Ja Biblia wa staʼa tiʼal chabʼ kʼole winike bʼa wa skʼelawe ja jastik junuk wa xkʼulaxi ja bʼa kongregasyoni: «ja quermanotic anciano soc ja quermanotic [skoltuman ansyanoʼiki]» (Filipenses 1:1). Bʼa jujune ja kongregasyoniki ayni skoltuman ansyanoʼik. ¿Jastal wa xkoltaniye bʼa jlekilaltik?

Wa skoltaye ja kʼole ansyanoʼiki. Ja koltumanik it nake winike tsats ay lek ja jastal wa xyila sbʼaje soka Dyosi, wa xbʼobʼ jipjkʼujoltiksoke sok wani skʼujolane ja yaʼteleʼi, jujuntik keremtik sok tuk mas ayxa skʼujole. Wani skʼelawe bʼa lek sok tsamal aʼajyuk ja Naʼits bʼa Tsomjeli sok tuk aʼtelik ja bʼa kongregasyoni. Jachuk, ja ansyanoʼiki wani xbʼobʼ skʼuluke ja yaʼtele bʼa sjeʼjel sok stalnajel ja chejik bʼa kongregasyoni.

Wa xkoltaniye bʼa aʼtel tʼilanik. Jujuntik ja bʼa yeʼnle wa xyawe yi jun lekil sjulelal ja matik wa xkʼotye ja bʼa tsomjelali sok wa sjeʼawe bʼa oj kulanukeʼa. Tuk wa skʼelawe bʼa aʼatuk lek ja sonido, tuk wa spilawe ja literatura, wa skʼelawe ja takʼin bʼa kongregasyoni sok wa xtʼojwaniye ja bʼa choljelali. Chomajkil, wa xkoltaniye bʼa stalnajel ja Naʼits bʼa Tsomjelali, wa skoltaye ja matik awelexa sok jani wa snochowe ja jas wa xyalawe ja ansyanoʼiki. Chikan jasunkiluk ja aʼtel wa x-ajiyileʼi, wani skʼujolane skʼulajel sok spetsanil skʼujole, jachuk chaʼanyabʼalil wa x-iljiye yuja aʼtel wa skʼulaneʼi (1 Timoteo 3:13).

Wa sjeʼawe lekil yaʼtijume Dyos. Ja skoltuman ansyanoʼiki wani stsajiye yuja lekil aʼtijume bʼa Dyosi sok yuja lekil smodoʼe. Soka loʼil wa xyawe ekʼuk bʼa platapormaʼi wani xkoltaniye bʼa tsats aʼajyuk ja skʼuʼajel kiʼojtiki; soka yeʼnto ni bʼajtane ja bʼa xcholjeli wani xkoltaniye bʼa acha jkʼujolantik ja keʼntiki, soka jastal kongana wa x-aʼtijiyeʼi wani xkoltani bʼa tsoman sok gusto aʼajyuk ja kongregasyoni (Efesios 4:16). Soka tyempo, ja yeʼnle wani xbʼobʼ ochuke ansyanoʼik.

• ¿Jas tikʼe winikile ja skoltuman ansyanoʼiki?

• ¿Jastal wa xkoltaniye ja koltumanik it bʼa jachuk lek aʼajyuk ja kongregasyoni?