¿Ay maʼ bʼa alubʼala wabʼ jun jasunuk sok komjiya bʼa mok maʼ awalyabʼi?... * Ja jaw wa sbʼiʼilan chʼabʼan tiʼ abʼal, pes yujni ja tuki mito snaʼawe. Ja bʼa Biblia wa staʼa tiʼal bʼa jun chʼabʼan tiʼ abʼal jel chaʼanyabʼalil. Wa x-alxi jel chaʼanyabʼalil yujni ti jakel bʼa Dyos. Ja ajyi mini maʼ snaʼuneja. Soka anjeliki chomajkil wa xkʼana snaʼe jasun kʼotel. ¿Wan maʼ xa kʼana oj cha naʼ ja weʼn?...

Axa lek jitsan jabʼil, ja Dyos skʼulan ja bʼajtan winik soka ixuki. Sbʼiʼilane Adán sok Eva. Ja yeʼnleʼi ti ajyiye sakʼan bʼa kʼachinubʼ bʼa Edén. Jelni tsamal ja lugar jaw, pes ja Dyosi xchapa bʼa ti oj ajyukeʼa. Ja Dyos wani skʼana ja yeʼnleʼi soka yuntikileʼi oj ya paxuke ja Luʼum jun tsamal lugar, jastalni ja kʼachinubʼ bʼa Edén. Wa skʼana oj ajyuke sakʼan bʼa tolabida ja bʼa kʼachinubʼ jaw. Pe mini jachʼ ekʼa. Pe ¿wan maʼ xjula kʼujol jasa skʼulane ja Adán soka Eva?...

Ja Adán sok Eva skʼokowe ja smandar ja Dyosi, ja yuj ja wego mi ti ayotik bʼa jun kʼachinubʼ. Pe ja Dyosi skʼapa ja Luʼumi ojto ya paxuk jun tsamal kʼachinubʼ. Jpetsaniltik oj ajyukotik sakʼan bʼa tolabida sok gusto lek. ¿Jastal oj ya kʼotuk ja skʼapjel jaw? Ekʼ jitsan tyempo, mini june maʼ wa snaʼa. ¡Kʼotel jun chʼabʼan tiʼ abʼal!

Pe takal takal och chiknajuk. Yajni ja Jesús jak ja bʼa Luʼumi, yala yabʼ ja ixuk winik jasun kʼotel ja chʼabʼan tiʼ abʼal jaw. Yala ja kʼotel ja sGobyerno ja Dyosi. Yajni wa xkatikyi orasyon ja Dyosi, wa xkʼanatikyi axa skʼul mandar ja Gobyerno it. ¿Jas yuj? Yujni yeʼn oj ya paxuk ja Luʼumi jun tsamal kʼachinubʼ.

¿Wan maʼ xa kʼana oj ajyan sakʼan ja bʼa kʼachinubʼ jaw?... Ajuluka kʼujol, kechan ja matik kʼuʼabʼal aye soka Dyosi oj ajyuke sakʼan ja bʼa Kʼachinubʼi. Ja Biblia wa staʼa tiʼal bʼa jitsan ixuk winik ajyiye kʼuʼabʼal soka Jyoba. ¿Wan maʼ xa kʼana oja nebʼ sbʼaja yeʼnleʼi?... Ja bʼa poyeto it oj jnebʼtik matik wajye sok jastal oj bʼobʼ kʼotkotik jastal yeʼnle.