¿Jel maʼ wokol skʼulajel ja jas wa skʼana ja Jyoba?... Jitsan ixuk winik wa xyalawe jelni wokola. Pe ja Biblia wa sjeʼa mi wokoluk. Wa xyala kabʼtik sbʼaja Josías, waj jun kerem bʼa jel skʼujolan yaʼteltajel ja Jyoba. Ja jasa koltajiʼi jani sleʼa lekil yamigoʼik. La jnebʼtik mas sbʼaja Josías sok sbʼaja lekil yamigoʼiki.

Ja stat ja Josías ja waja Amón, jun mandaranum bʼa Judá. Ja Amón skʼulan bʼa mi lekuk sok yaʼteltay kʼulubʼal dyosik. Yajni cham ja Amón, ja Josías och mandaranum ja bʼa Judá. ¿Wan maʼ xa naʼa janekʼ jabʼil yiʼoj ja Josías yajni aji och mandaranumi? ¡Kechanta yiʼoj waxake jabʼil! ¿Pe skʼulan maʼ bʼa mi lekuk jastal ja stati?... Miyuk, mi skʼulan.

Man yal xchʼinil, ja Josías wa skʼana oj yaʼteltay ja Jyoba. Ja yuj sleʼa lekil yamigoʼik. Ja yeʼn jaʼita stsaʼa oj yamigoʼuk ja matik wa syajtay ja Jyoba. Soka yeʼnleʼi skoltaye ja Josías bʼa oj ajyuk kʼuʼabʼal soka Jyoba. ¿Matik yamigoʼan ja Josías?

 June bʼa yeʼnle ja waj ja aluman Sofonías. Ja yeʼn tʼilani yalyabʼ ja it ja swinkil ja Judá: «Ta mixa waʼawexkan yaʼteltajel ja kʼulubʼal dyosiki, mini lek oj wajka wujilexa». ¿Jasa skʼulan ja Josías? ¿Skʼuʼan maʼ yi ja alumani? Skʼuʼaniʼa. Ja yuj, ja yeʼn jani yaʼteltay ja Jyoba, sok mi jaʼuk ja kʼulubʼal dyosiki.

Ja pilan yamigo waj ja Josías jani ja Jeremías. Ja yeʼnleʼi juntikxta ja sjabʼileʼi soka yajni kʼiyejani mojan yiʼoj sbʼaj ja bʼa ajyiye kulani. Ja Jeremías soka Josías lajan skoltay sbʼaje bʼa yaʼteltaye ja Jyoba. Ja yeʼnleʼi jelni lek yila sbʼaje, ja yuj yajni ja Josías chami, ja Jeremías stojbʼes jun tsʼebʼoj bʼa yala ja jastal jel tristeʼay xyabʼi.

¿Jasa wa xbʼobʼa nebʼ sbʼaja Josías?... Ja yeʼn skʼana oj ajyuk kʼuʼabʼal soka Dyosi man yal xchʼinil. Sok bʼa oj ajyuk kʼuʼabʼal, tʼilani sleʼa yamigoʼik bʼa syajtaye ja Jyoba. ¿Anke ja weʼn chomajkil waxa kʼana oja waʼteltay ja Jyoba? Ja yuj jelni tʼilan oja leʼ lekil awamigoʼik.