¿Janekʼ taʼumantiʼ bʼa Jyoba waxa naʼa sbʼaj? Bʼobʼta wa besynoʼik, amoj aʼtel ma amoj bʼa eskwela. Bʼobʼta ayxa bʼa awaʼata loʼil soka yeʼnle sbʼaja Biblia. ¿Machunkiluk ja keʼntikoni, sok jas yuj wa xcholotikon yabʼ ja ixuk winik sbʼaja jas wa xkʼuʼantikoni?

Ixuk winikotikon jastal ni ja tuki. Jakelotikon bʼa tuktukil chonabʼ sok kʼumal, tuk ochtikon eskwela sok tuk miyuk. Jujuntik pilan jrelijyontikon ajyi, ma tuk mi xkʼuʼantikon bʼa Dyos. Pe bʼajtanto oj kʼotkotikon Taʼumantiʼ, yiʼajkujtikon styempoʼil spaklajel ja Biblia (Hechos 17:11). Ja jas jnebʼatikoni, jkʼuʼantikoni sok bʼa jujuneʼotikon jpensaraʼantikon yaʼteltajel ja Jyoba.

Wa xkaʼatikon el slekilal spaklajel ja Biblia. Jastal ni ja tuki, wa x-ekʼ jbʼajtikon wokol sok wa xkʼojchin koktikon. Pe yuja wa xkʼujolantikon skʼuʼajel ja bʼa jsakʼaniltikon ja rasonik bʼa Biblia, kilunejtikon ja slekilal ja bʼa jsakʼaniltikoni (Salmo 128:1, 2). Ja it jaʼ jun rason kiʼojtikon yuja wa xcholotikon yabʼ ja tuki ja lekil jastik junuk jnebʼunejtikon bʼa Biblia.

Wa xkiʼaj jun jsakʼaniltikon jastal wa skʼana ja Dyosi. Ja it ti wa xtax bʼa Biblia, wa skoltayotikon bʼa aʼajyuk lek ja jsakʼaniltikoni, bʼa oj kiʼ jbʼajtikon lek soka tuki, bʼa mok och jkʼabʼtikon sok sjeʼjel lekil jkʼujoltikon. Chomajkil, ja rasonik bʼa Biblia wa xkoltani bʼa mok kux aʼajyuk ja jpensartikoni, wa xkʼujolantikon ja bʼa kaʼteltikoni, bʼa aʼajyuk tsoman ja jpamilyatikoni sok jun jsakʼaniltikon bʼa toj. Jkʼuʼunejtikon lek ja Dyosi «mi ni jun maʼ menos huax yilaa». Ja yujil, ama tuktukil rasaʼotikon bʼa yibʼanal ja Luʼumi, junxta ni pamilya wa xkila jbʼajtikon yuja junxta skʼuʼajel kiʼonejtikoni. Anima tuktukilotikon jastal ja tuki, pe jun ita chonabʼ wa xkila jbʼajtikon (Hechos 4:13; 10:34, 35).

• ¿Jas yuj wa xbʼobʼ kaltik ja taʼumantiʼ jumasaʼ bʼa Jyoba junxtaʼotikon jastal ni ja tuki?

• ¿Jastik koltubʼale ja Taʼumantiʼiki spaklajel ja Biblia?