¿Ja wilata ja bʼa potoʼik it jastal tsamalxta xchapunej sbʼaje ja ixuk winiki? ¿Jas yuj jel xkatikon yi stʼilanil?

Yujni wa xkisatikon ja jDyostikoni. Anke meran, ja Dyosi mi jata wa skʼela ja sniʼ jsatiki (1 Samuel 16:7). Pe soka jastal wa xchapa jbʼajtikon ja bʼa jtsomjeltikoni, jani wa xkʼana oj katikon yi stoyjel ja Dyosi sok skisjel ja jmoj-aljeltikoni. Lekbʼi la wajtik bʼa stiʼ sat jun jwes, ¿jastal xa oj wajkotik? Chapani lek yuja jnaʼunejtik ja niwan xchol yiʼoji. Junxtani soka it, ja jastal wa xkʼutes jbʼajtikon ja bʼa tsomjelali wa xjeʼatikon chaʼanyabʼalil wa xkilatikon ja «Jwes bʼa spetsanil ja luʼumi», ja Jyoba, sok chomajkil ja lugar bʼa wa xkatikon yi stoyjeli (Génesis 18:25).

Bʼa wa sjeʼa jas tikʼe sakʼanil kiʼojtikon. Ja Biblia wa xyala yabʼ ja matik wa xyaʼteltay ja Dyosi a-skʼutes sbʼaje tsamalxta ja «jastal ni sbej [...], pero moc lom jelxuque» (1 Timoteo 2:9, 10). Skʼutesel jbʼajtik «jastal ni sbej» wa stojolan mi bʼa jaxta oj waj jkʼujoltik akʼeljukotik yuja jel chaʼan stsʼakol ja jas lapankujtiki, ma jel chikan ja jkwerpotiki, ma jel pitan sok jel tʼatsan. Chomajkil, ja mi la jelxitiki wa skoltayotik bʼa oj jkʼutes jbʼajtik tsamal, mi jokan tasanuk. Sbʼaja rasonik axitaʼi, jelni ja jastal tsamal skʼutesel jbʼajtiki sok weʼnxa ni oj atsaʼe. Sok mini jun yaljel ma xcholjel, ja jastal tsamal wa xkʼutes jbʼajtiki wani x-ilxi «ja yabal ja Diosi [...] jel ni tzamala», sok ojni ajuk yi stoyjel ja Yeʼn (Tito 2:10; 1 Pedro 2:12). Ja jastal tsamalxta wa xkʼutes jbʼajtik ja bʼa tsomjeli wa syama ja jastal wa spensarane ja ixuk winik sbʼaja xchonabʼil ja Jyoba.

Bʼa asyado sok chapan ja jkʼutiki, mi tʼilanuk jel chaʼan stsʼakol ma jelxel xa stojbʼelal. Ja yuj, mok awakan ja jastik junuk it a-skoma bʼa oj wajan ja bʼa Naʼits wa sTsomo sbʼaje ja Taʼumantiʼ jumasaʼ bʼa Jyobaji.

• ¿Jas yuj jel stʼilanil ja jastal wa xchapa jbʼajtik ja yajni wa xkatik yi stoyjel ja Dyosi?

• ¿Jas rasonik wa skoltayotik bʼa snajel stsajel jastal oj jkʼutes jbʼajtik sok xchapjel jbʼajtik?