Ja tsomjelik wa xkʼulaxi ja bʼa Naʼits bʼa wa sTsomo sbʼaje ja Taʼumantiʼ jumasaʼ bʼa Jyobaji, jani bʼa snebʼjel bʼa Biblia soka sGobyerno ja Dyosi, ja yolomajel ja sloʼil ja Jesusi (Lucas 8:1).

Nake lugarik bʼa wa xjexi ja smeranil sbʼaja Dyosi. Ja bʼa lugarik it ti wa xkʼelxi ja aʼtelik sbʼaja xcholjel ja lekil rasoni (Mateo 24:14). Ja naʼitsik it nake tuktukil ja sniwanili soka jastal tojbʼeliki, sok yal sensiyoʼik; jitsan ja bʼa naʼitsik ayni mi kechanta jun kongregasyon wa stsomo sbʼaj. Ja jabʼilik ajkʼachtojani kʼeʼel xa kujtikon jitsan mil yajkʼachil Naʼitsik bʼa Tsomjelal (junuk joʼe naʼitsik ja bʼa kʼakʼuji) jastal ni wan pojxel ja kongregasyoniki. ¿Jastal lajxelkujtikon? (Mateo 19:26.)

Wa xbʼobʼi yuja ay nolubʼal takʼin bʼa jata ni sbʼaj ja jaw. Ja takʼin wa x-axi el ja bʼa kajaʼik jaw ti wa xjekxi bʼa naʼits Betel yaman yuj ja kongregasyoni, jachuk oj bʼobʼ yaʼe majan bʼa tuk kongregasyonik wa xmakuni yujile yajel kʼeʼuk jun yajkʼachil Naʼits bʼa Tsomjelal ma stojbʼesel ja yiʼojexaʼi.

Wa xkʼeʼi yuj jun nole ixuk winik bʼa tuktukil chonabʼ bʼa wa skʼapa sbʼaje sok mi xtupjiye. Bʼa jitsan chonabʼik leʼubʼale sok chapubʼale Kʼoleʼik ixuk winik bʼa yajel kʼeʼuk Naʼitsik bʼa Tsomjelal (Grupos de Construcción de Salones del Reino). Ja kʼole ixuk winike it wa skʼapa sbʼajeʼi, ja yeʼnle ekʼumbʼejtani aye ja bʼa kongregasyoni bʼa yojol ja xchonabʼeʼi, anima ja bʼa lugarik jel chʼikan ayi, wa xwaj yaweyi skoltajel ja Taʼumantiʼik bʼa oj yawe kʼeʼuk ja Naʼits bʼa oj stsom sbʼajeʼi. Bʼa tuk chonabʼik ay Taʼumantiʼik tsaʼubʼale bʼa oj skʼel-e ja aʼtel bʼa yajel kʼeʼuk Naʼitsik bʼa tsomjelal ma bʼa kechanta stojbʼesel ja bʼa sona wa skʼelaweʼi. Ay jitsan wa snaʼawe lek sbʼaja aʼtel bʼa yajel kʼeʼuk naʼitsik ja bʼa skomoneʼi sok wa skʼapa sbʼaje bʼa koltanel, pe mi syama stsʼakole. Jitsan ja matik wa skʼapa sbʼaje kʼebʼubʼal ja bʼa aʼtel it, yeʼnle ni ja bʼa kongregasyon maʼ oj yawe makunuk ja Naʼits bʼa Tsomjelali. Yuj ja yip ja Jyoba soka skoltanel ja xchonabʼili wa xbʼobʼ kʼulaxuk ja it (Salmo 127:1; Colosenses 3:23).

• ¿Jastal wa xlajxikujtikon yajel kʼeʼuk Naʼitsik bʼa Tsomjelal bʼa yibʼanal ja luʼumi?