Ja Rebeca waj jun ixuk bʼa jel syajtay ja Jyoba. Ja statami, ja Isaac, chomajkil jel syajtay ja Jyoba. Ja bʼa loʼil it oj jnebʼtik jastal snaʼa sbʼaje, sok oj cha kiltik jastal ja Rebeca wa skʼana yajel gustoʼaxuk ja Jyoba.

Ja snantat ja Isaac sbʼiʼilane Abrahán sok Sara. Ja Abrahán wa skʼana ja skeremi oj nupanuk sok jun ixuk bʼa wa xyaʼteltay ja Jyoba. Pe ja yeʼnleʼi ti ajyiye kulan bʼa slujmal Canaán, soka swinkil ja tiw mi xyaʼteltaye ja Jyoba. Ja yuj, sjeka june ja yaʼtijumiki (bʼobʼta jaʼa Eliezer) bʼa oj wajuk man bʼa Harán. ¿Jas yuj ti sjeka man tiwi? Yujni ja bʼa Harán ti aye kulan jujuntik spamilya ja Abrahán, soka Eliezer ojni bʼobʼ stayi ja tiwi jun lekil xcheʼum ja Isaac.

Ja Eliezer sok pilan yaʼtijumik ja Abrahán stuluweyi ja snajtil bʼejyeli. Yiʼaje och lajune camello bʼa skuchu och waʼelal sok majtanalik. Pe ¿jastalxa oj skʼuluk ja Eliezer bʼa oj stayi xcheʼum ja Isaac? Ja yeʼn wa snaʼa ja ixuke ja bʼa chonabʼi wa xwaj yawe eluk jaʼ ja bʼa poso. Ja yuj, yajni kʼotye ja bʼa Harán, wajye ja bʼa poso jaw. Anto ja Eliezer yayi jun orasyon ja Jyoba sok yala yabʼ: «Oj kʼanyi jun akʼix bʼa oj yaki jaʼ. Ta ja yeʼn xyaki jaʼ sok chomajkil xyayi ja jcamelloʼiki, jachuk oj jnaʼe yeʼnani ja ixuk ja maʼ atsaʼuneji».

Ja bʼa jutsʼin jaw, ja Rebeca ti kʼot ja bʼa poso. Ja Biblia wa xyala ja yeʼn jun tsamal akʼix. Ja Eliezer skʼanayi jaʼ, soka yeʼn sjakʼa:  «Ojni kawi jaʼ ja weʼn sok chomajkil jawa camelloʼiki». Ja Rebeca jelni jitsan jaʼ ya eluk ja bʼa poso yuja camelloʼiki jel xyuʼaje jaʼ. Kʼela ja dibujo ja bʼa slam ekʼta. ¿Jasa wan skʼulajel ja Rebeca?... Yajni ja Eliezer yila jel x-aʼtiji ja Rebeca, ja yeʼn jel cham yila jastal ja Jyoba sjakʼa ja yorasyoni.

Ja Eliezer yayi ja Rebeca jitsan tsamal majtanal, soka yeʼn sloko ja Eliezer soka tuk aʼtijumiki bʼa snaj ja spamilyaʼiki. Ja Eliezer yala jas yuj jekubʼal yuja Abrahán man bʼa Harán. Cha xcholo jastal ja Jyoba sjakʼa ja yorasyoni. Yajni yabʼye ja jaw, ja spamilya ja Rebeca jel gustoʼaxiye. Yalawe yabʼ ja Eliezer: «Lekni xkabʼtikon ja Rebeca oj nupanuk soka Isaac».

¿Oj maʼ awal ja Rebeca wa skʼana oj nupanuk soka Isaac?... Yajni ja spamilya sjobʼoweyi ja Rebeca, ja yeʼn skʼananiʼa. ¿Jas yuj? Yujni ja Rebeca wa snaʼa ja Eliezer jaʼ jekubʼal yuja Jyoba. Ja yuj wajni soka Eliezer man Canaán. Sok yajni kʼotyeʼi, ja Rebeca nupani soka Isaac.

Ja Rebeca ajyi kʼuʼabʼal soka Jyoba, ja yuj ja Jyoba ya koʼ slekilal. Sok mi kechanuka: ja Jesús ti pojki bʼa yintil ja Rebeca. Ja Jyoba ojni cha stalnaya ta kʼuʼabʼal wala ajyi jastal ja Rebeca. Chomajkil, ja Jyoba oj wa gustoʼaxuk.