Tʼusan xta skʼana bʼa oj chamuk, ja Jesusi yiʼaj loʼil jachʼ stuchʼil ja chane snebʼumaniki: ja Pedro, Santiago, Juan soka Andresi. Yajni chʼak yal ja jas oj ekʼuk ja bʼa tsaʼanik xta kʼakʼu, ja yeʼn sjobʼo jun jasunuk jel tʼilan: «[¿]machunkʼa ja moso mas jel toj ayi ja it ma‘ wa stalna sbʼaj leki. ja ma‘ le‘ubʼal yuj ja yajwali bʼa oj spil yi‘le‘ ja swa‘ele‘i ja smoj jumasa‘i[?]» (Mateo 24:3, 45, YD; Marcos 13:3, 4). Ja waʼelal it staʼa tiʼal ja Jesusi, mi jun meran waʼelal bʼa yabʼjel. Ja yeʼn ya slaj ja waʼelal it soka mero snajel bʼa Dyosi. Jastal ni jun ajwalal, ja yeʼn yala ojni stʼoj jun kʼole bʼa oj spil-e ja waʼelal it sbʼaja snebʼumanik ja bʼa tsaʼanik xta kʼakʼu ayotiki. ¿Machʼtik kʼotele ja yeʼnleʼi?

Jun yal tsome snochuman Jesús bʼa tsaʼubʼale yuja Dyosi. Ja «moso» jel mojan wa x-atijisok ja Tsome Tojwanum bʼa Taʼumantiʼ jumasaʼ bʼa Jyoba. Ja it mi xya stekʼ waʼin ja tuk smoje maʼ wa xyaʼteltaye lajan ja Jyoba. Stsʼakatal ja yeʼnleʼi mi la chamtik waʼin, pes tixtani ay yuj ja jwaʼeltiki (Lucas 12:42).

Wa skʼelawe ja snaj ja Dyosi (1 Timoteo 3:15). Ja Jesusi sjipa skʼujol ja bʼa moso it soka niwan cholal bʼa skʼeljel ja xchonabʼil ja Jyoba tey bʼa luʼumi, ja it wa stojolan stalnajel ja jastik junuk yiʼoji, stojel ja xcholjel ja lekil rasoni sok wa xya makunuk ja kongregasyoniki bʼa sjeʼjelkitik. Ja yuj, bʼa oj yakitik ja mero styempoʼil wa xkʼanatik ja jas wa xmakunikujtiki, «ja moso mas jel toj ayi ja it ma‘ wa stalna sbʼaj leki» wa sjeʼa ja mero snajel bʼa Dyosi soka juʼunik wa xkatik makunuk ja bʼa choljeli, ja loʼilik wa x-ekʼ bʼa tsomjeli soka bʼa niwan tsomjeliki.

Ja «moso» toj ni aya yujni jachʼ mero wa xyiʼaj ja jastal wa xyala ja Biblia sok wani skʼulajel ja xchol bʼa xcholjel ja lekil rasoni. Chomajkil, wani stalna sbʼaj lek yujni wa snaʼa lek yajel makunuk sok stalnajel ja jastik sbʼaj ja Kristo tey bʼa Luʼumi (Hechos 10:42). Ja Jyoba yaʼunej koʼ yi slekilal ja yaʼteleʼi, pes wanxta pojxel ja Taʼumantiʼiki sok yajelkitik jitsan jastik junuk bʼa snajel ja Dyosi (Isaías 60:22; 65:13).

• ¿Machunkiluk stʼojo ja Jesús bʼa oj smakʼlay ja snebʼumaniki?

• ¿Jas yuj wa x-alxi ja mosoʼal it toj ay sok wa stalnay sbʼaj lek?