Ta jun taʼumantiʼ bʼa Jyoba wan sjeʼjelawi ja Biblia, wani xa chapa abʼaj bʼajtana. Bʼa oj wa eluk mas slekilal ja bʼa tsomjeliki, jelni lek jachʼ oj cha akʼuluka. Jelni oj wa eluk slekilal ta waxa nocho skʼulajel ja it.

Leʼa jun lugar sok jun ora bʼa oj achapa abʼaj. ¿Jas maʼ ora ja bʼa kʼakʼu oj bʼobʼ achapa bʼaj lek? ¿Lek maʼ ja bʼa saʼan sakbʼel bʼajtanto oj waj aʼtanan ma bʼa akʼwal xa yajni ja yal untiki wajta wayuke? Ta ja weʼn jel latsʼan jawa tyempo, ila janekʼ ita oj wa makunuk ja bʼa xchapjel abʼaji, pe mok awakan mini jasa a-stim-a bʼa skʼulajel. Leʼa jun lugar bʼa chʼabʼan sok tupu ja radyo ma ja telebisyoni. Yajel yi orasyon bʼajtanto oj kʼe achapabʼaj ojni skoltaya bʼa oj wajuk akʼujol ja bʼa Yabʼal ja Dyosi sok mi jaʼuk ja chamkʼujolik bʼa kʼakʼuji (Filipenses 4:6, 7).

Jisa ja sjakʼjeliki sok chapan la ajyi bʼa oj awale. Kʼela bʼajtan jasa wa staʼa tiʼal yibʼanal ja loʼili. Kʼela ja yolomajel ja loʼili ma ja skapituloʼili, kʼela ja yal yolomalik jastal wa syaka sbʼaj soka mero yolomajel ja loʼili, kʼela ja dibujoʼiki sok kʼuman ja sjobʼjelik bʼa yajel julel jkʼujoltik ja yaltsil ja loʼili. Tixa xcha kʼuman ja parrapoʼiki sok leʼa ja sjakʼjelik sbʼaja sjobʼjelik yiʼojani. Leʼa ja tekstoʼik yiʼojani sok ila jastal wa syaka sbʼaj soka yolomajeli (Hechos 17:11). Yajni xa taʼa ja sjakʼjeliki, jisa ja chabʼ oxe sat yaljelik bʼa mas tʼilani bʼa oj ya juluk akʼujol. Jachuk ja bʼa tsomjelali, ta jach waxa kʼana, oj bʼobʼ ajach jawa kʼabʼi bʼa oj awaʼ jun yal sjakʼjel jachʼ bʼa wa kʼumal weʼna.

Spaklajel ja tuktukil loʼil wa x-ekʼ ja bʼa semanaʼik ja bʼa tsomjelali, ojni anebʼ takal takal sok jitsan yajkʼachil jastik junuk sbʼaja Biblia (Mateo 13:51, 52).

• ¿Jastal oj akʼuluk bʼa xchapjel abʼaj lek soka loʼilik wa x-ekʼ ja bʼa tsomjeliki?

• ¿Jastal oj akʼuluk bʼa oj awa jun sjakʼjel ja bʼa tsomjelaliki?