SJEJEL 12
Ja sobrino ja Pablo mi xiwi
Oj cholawabʼ sbʼa jun kerem bʼa skoltay ja sakʼanil ja jekabʼanum Pablo. Mi xnaʼatik jas sbʼiʼil, pe wa xnaʼatik jani ja sobrino ja Pablo. Pe ja kerem it ay jas skʼulan, pe mi xiwi. ¿Wan maʼ xa kʼana oja naʼ jasa skʼulani?...
Ja Pablo ti akʼubʼal och preso bʼa Jerusalén. Ja yeʼn yamubʼal yujni wa xcholo yabʼ ja ixuk winik sbʼaja Jesús. Pe ay jujuntik tantik winik wa xyilkʼujolane ja Pablo sok xchapawe bʼa ay jas oj skʼulukeyi. Ja yeʼnleʼi wa xkʼana wajuke sok yaljel yabʼ jachuk ja olomal bʼa kʼakʼaneli: «Jeka jawa kʼakʼanumiki bʼa ayiʼe och ja Pablo bʼa stiʼ sat ja matik ay yaʼteli». Ja yeʼnleʼi ojbʼi snakʼ sbʼaje ja bʼa bʼeji, soka yajni x-el kʼot ja Pablo, ¡tibʼi oj smileʼa!
Bʼajtan waj aljuk yabʼ ja Pablo yuja sobrino, sok tsaʼan waj yalyabʼ ja olomal bʼa kʼakʼaneli
Ja sobrino ja Pablo yabʼ yabʼalil ja jas wane xchapjeli. ¿Jasa skʼulani? Waj yalyabʼ ja Pablo ja bʼa lutani. Anto ja Pablo sjeka ja sobrino bʼa awaj yalyabʼ wego ja olomal bʼa kʼakʼaneli. ¿Wokol maʼ yabʼ ja sobrino ja Pablo yaljel yabʼ ja olomal bʼa kʼakʼaneli?... Wokolniʼa, yujni ja olomal bʼa kʼakʼaneli kʼotel jun winik jel chaʼan ja xcholi. Pe ja sobrino ja Pablo mi xiwi sok wajni yalyabʼa.
Ja olomal bʼa kʼakʼaneli wani snaʼa jasa oj skʼuluki. Ja yeʼn sjeka junuk 500 kʼakʼanum bʼa oj stalnaye ja Pablo. Chomajkil, yala yabʼ ja kʼakʼanumiki ayiʼe och ja Pablo man bʼa Cesarea ja akʼwal jaw. ¿Milji maʼ ja Pablo?... Miyuk, ja tantik winiki mi jas bʼobʼ skʼulukeyi. Soka jastal xchapunejeʼi mini jachʼ elkʼota.
¿Jasa wa xnebʼatik ja bʼa loʼil it?... Ja weʼn ojni cha kʼotan jastal ja sobrino ja Pablo bʼa mi xiwi. Wani skʼana mok xiwkotik yajni wa xkalatik yabʼ ja ixuk winik sbʼaja Jyoba. Jaxa weʼn, ¿oj maʼ achol sbʼaja Jyoba sok mi oj xiwan?... Ta jachʼ waxa kʼulan, ojni bʼobʼa koltay jitsan ixuk winik bʼa oj staʼ sakʼanile.
