Ja bʼa bʼajtan siglo, ja bʼa Jerusaleni, ajyi jun tsome «jecabanum jumasa soc ja anciano jumasa» aʼtiye jastal jun tsome tojwanumik bʼa skʼelawe sok xchapawe ja jas oj kʼulaxuki bʼa sparte ja kongregasyonik oj wajuke bʼa satkʼinali (Hechos 15:2). Bʼa oj ochuke akwerdo junxta lajan, spaklaye lek ja Biblia sok yaʼawekan atojuke yuja yip ja Dyosi (Hechos 15:25). Junxta ni ja bʼa jtyempotiki, ayni jun Tsome Tojwanum.

Kʼotele yamkʼabʼal bʼa skʼulajel ja jas wa skʼana ja Dyosi. Ja jmoj-aljeltik wa xwajye bʼa satkʼinali, matik kʼotele ja Tsome Tojwanumi, jelni xwaj skʼujole ja Yabʼal ja Dyosi, jel snaʼawe jastal oj kʼulaxuk ja aʼteli sbʼaja jastik bʼa Dyosi. Ja bʼa semanaʼiki wa stsomo sbʼaje bʼa spaklajel sok skʼeljel ja jas wa xmakuniyujile ja kongregasyoniki bʼa yibʼanal ja luʼumkʼinali. Jastal ni ja bʼa bʼajtan siglo, ja yeʼnleʼi wa sjekawe kartaʼik, biajanteʼik wa xyulataye ja kongregasyoniki sok tuk jmoj-aljeltik bʼa wa xyalawe ja jasa oj kʼulaxuki, bʼa spetsanil ja it jani wa xyawe makunuk ja Biblia. Jachuk wa xkoltaniye bʼa aʼajyuk tsoman sok bʼa jun ita pensar ja xchonabʼil ja Dyosi (Hechos 16:4, 5). Ja Tsome Tojwanumi yeʼnani kajan sbʼaje skʼeljel sok yajelkitik ja waʼelali, ja snajel bʼa Dyosi. Chomajkil wa stsatsankʼujolaniye bʼa yajel yi stʼilanil ja xcholjel ja lekil rasoni sok skʼeljel ja matik wa xkʼot staʼ jun cholal ja bʼa xchonabʼil ja Dyosi.

Wani xyaʼawekan atojuke yuja yip ja Dyosi. Ja Tsome Tojwanum it wani sleʼawe atojuke yuja Jyoba, ja Dyos bʼa spetsanil ja sutsatkʼinali, soka Jesús, ja Olomal bʼa kongregasyoniki (1 Corintios 11:3; Efesios 5:23). Ja yeʼnle mi spensaraʼane kʼotele pagreʼil ja bʼa xchonabʼil ja Dyosi. Jastal ni ja tuk wa xwajye bʼa satkʼinali, wani «snochowe‘ ja yal cheji [ja Jesusi] ja bʼa wa xwaji» (Apocalipsis 14:4, YD). Janekʼto wa xyaʼawe tsʼakatal ja Tsome Tojwanumi yuja wa xkatik yi orasyon yuj yeʼnle.

• ¿Machtik kʼotye ja tsome tojwanumik ja bʼa bʼajtan siglo?

• ¿Jastal wa xyaʼawekan atojuke yuja yip ja Dyos ja Tsome Tojwanum ja bʼa jtyempotiki?