Yajni wa xkalatik yabʼ ja ixuk winik sbʼa Jyoba, jujuntik ayni wa xtajkiye ma wa stselayotike. Bʼobʼta wa xpensaraʼantik: «Ojxa kʼotkon tekʼan yaljel sbʼaja Jyoba». ¿Ay maʼ bʼa ekʼelabʼaj ja it?... Ja bʼa Biblia wa xyala kabʼtik bʼa jun winik bʼa syajtay ja Jyoba, pe tʼusan mi kʼot tekʼan yaljel sbʼaja Jyoba. Ja winik it sbʼiʼilan Jeremías. La kiltik jasa ekʼ sbʼaji.

Yajni ja Jeremías junto kerem, ja Jyoba yala yabʼ tʼilan oj ya ekʼyi ja ixuk winik bʼa ayaʼekan skʼulajel ja bʼa mi lekuki. Pe yuja cholal it jel wokol bʼa yeʼna, ja Jeremías och xiwel. Ja yuj, ja yeʼn yala yabʼ ja Jyoba: «Jelto keremon sok mi xnaʼa jasa oj kalyabʼyeʼi». Pe ja Jyoba sjakʼayi: «Mok xiwan, keʼn oj koltaya».

 Anto ja Jeremías kʼe yalyabʼ ja chonabʼi: «Ta mikʼa xa tukbʼesa bʼajex, ojni kʼuljanik kastigar». ¿Skisawe maʼ ja Jeremías?... Miyuk, jujuntik stselaye sok tuk jel tajkiyesok juntiro. ¡Sok jujuntik sleʼawe modo bʼa oj smile! ¿Oj maʼ awal ja Jeremías xiwi?... Jachukniʼa. Ja yeʼn jel xiwi sok yala: «Ojxa kʼotkon tekʼan yaljel sbʼaja Jyoba». Pe ¿merani maʼ yaʼakan yaljel sbʼa Jyoba?... Miyuk. Yuja Jeremías jel syajtay juntiro ja Jyoba, ja yuj mi yaʼakan yaljel sbʼaja Jyoba. Mini axwiʼa, ja yuj ja Jyoba stalnaniʼa.

Jun ekʼele, jujuntik tantik winik sjipawe koʼ ja Jeremías bʼa jun chaʼan poso. Ja Jeremías och mukxuk ja bʼa poso sok mini ayiʼoj jaʼ sok waʼelal bʼa oj yabʼe. ¡Ja tantik winike it wa skʼanawe oj chamuk ja Jeremías! Pe ¿chamni maʼa? Miyuk, yujni ja Jyoba koltani bʼa oj ajuk eluk ja bʼa poso.

Ja bʼa loʼil it kilatik ja Jeremías mi yaʼakan yaljel sbʼa Jyoba ama ayni ekʼele och xiwel. ¿Jasa waxa nebʼa sbʼaja yeʼni?... Pes bʼobʼta ayni ekʼele cha wala stselaji ma wa xtajkiye amok yajni waxa cholo sbʼaja Dyosi. Ma bʼobʼta wala kʼixwi ma wala xiwi. Pe mokni awakan yaljel sbʼaja Jyoba. Ajuluka kʼujol, ja yeʼn tolabida oj skoltaya jastalni koltaji ja Jeremías.