SJEJEL 13
Ja Timoteo jel skʼana oj skoltay ja ixuk winiki
Ja Timoteo waj jun kerem bʼa jel aji gustoʼaxuk yajni skoltay ja tuki. Ja yeʼn waj bʼa jitsan lugarik bʼa skoltajel ja ixuk winiki. Jelni skʼaʼa skʼujol ja bʼa sakʼanili. ¿Wan maʼ xa kʼana oja nebʼ sbʼaja yeʼni?...
Ja Timoteo jejiyi yuja snan soka smexep bʼa Jyoba
Ja Timoteo ti kʼi bʼa jun chonabʼ sbʼiʼil Listra. Ja snani sbʼiʼil Eunice, jaxa smexepi, Loida. Man yal xchʼinil, ja yeʼnleʼi kʼe sjeʼeyi sbʼaja Jyoba. Ja yuj, ja Timoteo man yal xchʼinil jel skʼana oj skoltay ja ixuk winik bʼa oj snebʼ-e sbʼaja Jyoba.
Jun kʼakʼu, yajni ja Timoteo junxa kerem, ja Pablo yala yabʼ: «Oj wajkon xcholjel bʼa pilan lugarik. ¿Wan maʼ xa kʼana oj wajan jmok?». Ja Timoteo gustoxta yala: «¡Ojo, oj wajkona mok!». Ja yeʼn jelni skʼana skoltajel ja ixuk winiki.
Ja yeʼn waj soka Pablo man Tesalónica, ja chonabʼ it ti wa xkan bʼa Grecia. Bʼa oj kʼotuke ja tiwi, ja yeʼnleʼi jelni yaweyi ja bʼejyeli sok tsaʼan tixa wajye bʼa barko. Yajni kʼotyeʼi, skoltaye jitsan ixuk winik bʼa snebʼjel sbʼaja Jyoba. Pe jujuntik jel tajkiye sok sleʼawe modo bʼa oj yixtalaʼuke. Ja yuj, ja Pablo soka Timoteo tʼilani elye ja tiwi sok wajye xcholjel bʼa pilan lugarik.
Ja Timoteo jel gusto ajyi sok skʼaʼa skʼujol ja bʼa sakʼanili
Ekʼ jujuntik ixaw, ja Pablo yalyabʼ ja Timoteo akumxuk ja bʼa Tesalónica bʼa oj yil jasa wane skʼulajel ja smoj-aljeliki. Ja Timoteo skʼanani mok xiwuk bʼa oj wajuk ja bʼa chonabʼ jaw jel xiwela sbʼaji. Pe ja yeʼn wajniʼa yujni jel xcham skʼujol sbʼaja smoj-aljeliki. Sok yajni kumxi, ja yeʼn yiʼaj ochyi lekil rasonik ja Pablo. ¡Ja smoj-alijelik ja bʼa Tesalónica me xyaʼawekan yaʼteltajel ja Jyoba!
Ja Timoteo soka Pablo lajan yaʼteltaye ja Jyoba jitsan jabʼil. Ja yuj, jun ekʼele ja Pablo stsʼijbʼan sbʼaja Timoteo: «Oj jek ja Timoteo bʼa oj skoltay ja kongregasyoniki. Mey pilan jastal ja yeʼni. Ja yeʼni jel syajtay ja Jyoba sok cha jachuk ja ixuk winiki».
Jaxa weʼn, ¿wan maʼ xa yajtay ja ixuk winiki sok waxa kʼana oja koltay bʼa oj snebʼ-e sbʼaja Jyoba?... Ta jachʼ waxa kʼulan, ja weʼn jelni gusto oj ajyan sok oja kʼaʼa kʼujol ja bʼa wa sakʼanil jastal ja Timoteo.
