Man yal xchʼinil, ja Samuel ti ajyi sok ti aʼtiji bʼa tabernáculo. Ja tabernáculo waj jun lugar bʼa wa xwajye ja ixuk winik bʼa stoyjel ja Dyosi. ¿Wan maʼ xa kʼana oja naʼ jas yuj ja Samuel ti ajyi tiwi? Bʼa oja naʼe, la kiltik bʼajtan sbʼaja Ana, ja snani.

Ja Ana jel skʼana oj ajyuk jun yal, pe mini xbʼobʼ ajyuk yuntikil. Ja yuj, yayi orasyon ja Jyoba sok yala yabʼ: «Jyoba, aʼawa pabor, koltayon». Soka Ana skʼapa: «Ta ajyi jun kal, ojni jekawi bʼa tabernáculo bʼa ti oj ajyuk sok oj aʼtijuk tiw». Ja Jyoba smaklay ja yorasyon ja Ana, soka yeʼn ajyi jun yal. Ja yal keremi ya sbʼiʼiluk Samuel. Yajni ayxa yiʼoj oxe ma chane jabʼil, ja Ana ya kʼotuk ja jas skʼapuneji sok yiʼaj och bʼa tabernáculo bʼa oj yaʼteltay ja Dyosi.

Ja mero olomal ja bʼa tabernáculo sbʼiʼil Elí. Ja chabʼ skeremtiki cha ti wa x-aʼtijiye tiw. Ja bʼa tabernáculo ti wa x-axiyi stoyjel ja Jyoba, ja yuj ja matik wa x-ajyi ja tiw tʼilani toj lek oj ajyukeʼa. Pe ja Samuel wa xyila ja yuntikil ja Elí wa skʼulane jastik mi lekuk. Pe ¿skʼulan maʼ ja Samuel jastik junuk mi lekuk jastal ja yeʼnleʼi?... Ja Samuel skʼulan ja jas wa skʼana ja Jyoba, jastalni jeʼubʼalyi yuj ja snantati.

¿Jas maʼ oja wal tʼilan oj skʼuluk ja Elí soka chabʼ yuntikili?... Ja Elí ojni stoj ajyi sok mini oj yakan oj aʼtijuke ja bʼa tabernáculo. Pe ja Elí mini jas skʼulana. Ja yuj, ja Jyoba jel tajki soka yeʼn soka ja chabʼ yuntikili, sok yala oj skʼul kastigar.

Jun akʼwal yajni wan wayel ja Samuel, ja yeʼn yabʼ ay maʼ wan kʼumajelsok. «¡Samuel!», xchi ja kʼumali. Ja yeʼn waj ajnel ja bʼay ja Elí, pe ja Elí yala yabʼ: «Ja keʼn me xkʼumana». Jachʼ kʼumaji chabʼ ekʼele mas. Pe ja bʼa yoxil ekʼeleʼi, ja Elí yala yabʼ ja Samuel: «Ta cha kʼumajiya, jakʼa: ‹Jyoba, alakabʼ. Wanon smaklajel›». Yajni ja Samuel skʼulan jachuki, ja Jyoba yala: «Alayabʼ ja Elí oj jkʼul kastigar ja spamilya yuja jastik mi lekuk skʼulunejeʼi». ¿Jel maʼ wokol waj bʼa Samuel yaljel yabʼ ja rason it ja Elí?... Bʼobʼta jelni wokol yabʼa. Pe ama ja Samuel  wani xiwa, ja yeʼn skʼulan ja jastalni alji yabʼ yuja Jyoba. Ja jas yala ja Jyoba jachni kʼota: yajni ekʼ ja tyempo, ja Elí soka chabʼ skeremtiki chamye.

Jelni jas wa xnebʼatik sbʼaja Samuel. Ama yila ja tuki wa skʼulane jastik mi lekuk, ja yeʼn jani skʼulan ja jas wa skʼana ja Jyoba. ¿Jachʼ maʼ oj cha kʼuluk ja weʼn? ¿Oj maʼ kʼotan jastal Samuel sok oj ajyan kʼuʼabʼal soka Jyoba? Ta jachʼ waxa kʼulani, ja Jyoba soka wa nana tati jel oj ajyuke gusto.