Spetsanil ja Naʼits bʼa wa sTsomo sbʼaje ja Taʼumantiʼ jumasaʼ bʼa Jyobaji tini ay ja tsamal sok sakal sbʼiʼil ja Dyosi. Ja yuj, tʼilani wa xkatikon ajyuk asyado, tsamal skʼeljel sok tixta aytikon skʼeljel sbʼaja ta ay jas jomi bʼa stojbʼesel. Jun aʼtelal bʼa jel chaʼanyabʼalil, pes tini chʼikan ja stoyjelal wa xkatikon yi ja Dyosi, sok jpetsaniltik wani xbʼobʼ koltanukotik.

La jkʼap jbʼajtik yajelkan asyado yajni wa xchʼak ja tsomjelali. Yajni wa xchʼak ja tsomjelaliki, ja ixuk winik matik wa stsomo sbʼaji gustoxta wa skʼapa sbʼaje bʼa yajelkan asyado ja lugar bʼa tsomjeli; jun ekʼele ja semana mas tsʼikanxa wa xmesji sok wa sakʼxi. Jun ansyano ma jun skoltuman ansyano yeʼn wa skʼela ja aʼteli, sok jani wa snochowe ja jastik ochel juʼun oj kʼulaxuki: jastal smesjel, skusjel, sakʼjel sok skʼulajel trapiar; skusjel sok xcholjel ja kujlayubʼiki; sakʼjel ja banyo; skusjel ja bentanaʼiki soka espejoʼiki; yajel eluk ja tsʼileli, yajel ajyuk asyado sok tulubʼal lek ja bʼa jwera. Jun ekʼele ma mas ja jabʼili wa sakʼxi yibʼanal ja Naʼits bʼa Tsomjeli. Yajel yi jujuntik yal xchol ja yal untiki juni lekil modoʼal bʼa sjeʼjel yi bʼa oj skis-e ja lugar bʼa wa x-axi yi stoyjel ja Dyosi (Eclesiastés 5:1).

La koltanukotik ja bʼa jastik oj tojbʼexuki. Spetsanil ja jabʼiliki, wa xkʼeltalaxi ja bʼa yojoli soka bʼa jwera ja lugar bʼa tsomjeli bʼa oj yile jasunkiluk ja wa skʼana stojbʼeseli bʼa lek aʼajyuk sok jachuk mi lom xchʼakjel takʼin tsaʼan (2 Crónicas 24:13; 34:10). Jun Naʼits bʼa Tsomjel asyadoʼay sok tsamalxta skʼeljel kʼotel jun lekil lugar bʼa stoyjel ja Dyosi. Ta wa xkʼapa jbʼajtik koltanel stojbʼesel, wa xjeʼatik janekʼto wa xkisatik sok wa xyajtaytik ja Jyoba (Salmo 122:1). Chomajkil, ojni tajukotik lek tiʼal ja bʼa jkomontiki (2 Corintios 6:3).

• ¿Jas yuj tʼilan asyado aʼajyuk ja lugar bʼa tsomjelali?

• ¿Jastik aʼtelik wa xkʼulaxi bʼa tsamalxta sok asyado aʼajyuk ja Naʼits bʼa Tsomjeli?