼa Watchtower (Escuela Bíblica de Galaad de la Watchtower). Ja bʼa hebreo, ja Galaad wa stojolan «jun tsome ton bʼa ay jas wa senyaʼan». Man jabʼil 1943, mas ja waxake mil ixuk winik wajelexa ja bʼa eskwela it sok jekubʼale jastal misioneroʼik bʼa sjeʼjel «ja ba spetzanil ja xchanil xchiquin ja satqʼuinali» (Hechos 13:47). Ja sbʼajtanil ekʼele kʼotye ja misioneroʼik bʼa chonabʼ Perú, mitoni ajyel mini jun kongregasyon, pe ja weʼgo ayxa mas ja mil kongregasyon. Chomajkil yajni kʼotye bʼa chonabʼ Japón, mitoni kʼoteluk ja lajune Taʼumantiʼiki, pe ja weʼgo wanxa x-ekʼ ja 200 mil. Ja joʼe ixaw wa xyaʼa chapjelal ja Eskwela bʼa Galaad tini chʼikan spaklajel man yech ja Yabʼal ja Dyosi. Ja matik wane aʼtel jastal precursor especial, misioneroʼik, ja matik ti aye bʼa Betel ma wane aʼtel jastal biajanteʼik bʼa circuito wani xlokjiye ja bʼa eskwela it bʼa oj chapjuke lek sok jachuk, skoltajel bʼa tsʼunan lek sok tsats aʼajyuk ja aʼtel bʼa xcholjel wan kʼulaxel bʼa yibʼanal ja luʼumi.

• ¿Jasunkiluk ja xchol ja Eskwela bʼa Aʼtel bʼa Precursor?

• ¿Machʼtik wa xbʼobʼ wajuke ja bʼa Eskwela bʼa Cholumanik sbʼaja sGobyerno ja Dyosi?