Adán soka Eva ajyi yuntikile, sok kʼot ajyuk jitsan ixuk winik ja bʼa Luʼumi. Soka tyempo, jujuntik anjel skʼokowe ja smandar ja Dyosi sok jaʼ skʼuʼane yi ja Satanás.

Ja yeʼnle koʼyekon ja bʼa Luʼumi, skʼulan skwerpoʼe jastal bʼa winik sok nupaniye sok ja ixukeʼi. Ja ixukeʼi ajyi yuntikile bʼa tuk skʼeljel yuja tuk alatsiki: jelni ja yipeʼi sok ixta wa xyilawe ja tuki.

Jitsan ixuk winik kʼe skʼuluke jastik bʼa mi lekuk. Ja Bibliʼa wa xyala ja ixuk winiki jani wajel skʼujole skʼulajel ja bʼa mi lekuki, sok tolabida ja jas wa spensaraneʼi mini lekuka.

Noé juni winik toj. Jyoba yala yabʼ oj ya jak jun niwan bʼutʼ jaʼ bʼa oj xchʼay snajel ja matik wa skʼulan ja bʼa mi lekuki.

Dyos yala yabʼ ja Noé a-skʼuluk jun arka, jachʼ jastal jun niwan barko, soka bʼa yojoli aya ochuk ja spamilya sok jitsan chanteʼik.

Noé yala yabʼ ja ixuk winiki jakum jun niwan bʼutʼ jaʼ, pe mini kʼuʼajiyi. Jujuntik stseʼlaye, soka tuki kʼe yilkʼujoluke.

Yajni chʼak tojbʼuk ja arka, tixa xchʼika bʼa yojol ja chanteʼiki.